Diretór Jerál STAE, Acilino Manuel Branco, imajen TATOLI/Egas Cristóvão

DILI, 14 outubru 2021 (TATOLI)– Ekipa konjuta resensiamentu eleitorál iha diáspora konsege rejista ona votante hamutuk 367 hosi nasaun Portugál, Korea Súl no Reinu Unidu.

“Ita nia ekipa resensiamentu iha nasaun tolu. Durante loron 10 ona ekipa sira halo serbisu iha konsege rejista ona eleitór hamutuk 367, kompostu hosi votante foun na’in-16 no eleitór atualizadu na’in-351. Ekuantu ekipa seidauk ba Austrália tanba sei lockdown,” Diretór Jerál Sekretariadu Tékniku Administrasaun Eleitorál (STAE), Acilino Manuel Branco, hateten, ba Agência TATOLI iha edifísiu MNEK,Dili, kinta ne’e.

Timoroan iha diáspora ho inisiátiva partisipa másimu ba prosesu resensiamentu eleitorál tanba hakarak ezerse nia-direitu iha eleisaun Presidensiál 2022.

Maski, ekipa resensiamentu eleitorál iha diáspora hasoru difikuldade balun, maibé serbisu kontinua la’o di’ak.

“Iha duni difikuldade balun liuliu iha Reinu Unidu tanba diferente oras serbisu, maibé ekipa esforsu konsege rezolve no hadi’a ona,” nia akresenta.

Aleinde ne’e, ekipa konjuta mós hasoru difikuldade liña internet iha Timor-Leste, atu halo konesaun ho sistema iha rai li’ur.

Iha biban hanesan, Diretór Jerál Servisu Notariadu, Ministériu Justisa (MJ), Crisogno da Costa Neto, informa, delega mós funsionáriu na’in-12 atu kompleta ekipa konjuta ba halo resensiamentu eleiotrál iha diáspora.

“Ami nia prejensa atu halo kompleta tanba halo resensiamentu eleitorál ho rekizitu maka sertidaun moris, Billete Identidade (BI) no Pasaporte,” nia akresenta.

Notísia relevante: Ekipa konjuta resensiamentu eleitorál enfrenta difikuldade iha diáspora

Jornalista: Hortencio Sanchez

Editór: Florencio Miranda Ximenes

PUBLISIDADEiklan