Logotipu PNTL

DILI, 08 jullu 2020 (TATOLI)- Komandu Polísia Nasionál Timor-Leste (PNTL) liuhosi Seksaun Departamentu Justisa loke ona prosesu investigasaun profunda ba kazu agresaun fíziku ne’ebé komete hosi Ajente Polísia nian ida ho inisiál F hasoru joven ida iha Eskuadra Polísia Postu Administrativu Atabae, Munisípiu Bobonaro, sábadu (04/07/2020).

Notísia Relevante : Komandu PNTL Kondena Aktu Ajente Polísia Ida Baku Joven Ida iha Atabae

Agresaun fíziku no kontra direitu umanu ne’e, ohin loron, viral iha rede sosiál Facebook, ne’ebé deskonfia Ajente Polísia inisiál F mak halo gravasaun rasik iha video telemovel  nian  ho durasaun minutu 0:37 ne’e hatudu Ajente Polísia  ne’ebé tenke tane lema “SERVIR E PROTEGER”,  tuku no tebe juventude ho inisiál AB bainhira halo detensaun ba AB iha Eskuadra Polísia Atabae.

Superintendente Xefe Arnaldo de Jesus Almeida D.C. Araújo, seksaun relasaun públika PNTL, ohin, informa ba jornalista sira katak Seksaun Departamentu Justisa Komandu PNTL sei prosesu Ajente Polísia F ne’ebé halo agresaun fíziku hasoru joven BA tuir lei dixiplinár PNTL nian.

Superintendente Xefe, Arnaldo klarifika kazu ne’e akontese iha ámbitu kazu asaltu malu entre grupu rua iha Suku Gisu-Loes, Postu Administrativu Maubara, Munisipiu Liquiça.

Arnaldo Araújo haktuir, iha asaltu malu entre grupu rua ne’e, rezulta vítima ida kanek, nune’e Ajente F  ne’ebé asiste mós akontesimentu halo kedas atuasaun hodi akalma situasaun ne’e, hodi duni tuir suspeitu BA too kaer ikus mai lori ba Eskuadra Polísia Atabae atu foti deklarasaun, maibé Ajente Polísia  ne’e halo fali atuasaun baku no tebe BA iha Eskuadra laran.

“Membru ne’e halo duni atuasaun la tuir regulamentu dixiplinár PNTL nian, ho razaun baku suspeitu ne’e dehan katak, nia duni ema ne’e nia kolen ho emosaun maka nia halo asaun la tuir lei haruka,” esklarese  Arnaldo Araújo, liuhosi konferénsia imprensa iha Kuartél Jerál PNTL, Caicoli, Dili.

Arnaldo hatutan, vídeo sirkula iha rede sosiál Facebook ne’e Ajente Polísia F rasik maka halo uza nia telefone  no daudaun ne’e Komandu PNTL kontaktu ona Komandu PNTL Bobonaro atu aprezenta relatóriu mai Komandu PNTL iha tempu besik.

Parte Komandu PNTL mós husu ba vítima no família vítima atu koopera ho PNTL hodi rezolve problema tuir lei dixiplinár PNTL nian.

Juventude ho inisiál BA mós nu’udar suspeitu ida ne’ebé daudaun ne’e PNTL Postu Administrativu Maubara halo ona investigasaun hodi detein nia iha sela detensaun  polísia, tanba deskonfia envolve iha kazu konfrontu ne’ebé akontese iha Suku Gisu, Loes nian.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here