Diretór Jerál Sekretariadu Tékniku Administrasaun Estatál, Acelino Manuel Branco. Imajen TATOLI/Egas Cristóvão

DILI, 25 outubru 2021 (TATOLI)–Diretór Jerál Sekretariadu Tékniku Administrasaun Eleitorál (STAE), Acelino Manuel Branco, hateten, daudaun ne’e ekipa resensiamentu sei haree posibilidade realiza Eleisaun Prezidensiál iha Austrália, iha loron marsu 2022 tanba sei haree aplikasaun lockdown liga ho pandemia COVID-19 iha rejiaun ne’e.

“Bainhira lockdown nafatin, ita labele to’o iha ne’ebá no labele realiza eleisaun tanba bulletin sira atu ba oinsá, bulletin votu prodús iha Dili mak lori bá, ne’ebé ita sei haree posibilidade tomak, karik resensiamentu agora la halo iha Austrália, maibé to’o eleisaun mak situasaun normál ona, mak bele realiza eleisaun. Tuir dadus, iha Austrália iha eleitór 1.486, enkuantu rekezitu mínimu sai sentru votasaun iha rai-liur tenke prenxidu eleitór 70 ba leten mak konsidera hanesan sentru votasaun ida, maibé depende filafali ba situasaun iha ne’ebá,” Diretór Ezekutivu STAE informa ba Agência TATOLI, iha ninia knaar fatin, Caicoli, segunda ne’e.

Tanba ne’e, ekipa konjunta kompostu hosi STAE, Komisaun Nasionál Eleisaun (CNE, sigla portugés) Servisu Notariadu no Ministériu Negósiu Estranjeiru no Kooperasaun (MNEK) seidauk bele desloka hodi atualiza dadus no dokumentu sidadaun timor-oan iha Austrália, enkuantu ba fatin seluk ne’ebé iha eleitór, ekipa desloka ona antes ne’e.

Notísia relevante: Ekipa resensiamentu eleitorál iha diáspora rejista votante 367  

Resensiamentu eleitorál no atualizasaun baze dadus daudaun ne’e la’o hela iha nível territóriu nasionál, Korea Súl, Portugal no Inglatera.

Maski nune’e, ekipa resensiementu preparadu, bainhira situasaun iha Austrália normál atu halo movimentu, tempu badak ekipa sei desloka hodi halo etendimentu ba sidadaun iha rai-li’ur.

“Ekipa ne’e konjunta, liuliu hosi parte STAE ajusta kuandu desloka, notariadu mós bele ba uluk tanba sira-nia serbisu ne’e importante atu garante sidadaun sira iha dokumentu atu ekipa STAE to’o ne’ebá bele halo atendimentu ba kartaun eleitorál,” nia akresenta.

Ba kestaun ne’e, parte STAE sempre halo kontaktu ho Reprezentante Timór iha Austrália no sira informa katak nasaun ne’e seidauk autoriza ema estranjeiru sira tama.

“Tanba ne’e, ekipa standby hodi haree, karik autoriza no ita bele tama kualker tempu, ekipa integradu sei desloka,” nia tenik.

Totál eleitór daudaun hamutuk 855.630, kompostu hosi mane 443.939 no feto 411.691, ne’ebé númeru ne’e inklui ona ho eleitór iha estranjeiru.

Jornalista : Antónia Gusmão

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here