Provedora Direitus Umanu no Justisa, Jesuína Maria Ferreira Gomes. Imajen Tatoli/Antonio Goncalves

DILI, 11 dezembru 2020 (TATOLI)-Provedoria Diretu Umanu no Justisa (PDHJ) iha inísiu janeiru to’o dezembru  2020, simu no rejista keixa  hosi komunidade hamutuk 232. Hosi keixa sira-ne’e, iha kazu 80-resin kona-ba  violasaun direitu umanu ne’ebé maioria komete hosi membru Polísia Nasionál Timor-Leste (PNTL).

Notísia Relevante : Komisáriu Faustino hirus nia membru “tortura” povu

Provedora Jesuína Maria Ferreira Gomes, hateten, iha janeiru to’o dezembru, tinan ne’e, PDHJ simu keixa hamutuk  232.  Hosi kazu ne’e iha indikasaun ba violasaun direitu umanu no boa governasaun hanesan administrasaun ladi’ak, abuzu podér no prosesu ne’e PDHJ  loke ona investigasaun ba kazu 101 ne’ebé nia prosesu lao hela.

“Hosi keixa ne’e iha kazu 80-resin mak ho tipu  violasaun direitu umanu,  barak liu komete hosi autoridade seguransa ka membru PNTL  sira, liu-liu liga ba direitu liberdade  seguransa no integridade ka agresaun fízika ne’ebé membru seguransa sira halo hasoru komunidade iha terrenu iha atuasaun sira,’’ Provedora Jesuína Maria Ferreira Gomes, hateten hodi responde Agência Tatoli, ohin, hafoin partisipa iha semináriu nasionál komemorasaun loron internasionál direitu umanu iha salaun Ministériu Finansa, Dili.

Notísia Relevante : PNTL investiga ona Inspetór Polísia ne’ebé tortura família ida iha Mulo-Ainaro

Nia hatutan, atuasaun membru polísia nian ne’e  la tuir dekretu  lei 43/2011 rejime  jurídiku uza forsa.

Jesuína Maria, dehan durante ne’e PDHJ halo ona formasaun beibeik ba membru PNTL no F-FDTL  kona-ba direitu umanu  no formasaun ne’e atu  hasa’e sira-nia koñesimentu natoon hodi bele hala’o sira-nia kna’ar profisionál liu  iha atuasaun sira iha terrenu.

“Iha  formasaun ne’e iha membru PNTL balun  tuir ona, maibé ikus mai sira pratika nafatin, tanba ne’e presiza kontrolu no supervizaun hosi superior PNTL ba asaun ne’ebé membru sira halo iha terrenu no tenke hadi’a karater individual ho mentalidade,’’ Jesuína Maria Ferreira Gomes hateten.

Notísia Relevante : Investiga Ajente Polísia Baku Joven Ida iha Eskuadra Polísia Atabae

PDHJ mós iha nia estratéjia oinsá mak hala’o formasaun sira ne’ebé iha atu kontinua  hala’o nafatin tanba PDHJ nia formasaun foin kobre membru PNTL 403 no membru polísia iha totál  4000-liu.

Jesuína Maria mós konfirma katak, akontesimentu iha   kuarta kalan (09/12)  ne’ebé deskonfia oknun polísia balun tiru Alexandre da Crus  iha Ponte Comoro II to’o agora PDHJ seidauk simu keixa hosi vítima, maibé PDHJ mós sei foti inisiativa hodi halo  monitorizasaun  ba akontesimentu hodi rekolla informasaun sira.

Notísia Relevante : Deskonfia, Alexandre da Crus hetan tiru hosi polísia iha Ponte Comoro II

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here