Profisionál saúde hala’o hela teste termometru ba bebé ida ho nia inan antes atu sa’e Ró Nakroman atu ba Oé-Cusse. Imajen Tato/Antonio Goncalves ‘Daciparu’.

DILI, 30 marsu 2022 (TATOLI)—Diretór Nasionál Asisténsia Sosiál (DNAS), Lucas Tois, hateten labarik ne’ebé moris iha inísiu fulan-janeiru 2019 nian iha direitu hetan programa ‘Bolsa da Mãe Jerasaun Foun’.

Notísia Relevante: Governu prevee millaun $7 ba programa ‘Bolsa da Mãe Jerasaun Foun’

“Programa ‘Bolsa da Mãe Jerasaun Foun’ ne’e ba labarik ho idade tinan tolu hahú fulan janeiru 2019 mak to’o agora mak sei hetan bolsa da mãe jerasaun foun. Maibé, hosi 2019 ba kotuk labele inklui ho inan-isin rua,” Diretór Nasionál Asisténsia Sosiál (DNAS) ne’e hateten ba Agência TATOLI, iha nia knaar fatin Caicoli, Dili, sesta ne’e.

Tanba ne’e, nia informa, iha fulan-junu nia hahú ne’e komesa halo rejistu ba ‘Bolsa da Mãe Jerasaun Foun’ iha Munisípiu Ainaro, Bobonaro no Rejiaun Administrativa Espesiál Oé-cusse Ambeno (RAEOA).

Daudaun ne’e, parte MSSI liuhosi Dirasaun Nasionál Asisténsia Sosiál mós prepara halo sistema rejistu ba programa refere ketak ida, nune’e fasil akompaña prosesu rejistu ne’e ba inan isin-rua no labarik sira.

“Ita presiza atu iha sistema ketak, nune’e bele akompaña rejistu ba inan isin-rua no labarik, atu nune’e bele hatene osan tama fulan-fulan ba sira. Ami iha sistema saúde ba família nian maibé ami hakarak sistema ba programa refere atu ami fasil akompaña,” nia dehan.

Tuir nia, objetivu kria sistema ketak ba programa refere nune’e ema seluk labele hatene ema isin-rua ne’e hahú sa fulan no sa tinan.

Sistema ba programa ‘Bolsa da Mãe Jerasaun Foun’ ne’e, nia dehan, hetan apoiu hosi Catalpa Internasionál (teknolójia ne’ebé kria ba impaktus sosiál) liuhosi  Partnership Humam Development (PHD) Austrália hodi dezenvole sistema ne’e.

Notísia Relevante: Lansamentu rejistu programa “bolsa da mãe jerasaun foun” aranke abríl

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here