Diretór Jerál STAE, Acilino Manuel Branco. Imajen TATOLI/Egas Cristóvão.

DILI, 19 janeiru 2022 (TATOLI)—Diretór Jerál Sekretariadu Tékniku Adminsitrasaun Eleitorál (STAE), Acilino Manuel Branco, hateten tanba pendemia COVID-19 ne’ebé iha posibilidade sei lahalo eleisaun iha Austrália maibé STAE sei estabelese sentru votasaun sia iha diáspora inklui iha Austrália.

Notísia Relevante: STAE sei atende eleitór ne’ebé kartaun eleitorál lakon no tohar

“Tuir ita-nia planu, estabelese sentru votasaun sia iha diáspora ne’e sei estabelese tolu iha Austrália mak ida iha Darwin, Sidney no Melbourne, depois ida monta iha Korea do Súl no sentru votasaun rua monta iha Portugál no tolu (3) seluk ami monta iha Londres, Peterborough no Oxford,” Acilino Manuel Branco hateten ba Agência Tatoli, iha nia knar fatin Vera Cruz, Dili, kuarta ne’e.

Bainhira to’o iha tempu mak dehan laiha posibilidade hanesan situasaun COVID-19 mak la halo eleisaun iha Austrália, entaun sentru votasaun tolu iha Austrália sei reforsa iha Reinu Unidu no Korea do Súl tanba tuir númeru eleitór sira-ne’ebé mak iha Reinu Unidu ne’e kuaze rihun 200-resin.

“Ida-ne’e, hanesan planu tentativa karik Aústralia la konsege realiza eleisaun iha ne’ebá tanba pandemia,” nia dehan.

Tuir territóriu iha rai-li’ur nian mak embaixada no konsoladu mak la taka dalan karik iha kontaktu ruma entre reprezentante tantu Estadu no Governu lokál iha ne’ebá mak fó autorizasaun para uza lori sai fatin ruma sai hosi husi embaixada, maibé dala ruma fatin mak ladún sufisiente hanesan iha Londres.

“Ita-boot sira hatene, momentu iha ne’ebá resensiamentu eleitorál ne’e iha partisipasaun ne’ebé aas iha ne’ebá labele akomoda entaun ne’e bele lori sai sentru ba li’ur, importante iha koordenasaun ho autorizasaun liu-liu autoridade hosi ne’ebá nian,” nia hateten.

Tanba ne’e, nia dehan, sei hasai karta no atu husu informasaun seluk ida lori hodi nomea pesoál sira-ne’ebé mak sei servisu iha sentru refere, tanba sé mak responsabiliza servisu ne’e diplomata karreira sira no sira-ne’ebé mak iha altura ne’ebá sai ofisiál resensiadora iha prosesu resensiamentu asume nu’udar brigada iha sentru votasaun iha ne’ebá.

Maibé ofisiál sira sei identifika nune’e halo rekrutamentu maibé uluk delegadu ne’ebé toma konta resensiamentu iha rai-li’ur mak sei sai brigada ka prezidente sentru votasaun iha ne’ebá.

Agora ofisiál sira seluk seidauk, tanba balun mandatu hotu ona no ajustamentu foun entaun to’o agora STAE mós seidauk hatene loos, sé mak sai brigada iha ne’ebá no STAE sei husu konfirmasaun iha Ministériu Negósiu Estranjeiru no Kooperasaun (MNEK).

Karik iha alternativu seluk ba eleisaun prezidensiál ne’ebé posibilidade la realiza iha Austrália, nia hatán, sei laiha alterantivu seluk ba prosesu eleisaun prezidensiál 2022 ne’e.

“Ita laiha alternativu ba eleisaun prezidensiál iha Austrália tanba baibain ita rona termu ida katak sekretu, livre no direitu katak ema ida labele reprezenta ema ida nia lian  tanba lian ne’e ema-na’in rasik mak bele ba ezerse ninia direitu votu iha sentru ka estasaun sira tanba prosesu ne’e mós la’o ho manuál,” nia dehan.

Tuir nia, tanba sentru votasaun sia entaun ema-na’in sia amak sei responsabiliza kada sentru votasaun no sentru votasaun ida iha estasaun 10, entaun kada estaun ida iha ema na’in-10 no totál hamutuk 90.

Nia informa, totál sentru votasaun iha territóriu nasionál inklui ho diáspora hamutuk 1.200.

Dadus resensiamentu eleitorál ba eleitór sira iha diaspora liu-liu iha Australia hamutuk 1.489, Korea do Súl 1.262, Irlandia 1.251, Portugál 762 no Reinu Unidu hamutuk 2.236.

Dadus provizóriu resensiamentu eleitorál no atualizasaun baze de dadus to’o novembru 2021 eleitór hamutuk 857.487 ne’ebé kompostu hosi Munisípiu Aileu 33.727, Ainaro 44.571, Baucau 95.142, Bobonaro iha 69,822, Covalima 47.935, Dili 190.750, Ermera 82.931, Lautém 48.297, Liquiça 50.965, Manatuto 35.422, Manufahi 40.308, Rejiaun Administrativa Espesiál Oé-Cusse Ambeno (RAEOA) 51.005 no munisípiu Viqueque hamutuk 59.612. 

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here