Profisionál saúde hala’o hela teste termometru ba bebé ida ho nia inan antes atu sa’e Ró Nakroman atu ba Oé-Cusse. Imajen Tato/Antonio Goncalves ‘Daciparu’.

DILI, 19 maiu 2022 (TATOLI)—Diretór Jerál Ministériu Solidariedade Sosiál no Inkluzaun (MSSI), Rui Manuel Gago Exposto, hateten MSSI hahú ona halo verifikasaun ba dadus bolsa da mãe ba labarik atuál (2012 to’o agora) no iha tinan ida-ne’e bele halo pagamentu.

Notísia Relevante: Labarik moris 2019 iha direitu hetan “Bolsa da Mãe Jerasaun Foun”

“To’o agora MSSI kontinua halo pagamentu ba benefisiáriu bolsa da mãe atuál tanba MSSI hahú verifika ona dadus benefisiáriu bolsa da mãe ne’e no tinan ne’e bele halo pagamentu,” Rui Manuel Gago Exposto hateten ba Agência TATOLI, iha nia knaar fatin Caicoli, Dili, sesta ne’e.

Nia hatutan, iha fulan juñu 2022 ne’e Governu liuhosi MSSI atu implementa ona bolsa da mãe jerasaun foun maibé MSSI mós kontinua halo verifikasaun no selu benefisiáriu bolsa da mãe ida tuan ne’e nian.

“Maske ita atu implementa programa ‘bolsa da mãe jerasaun foun’ maibé to’o agora ita sei nafatin halo pagamentu ba ita-nia benefisiáriu bolsa da mãe nian,” nia hateten.

Maibé, tuir nia, bainhira implementa mak iha impaktu boot entaun automatikamente bolsa da mãe ne’e bele esklui mesak tanba laiha impaktu hosi programa ne’e.

Notísia Relevante: Governu prevee millaun $7 ba programa ‘Bolsa da Mãe Jerasaun Foun’

Diretór Diresaun Nasionál Asisténsia Sosiál (DNSA), Lucas Tois, informa subsídiu bolsa da mãe ne’ebé agora daudaun iha, hahú implementa iha 2012 atu sustenta família vulnerável ho kada benefisiáriu, fulan ida simu $5 no tinan ida $60, maibé família ida labarik na’in-tolu mak rejista entaun totál tinan ida $180.

Dadus hosi MSSI, to’o 2021 ne’e, benefisiáriu bolsa da mãe iha territóriu Timor-Leste hamutuk 101.000-resin ne’ebé nafatin simu subsídiu Governu to’o ohin loron.

Programa bolsa da mãe ne’e atu haree ba iha ema-ne’ebé konsidera vulneravél ekonomika no sosiál hodi fó subsídiu no hahú implementa iha 2008 ho pilotu iha munisípiu balun de’it, maibé iha 2012 mak ba munisípiu no postu administrativu hotu-hotu to’o agora.

Tuir Dekretu-Lei 14/04/2012, ho objetivu atu promove labarik hosi tinan 0-17 liu-liu atu asesu ba eskola minimu frekuente to’o eskola sekundáriu no asesu saúde.

Notísia Relevante: Governu Austrália apoia millaun $5 ba programa “bolsa da mãe jerasaun foun”

MSSI dezeña diploma ministeriál ba programa “Bolsa da Mãe Jerasaun Foun”

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here