Diretór Jerál STAE, Acilino Manuel Branco. Imajen TATOLI/Egas Cristóvão

DILI, 16 fevereiru 2022 (TATOLI)—Sekretariadu Tékniku Administrasaun Eleitorál (STAE), sei esforsu atu realiza eleisaun prezidensiál 2022 iha Austrália, nune’e sidadaun timor-oan sira labele lakon sira-nia direitu hodi ezerse sira-nia direitu votu iha eleisaun prezidensiál 2022. 

Notísia Relevante: Ekipa resensiamentu eleitorál iha diáspora rejista votante 367  

“To’o iha momentu ne’e, ita-nia preparasaun kontinua la’o, mesmu iha tinan kotuk prosesu ita la halo atualizasaun, maibé baze de dadus ba eleitór hosi Austrália nian kontinua eziste ita-nia servidór sentrál. Ita sei halo esforsu tomak, nune’e ita-nia maluk sira labele lakon sira-nia direitu iha Eleisaun Prezidensiál,” Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten ba jornalista sira iha nia knar fatin, Caicoli, kuarta ne’e. 

Daudaun ne’e, STAE kontinua prepara no halo koordenasaun hamutuk ho Ministériu Negósiu Estranjeiru no Kooperasaun (MNEK), liuhosi Dirasaun Jerál Embaixada no konsuladu sira iha nasaun ne’ebè atu organiza eleisaun liu-liu Austrália hodi fornese informasaun relevante hodi ajusta planu sira-ne’e.

Estabelesimentu sentru votasaun iha nasaun seluk laiha problema no iha nasaun Austrália nian sei haree progresu di’ak, nune’e iha nivél tékniku kontinua halo preparasaun ba eleisaun prezidensiál 2022 hodi bele realiza iha ne’ebá. 

“Ba nasaun seluk laiha problema, iha Austrália rasik mós ita-haree progresu ne’ebè di’ak, iha nivél tékniku ita kontinua halo preparasaun sentru votasaun baibain nian hein-de’it tempu dezlokasaun. Ita transporta materiál liuhosi aero no kestaun ida-ne’e mak ita haree. Maibé alternativa informasaun ita hetan nasaun refere permite ema estranjeiru bele tama ona Austrália,” nia dehan.

Tanba ne’e, STAE ajusta hela kalendáriu distribuisaun. materiál hosi Dili inklui Austrália iha loron 11-12 marsu tinan 2022. 

STAE halo preparasaun liga situasaun nasaun hanesan mós iha Austrália tanba aviaun laiha oráriu ne’ebè normal hanesan uluk, maibé voo ne’ebè planea tama iha loron 11 marsu  laiha mak STAE sei buka alternativa seluk liga ho Nasaun seluk hodi bele liuhosi Indonésia liga fali Nasaun sira seluk.

Tanba, nia informa, situasaun COVID-19 ameasa mundu tomak, nune’e bainhara laiha dalan sai ba Nasaun seluk mak sei hein Estadu ho Governu bele hola desizaun ruma. 

Notísia Relevante: Governu esforsu realiza eleisaun prezidensiál iha Austrália

Preparasaun atu dezloka ba rai-li’ur, tékniku sira iha STAE preparadu no identifika ona tékniku sira atu ba estranjeiru prepara matériál hamutuk ho materiál munisípiu sira loron 11-12 marsu sai, nune’e loron 22 fulan-marsu bele to’o ona iha Dili hodi submete iha prosesu oras 72 iha CNE.

Antes ne’e, tuir STAE estabelese sentru votasaun sia (9) iha diáspora ne’e sei estabelese tolu iha Austrália mak ida iha Darwin, Sidney no Melbourne, no sentyru votasaun ida (1) monta iha Korea do Súl no sentru votasaun rua (2) monta iha Portugál no sentru votasaun tolu (3) seluk monta iha Londres, Peterborough no Oxford. 

Enkuantu, totál sentru votasaun ne’ebé monta iha territóriu nasionál inklui ho iha diaspora ne’e hamutuk 1.200.

Dadus resensiamentu eleitorál ba eleitór sira iha diaspora liu-liu iha Austrália hamutuk 1.489, Korea do Súl 1.262, Irlandia 1.251, Portugál 762 no Reinu Unidu hamutuk 2.236.

Dadus provizóriu resensiamentu eleitorál no atualizasaun baze de dadus to’o novembru 2021 eleitór hamutuk 857.487 ne’ebé kompostu hosi munisípiu Aileu 33.727, Ainaro 44.571, Baucau 95.142, Bobonaro iha 69,822, Covalima 47.935, Dili 190.750, Ermera 82.931, Lautém 48.297, Liquiça 50.965, Manatuto 35.422, Manufahi 40.308, Rejiaun Administrativa Espesiál Oé-Cusse Ambeno (RAEOA) 51.005 no munisípiu Viqueque hamutuk 59.612.

Notísia Relevante: Ekipa resensiamentu haree posibilidade realiza Eleisaun Prezidensiál iha Austrália

STAE sei estabelese sentru votasaun sia iha diáspora

Jornalista : Celestina Teles

Editór       : Cancio Ximenes 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here