Primeira-Ministra interina no Ministra Solidariedade Sosiál no Inkluzaun, Armanda Berta dos Santos, Sorumutu ho Embaixadór Austrália iha Timor-Leste, Bill Costello, iha auditóriu MSSI Caikoli Dili, segunda (04/04). Imajen Tatoli/Egas Cristovão.

DILI, 04 abríl 2022 (TATOLI)—Primeira-Ministra interina no Ministra Solidariedade Sosiál no Inkluzaun (MSSI), Armanda Berta dos Santos, no Embaixadór Austrália, Bill Costello, segunda ne’e, kontinua diskute progama “bolsa da mãe jerasaun foun”.

Governu Austrália liuhosi sira-nia embaixadór iha Timor-Leste, Bill Costello, fó prioridade apoiu $5 ba Timor-Leste hodi reforsa ba família sira liu-liu ba inan isin-rua no ba bebé sira.

Notísia Relevante: Labarik moris 2019 iha direitu hetan “Bolsa da Mãe Jerasaun Foun”

“Programa ida importante tebes ne’ebé mak ohin ami diskute mak programa bolsa da mãe jerasaun foun ne’ebé mak ita apoiu ho osan miliaun $5 hodi reforsa ba família sira liu-liu ba ita-nia inan-isin rua no labarik kiik-oan sira,” Bill Costello hateten ba jornalista sira, hafoin halo enkontru ho MSSI, iha salaun MSSI Caicoli, Dili.

Aleinde ne’e, parte rua mós ko’alia kona-ba ema ho defisiensia no asuntu hanesan nutrisaun sira, liu-liu parte tékniku hosi emaixada Austrália servisu makaas ho Ministériu Solidariedade Sosiál no Inkluzaun atu oinsá inan sira bele asesu ba osan no oinsá atu rejistu.

Primeira-Ministra interina, Armanda Berta dos Santos hato’o apresiasaun profunda ba apoiu ne’ebé durante ne’e Governu Australia oferese mai Governu Timor-Leste espesialmente apoiu ai-moruk vasina nian no hatudu rezultadu ne’ebé signifikante tebes kona-ba pandémia surtu COVID-19.

Programa bolsa da mãe jerasaun foun ne’e sei implementa iha loron 01 juñu 2022, ne’ebé sei hahú implementa iha munisípiu Ainaro, Bobonaro no Rejiaun Administrativu Espesiál Oé-Cusse Ambeno (RAEOA). 

Governu Timor-Leste prevee osan ba programa “Bolsa da mae jerasaun foun” ne’e ho montante milaaun $7.

Jornalista :  Osória Marques

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here