DILI, 10 dezembru 2020 (TATOLI)- Komandante Jerál Polísia Nasionál Timor-Leste (PNTL), Komisáriu Faustino da Costa, hirus no lamentavel haree nia membru balun kontinua uza forsa hodi halo “torturasaun” hasoru povu bainhira atua problema ka konflitu ruma.
Notísia Relevante : Atuasaun polísia ba autór sunu sasán Cesta Bázika viola direitu umanu
“Polísia labele “tortura” ka uza forsa halo moras ema nia isin (tuku-tebe), tanba doutrina PNTL la hanorin ida ne’e,” Komisáriu Faustino da Costa, afirma iha ámbitu halo abertura ba semináriu nasionál ho Xefe Operasaun Munisípiu (XOM) no Xefe Operasaun Distritál (SOD), ohin, iha Sentru Formasaun Polísia, Comoro, Dili.
Nia “hirus” nia membru na’in-tolu ne’ebé “tortura” autór sunu Cesta Bázika, foin lalais ne’e, iha Postu Administrativu Lacluta, Munisípiu Viqueque.
Relasiona ho kazu ne’e, Komisáriu Faustino husu ba Xefe Operasaun Munisípiu no Xefe Operasaun Distritál (SOD) atu fó orientasaun ba membru-sira bainhira hala’o atuasaun ba konflitu tenke uza maneira prevensaun ne’ebé di’ak hodi hakotu problema ruma bainhira mosu iha terrenu.
Komandu PNTL rasik koordena ona ho Komandu PNTL Viqueque hodi halo ona prosesu investigasaun membru polísia na’in-tolu ne’ebé komete violasaun direitus umanus ne’e.
Jornalista: Eugénio Pereira
Editór: Francisco Simões
