Vítima Alexandre da Crus. Imajen Tatoli/Eugénio Pereira

DILI, 10 dezembru 2020 (TATOLI) – Juventude ida ho naran Alexandre da Crus tinan 30, deskonfia hetan tiru hosi oknum polísia ida hosi Eskuadra Polísia Aimutin, Don Aleixo, Dili.

Vítima Alexandre da Crus deklara nia parte hetan tiru, hafoin parte polísia Aimutin halo atuasaun ba problema tuda malu entre grupu juventude deskoñesidu iha área Ponte Comoro II, Dili, kuarta kalan (09/12).

Vítima Alexandre da Crus informa kronolojia membru PNTL losu pistola sai hosi kanotak hodi tiru direita ba vítima ne’ebé sa’e hela nia motór para iha estrada ibun kona nia kakorok parte liman loos borus ba karuk rezulta vítima monu kedas ba rai.

“Ami ho família ba hakoi mate iha Semitériu Becusse, fila mai to’o Ponte foun Comoro II nian derrepente grupu balun tuda hasoru ami rezulta joven na’in-tolu kanek maka’as, depois polísia na’in-haat ho karreta ida mai atua iha fatin akontesimentu hodi haruka ami fila, ami mós fila foin liu metru 50 polísia mai foti pistola tiru mai kedas kona ha’u nia kakorok,” Alexandre haktuir ba jornalista-sira iha nia hela fatin, Bairru Luro-Mata, Dili, ohin.

Nia haktuir, komu raan sai makas nia mós tuur no monu ba rai, depois kolega sira haree  nia kotuk no kakorok bola musan borus kanek boot loos.

Hafoin tiru kanek vítima, oknum membru polísia ne’e tenta hakbesik ba vítima hodi haree vítima nia kanek, maibé membru ho nia kolega na’in-tolu rejeita atu tula vítima ba ospitál hodi halo tratamentu saúde no parte família rasik maka tula fali vítima ho motór hodi lori ba halo tratamentu intensivu iha Sentru Saúde Comoro.

Vítima Alexandre hatutan, nia la hatene membru polísia ne’e nia naran, maibé nia parte koñese didi’ak membru polísia ne’ebé deskonfia tiru kanek nia.

“Membru polísia ne’e tiru tiha nia tun mai haree fatin ne’ebé nia tiru. Maibé nia dehan fali kanek ne’e la’ós pistola mak kona, no nia dehan fali kalén mak lees, depois dehan atu lori ha’u ba ospitál, ikus mai sira dehan karreta aat no la tula ha’u ba ospitál no família-sira maka tula fali ha’u ba ospitál. Ha’u la hatene membru ne’e nia naran, maibé ha’u lembra maun ne’e nia oin,” vítima hateten.

Vítima husu ba Komandu Jerál PNTL atu loke investigasaun ba kazu ne’e no prosesa oknum polísia ne’e tuir lei PNTL nian.

Hafoin halo tiha konferénsia imprensa, família lori kedas vítima ba hato’o keixa iha Servisu Investigasaun Kriminál SIK-PNTL, Provedoria Direitu Umanu no Justisa (PDHJ) no Organizasaun Naun Governmental sira ne’ebé servisu ba Direitu Umanu.

Iha parte seluk, Segundu Komandante PNTL, Superintendente Euclides Belo rejeita deklarasaun vítima dehan oknum membru PNTL Aimutin maka tiru kanek vítima.

Euclides dehan, konflitu tuda malu entre grupu deskoñesidu ne’e akontese antes ona no rezulta grupu joven balun kanek no parte PNTL to’o fatin akontesimentu hodi akalma de’it situasaun.

“Informasaun ne’e laloos, la’ós polísia maka tiru, tanba membru sira ba halo atuasaun tuda malu ne’e akontese rezulta ona vítima balun kanek maka polísia foin to’o ba akalma situasaun. Se dehan polísia maka tiru, vítima tenke aprezenta rezultadu ezaminasaun teste médiku mai maka ita foin bele justifika vítima nia kanek ne’e oinsá,” dehan Euclides Belo ba Agência Tatoli via telefone.

Euclides husu ba parte vítima tenke aprezenta keixa ho rezultadu teste médiku nian atu justifika ninia deklarasaun hodi labele akuza membru PNTL sira.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here