Portavós PNTL Superintendente Xefe, Arnaldo de Araújo. Imajen Tatoli/Eugénio Pereira

DILI, 23 novembru 2020 (TATOLI)- Komandante Jerál Polísia Nasionál Timor-Leste (PNTL), Komisáriu Faustino da Costa, hatún ona despaixu ba ekipa investigasaun hodi loke investigasaun ba Inspetór Polísia ida ho inisiál MS ne’ebé lori pistola halo ameasa no torturasaun ba família uma-kain ida iha  Aldeia Mulo, Suku Mulo, Postu Administrativu Hatu-Builico, Munisípiu Ainaro.

Notísia Relevante : Inspetór polísia ida baku família ida iha Mulo

Portavós Komandu Jerál PNTL, Superintendente Xefe, Arnaldo de Araújo, rekoñese Inspetór Polísia MS nu’udar membru polísia ida ne’ebé ativu halo servisu iha Komandu Jerál PNTL.

“Ha’u bele dehan katak, kazu ida ne’e membru PNTL servisu kedas duni iha Komandu Jerál PNTL, ninia kazu notifika ona ba komandante jerál, ita hein katak, despaxu komandante jerál nian atu ba ne’ebé, sei hala’o hela investigasaun,” portavós PNTL Superintendente Xefe, Arnaldo de Araújo informa ba jornalista, ohin, iha Komandu Jerál PNTL, Caicoli, Dili.

Komandu PNTL seidauk bele fó sai rezulta investigasaun hosi motivu loloos membru ne’e halo torturasaun ba vítima Gabriel da Cruz ho nia kaben Domingas P.A. Sarmento no nia oan-mane Vicente Caldas Sarmento da Cruz.

Kazu ne’e akontese iha 09 novembru 2020, tuku 12:00 Otl.  Suspeitu membru polísia MS ho nia kolega na’in-tolu ho karreta Hilux metan ida halo asaltu ba vítima nia uma iha Mulo.

Jornalista: Eugénio Pereira

Editór: Francisco Simões

HAKEREK NO HATÁN

Please enter your comment!
Please enter your name here