Komandante Ein-Xefe FALINTIL, Kay Rala Xanana Gusmão hakuak malu ho ninia soldadu FALINTIL, Adolfo Silva “Lapoun” iha Suku Liurai, Postu Administrativu Remaxio, Munisípiu Aileu, sábadu (30/05/2020).Imajen/Eugenio Pereira

AILEU, 31 maiu 2020 (TATOLI) – Hafoin tinan-40 liu, husik hela sira-nia “ain-le’ut” gerrilla nian no husik hela soldadu FALINTIL balun iha Suku Liurai, Postu Administrativu Remexio, Munisípiu Aileu, sábadu  (30/05/2020), Komandante Ein-Xefe FALINTIL, Kay Rala Xanana Gusmão, hasoru fila-fali nia soldadu FALINTIL balun, hanesan Adolfo Silva “Lapoun” hodi hanoin hikas  ka “nostalgia” fali kona-ba tempu susar nia laran luta kontra okupasaun indonézia iha tinan-24 nia laran liu-ba.

Notísia Relevante : Komandante Nicson Koñese Samba-Sembilan iha Marabia

Xanana Gusmão, orgullu tebes, hafoin tinan-40, mak nia foin hala’o fila-fali vizita ba fatin rezisténsia iha área Ai-kurus, Suku Liurai no hafodak tebes  hodi hasoru hikas ninia soldadu FALINTIL, Adolfo Silva “Lapoun.

Área Ai-kurus-Fohorai, Suku Liurai, kompostu  husi aldeia tolu; Koto-Morin, Laraluha ho Manu-Tani,  nu’udar área baliza ho Postu Laclo-Manatuto, hanesan mós fatin rezisténsia ida ne’ebé iha tinan-40 liubá Xanana komanda gerrilleiru FALINTIL kuaze na’in-70 hodi subar no foti povu nia hahán iha toos-laran hanesan, ai-farina, batar, talas no ai-han sira seluk, hodi sustenta moris  no kontinua organiza gerrilla kontra invazaun no aneksasaun rejime militár Indonézia nian ne’ebé lidera husi eis Prezidente Repúblika, matebian Soeharto.

Iha hasoru malu ho povu no soldadu FALINTIL “Lapoun” ne’e, Xanana fó lembra kona-ba istória rezisténsia ne’ebé hamriik iha tempu difisil hodi halakan lilin ba ukun-aan,  hahú husi Lorosa’e mai rai klaran Aileu, Same, Ainaro, Bobonaro, Suai too Oe-Cusse hodi buka tuir kuadru rezisténsia sira ne’ebé sei moris hodi hamoris baze rezisténsia.

“Husi tinan 1980 too mai 2020, ha’u konta tinan- 40 ona maka ha’u foin mai sama fali-ain iha Suku Liurai. Waooo, Waooo, katuas Adolfo Silva “Lapoun”, tinan-40 mak ita na’in-rua foin hasoru malu fali ne’e,”  hateten Xanana ho saudades forte  hasoru fali Soldadu FALINTIL Adolfo “Lapaun”.

Xanana nia vizita ba Suku Liurai  ho intensaun atu halo asaun solidariedade ho populasaun sira ne’ebé moris susar tebes iha situasaun estadu emerjénsia durante estadu foku luta kontra propagasaun surtu Coronavirus ka COVID-19.

Xanana ho hakuak no rei nia “funu maluk”, Adolfo “Lapoun” nia reen-toos, hanesan aman no oan ne’ebé fahe-malu tinan barak foin hasoru malu fali.

Iha tempu funu nia-laran, Xanana lori gerrilleiru  na’in-70 konta ho nia, na’in-71, ne’ebé haleu Timor-Leste falta ema na’in rua de’it mak sei moris, ida mak Xanana no eskolta ida agora hela iha Lospalos.

“Iha funu ne’e, ha’u lori kompaña-ida (Destakamentu Ligasaun Nasionál), ami na’in-71 no  ami sira  na’in-71 ne’e, agora ne’e rua de’it maka moris, ida maka ha’u (Xanana) ho ha’u nia eskolta ida agora iha Lospalos, sira seluk mate hotu ona. Ha’u konta la’ós gabasola-aan, mais iha Timor ha’u nia ain-fatin mak la’o barak, inimigu hurulele ami too sapatu naklees no la’o ain-tanan de’it,” Xanana konta-tuir ho hamnasa.

Xanana haktuir, iha área Ai-kurus sira la’o ba mai Aileu hodi transmite mensajen ba gerrilleiru sira ne’ebé sei moris atu kontinua reorganiza ba luta too konferénsia fulan Marsu tinan 1981 iha Laline.

Konferénsia ne’e rasik, Xanana konsidera istóriku no importante tebes hodi prepara hasoru funu ne’ebé hahú iha 1975. Tanba too tinan 1976 maka Konsellu Lautém sai nu’udar setór polítika-militár ho naran Ponta Leste ne’ebé lidera husi Saudozu Sera Key, no Adjuntu Mahunu, Solan no Xanana hodi sira hahú luta husi Ponta Leste.

Iha Ponta Leste, Xanana komanda iha gerrilla Baucau ho Taur Matan Ruak, ba Viqueque, no iha funu naruk ne’e inimigu sira halo operasaun serku no anikilamentu halo forsa no povu barak mate hamlaha.

Ho situasaun ida susar tebes  ne’e, Xanana ho soldadu na’in-70 retira mai subar iha foho no fatuk kuak ai-laran iha Ai-kurus ba too Ermera, Ainaro, Bobonaro nian.

“Iha tinan 1978, inimigu ataka maka’as ona iha Matebian, ami halai runguranga, ami liu mai iha área Ai-kurus, buka gerrilleiru sira seluk, mais too iha ne’e, maka Tentara Nasional Indonesia (TNI) Batalliaun-744 ho 745 serku  ami too tiru malu maka’as tebes, too ami hasees fali ba Laclo tun ba Ilimanu no fila ba Same, Ainaro, Ermera no Liquiça, Bobonaro too Suai, buka nafatin ita-nia funu-maluk sira,” haktuir Xanana.

Iha serku inimigu nian-ne’e, Xanana dehan, Saudozu Jaime Ribeiro “Samba-Sembilan” ho gerrilleiru, Pasqual Ximenes “Nicson”, Saudozu “Laloran”, Ernesto “Dudu”, Lourenco “Aquito” José Cabral no seluk-tan halo asaltu ba inimigu sira iha Marabia-Dare, depois sees ba Turiscai no Ai-kurus-Remaxio.

“Samba Sembilan ho komandante balun sira maka asalta tiha Marabia,  inimigu tiru maka’as ho aviaun hurulele, ami halai subar sorte duut naruk, sira la haree ami too mota-laran halai ho ain-tanan ba Manatuto liu ba Waimori,” tenik Xanana.

Iha Ai-kurus no fatin seluk ne’e maka Samba Sembilan ho Komandante “Maucaru 305”, Pascual Ximenes Pereira “Nicson”, Rojas Koosusu, Komandante Railakan kontinua hamutuk  hodi buka dalan ba too Aitana hodi hale’u Timor hasoru mós Falu Thxai, Koro Asu, Mau Velis, Konis Santana, Dinis Carvalho, Raja Miguel, Sakin Nera, Harin, Nere, Holly Natxa, Kapulau, Lere Anan Timor mai too Baucau, hetan Cornelio Gama “L-7” ka Eli Fohorai Boot,  no sira seluk tan ne’ebé balun mate no balun sei moris.

Xanana fó sasin tan katak, iha ona loron 31  dezembru, maka Nicolau Lobato  bolu nia (Xanana-red) ho Juvenal Inacio Sera Key akompaña Nicolau Lobato ba too Same hodi kontaktu Rogério Lobato, hodi buka apoiu kilat husi Mozambique, maibé arraska  transporte la iha atu tula kilat mai Timor-Leste, no liu tiha semana ida Nicolau Lobato fó orden ba nia (Xanana) ho ekipa Comite Central FRETILIN (CCF) hodi kontinua namkari ba territóriu Timór, too tinan 1978 Nicolau Lobato hili oho-aan Mindelu-Aileu (última bala, a minha vitoria).

Notísia Relevante :  Minutu Ikus Nicolau Lobato “TATOLI” Ba Xanana

Iha altura ne’ebá Xanana sira iha hela Rejiaun Haksolok, sira liu fali ba foho Kablaki tun ba Same, no iha Ainaro rasik  iha tinan 1978 mak nia hasoru Komandante Ainaro-oan, Venancio Verras hodi organiza funu bele haluan sai ba fronteira Súl, Norte, Sentru Norte ba too Sentru Súl.

“Istória ne’e barak, ha’u konta hanesan ne’e para imi ki’ik-oan sira ne’e bele hatene ita-nia luta. Agora, imi foin-sa’e sira tenke ajuda katuas no ferik sira ne’e, tanba sira maka uluk fó no kee ai-farina, fehuk, kombili fó han ami. Agora, ami mai fahe netik saida maka ami iha atu konta istória ne’e, katak, ami la haluha sira-nia tulun iha situasaun difisil,” Xanana hateten.

Notísia Relevante : 1978, Xanana Organiza Ainaro Oan Kontinua Luta

Iha fatin hanesan, Veteranu Rezisténsia nu’udar soldadu FALINTIL, Adolfo Silva “Lapoun” dada lia ho Ajénsia Tatoli hodi hato’o agradese boot ba  vizita Komandante Ein-Xefe FALINTIL nian ne’e nu’udar onra boot hodi hatudu solidariedade ho domin ba povu no la haluha povu nia partisipasaun iha luta rezisténsia hamutuk ho FALINTIL.

“Ha’u kontente tebes ho Maun Xanana nia vizita, tanba liu tiha tinan barak, dezde uluk mai subar iha-ne’e, ami hamutuk, kolega balun mate ona, maibé maun Xanana bele mai nafatin hatudu nia kometimentu no dedikasaun ba rai ida-ne’e no nia luta ba rai-ida ne’e  sura la nahas,”  Lapoun hateten.

Nia hatutan, istória funu ne’ebé Xanana konta nu’udar impresaun ba povu Suku Liurai, liu-liu Aileu-oan tomak tenke hatene katak, dezde funu 1975, Aileu sai baze ba konsentrasaun forsa FALINTIL ne’ebé Komanda husi Saudozu Nicolau Lobato no to’o  Xanana hatutan hodi lori vitória ba povu Timor-Leste nia auto determinasaun (ukun rasik-aan).

Figura Karizmátiku Xanana rasik rekoñese, funu naruk ne’e FALINTIL barak subar iha povu nia uma no foti povu nia hahán iha toos hodi sustenta moris no sustenta funu, tanba ne’e, ohin loron, povu sira moris susar iha tempu situasaun Estadu Emerjénsia hasoru ameasa surtu COVID-19, nu’udar Timoroan fó apoiu tuir nia kbiit hodi agradese ba povu.

Notísia Relevante : Xanana Agradese Ba Povu Salva FALINTIL

Tuir istória, molok Saudozu Konis Santana mate, nia rasik husu ba Xanana ho gerrilleiru FALINTIL katak, bainhira  Timor-Leste ukun-aan, membru FALINTIL sira atu la’o hale’u Timor-Leste hodi husu deskulpa ba povu no rekoñese povu nia luta  tuir lema FALINTIL nian, “Povu Mak Bee, FALINTIL Maka Ikan” nu’udar relasaun emosionál FALINTIL no povu  hodi ajuda ai-han, ajuda kura soldadu FALINTIL sira nia isin kanek no subar soldadu FALINTIL iha ai-laran mai to’o vila-laran to’o povu ho juventude balun fó aan ba mate.

Jornalista  : Eugénio Pereira

Editór        : Francisco Simões

1 KOMENTÁRIU

  1. Hakruk no respeitu, ba Funu nain sira hotu,
    Povu mak we’e, funu nain sira mak Ikan iha tempu okupasaun indonezia, agr lideransa sira mak tenke sai we’e, no povu mak ikan iha ita nia ukun an ida ne’e,, Viva Asu Wain FALINTIL, iha tempu povu hlerik no susar, sira prejiza tbs ema seluk nia tulun,,,
    Obrigadu ba pajina ne, ble le istoria ituan hosi ita nia funu nain sira,, abrasu
    Nafatin sucesu🙏🙏

HAKEREK NO HATÁN

Please enter your comment!
Please enter your name here