Komunidade Soibada-Manatuto tau banner hodi rekoñese Nicolau Lobato hahú prosesu funu no Kay Rala Xanana Gusmão hatutan too manan vitória Independénsia. Imajen/Eugénio Pereira

MANUFAHI, 17 agostu 2019 (TATOLI)- Hahú husi fulan abríl 1974, Timoroan sira organiza malu hodi hahú mehi atu hetan ukun rasik aan sai husi ukun kolónia Portugés. Mehi ne’e hamosu ideia pro-kontra, tanba ideolojia partidu polítiku halo partidu sira komesa soran malu, no UDT halo golpe iha Dili hodi FRETILIN mós halo kontra-golpe.

Notísia Relevante : Povu Manufahi Dada Bandeira CNRT iha Luak

Liuhusi komemorasaun festa konsulta populár ba dala-20 (30 agostu 1999-30 agostu 2019) ho prezensa misaun forsa INTERFET nian, 20 setembru 1999, Xanana hato’o nia mensajen ba povu Manufahi, katak, ho konflitu armada iha rai ne’e laran, ikus mai inimigu komesa lori funu tama hahú husi fronteira, mai ona okupa tan Atabae, nune’e FRETILIN halo proklamasaun unilaterál ba Independénsia, hodi hamosu Republica Demoratica de Timor-Leste (RDTL) iha loron 28 Novembru 1975.

Mehi ba Independénsia povu tomak, tenik Xanana iha nia mensajen, foin selebra ho kontente no alegria ho apoiu husi Governu Portugés, liu de’it semana ida monu fali ba dezastre tristeza boot, tanba funu tama sobu baze de apoiu Atabae too iha dadersán 7 dezembru 1975 no iha Dili hadeer no hakfodak tanba aviaun Indonézia semo hale’u sidade hodi soe parakedista.

Inimigu sira ho aviaun no tanki de Guerra no aviaun ataka makas hamutuk sidade Dili. Husi ne’e, Nicolau Lobato (saudozu) ho Comate Central FRETILIN (CCF) hakiduk ba Maubisse, tanba presaun boot husi inimigu.

Haree ba funu ida ne’e, Kay Rala Xanana Gusmão ne’ebé sai sasin importante konta katak, depois inimigu hadau Dili, nia ho António Carvalho Fera Lafaek iha hela Tibar ba hamutuk ho Diresaun da Luta.

Iha loron 31 fulan Dezembru maka Nicolau Lobato bolu Xanana ho Juvenal Inacio Sera Key akompaña Nicolau Lobato ba Same. Iha ne’ebá, ho Alarico Fernandes ne’ebé kaer Radiu Komunikasaun ho rai li’ur sira asiste oinsá Nicolau Lobato ko’alia ho Rogério Lobato, hodi husu kona-ba buka ajuda militár iha rai li’ur, tanba militár Timoroan sira iha kilat uitoan de’it no munisoens mós gasta barak ona no menus ba daudauk ona.

Xanana hateten, Rogério informa ba Nicolau Lobato susar tebe-tebes atu hetan ajuda militár, no hanesan Mozambique dehan, kilat uluk Portugés sira husik hela iha ne’ebá barak tebes, mais transporte atu tula mai Timor-Leste la iha.

Xanana, afirma katak, iha Same mós, fatin ne’ebé FRETILIN oho maluk UDT barak, Juvenal Inácio husu atu salva netik nia alin ida, mais la iha ema ida hatán ba nia. Nune’e sira fila ba Maubisse, Nicolau Lobato ho nia oin hatudu de’it preokupasaun ne’ebé boot tebes.  Nune’e, liu tiha semana ida ona maka Nicolau Lobato  bolu  hodi “TATOLI” (fó orden) ba Xanana ho membru Comite Central  FRETILIN sira atu kontinua luta hodi namkari ba rejiaun sira hotu iha Timor-Leste.

“Liu tiha semana ida, Nicolau bolu ami, membru Comite Central hotu, dehan ba ami atu namkari ba rejiaun sira hotu,” dehan Xanana liu husi mensajen selebrasaun festa Konsulta Populár ba dala 20 iha Luak- Don Boaventura, Manufahi, sesta (16/08/2019).

Depois simu tatoli ne’e, husi tempu ne’ebá, iha fatin hotu-hotu halo hela rezisténsia, maibé tuir de’it komandante sira idak-idak nia inisiativa. Iha ona fulan Maiu tinan 1976, maka akontese reuniaun iha Soibada hodi organiza Estrutura Rezisténsia no Luta Armada nian, tuir setores militares no Komisariadu Polítiku, Nune’e, Manufahi hola pare iha Sentru Súl.

Iha fulan Maiu, tinan 1977, depois de reuniaun Comite Central iha Laline, mosu problema iha nivel nasionál ne’ebé hada’et rai laran tomak, maibé inimigu mós hahú kedas ona ninia operasaun boot, hanaran Operasaun Serku no Anikilamentu ba Baze de Apoiu, iha ne’ebé ezije ho populasaun no forsa hakiduk no halo movimentu makas hodi mate hamlaha, moras no ho deskontrolu boot, ema barak mate tanba inimigu oho.

Momentu ne’ebá, Xanana fó sasin katak, inimigu hahú sobu husi Setór Fronteira Súl hakat ba Fronteira Norte, hafoin ba sobu Sentru Norte, hodi muda ninia operasaun ba Sentru Súl.

Tuir Xanana, setór hotu-hotu iha altura ne’ebá naksobu tui-tuir malu, ho situasaun difisil ne’e maka halo populasaun tomak iha nivel nasionál rende ka ema kaptura no kaer hotu, forsa mós rende, nune’e mós kuadru polítiku no militár balun mate no rende. Nune’e, inimigu bele hetan kontrolu totál ba vila tomak. Membru Superior Comite Central barak mate iha Rejiaun Sentru Súl inklui mós Nicolau Lobato.

Hahú husi tinan 1979 too tinan 1978, inimigu kontrola tomak ona populasaun, maibé ho neineik atividade klandestina mós book-an daudauk.

Iha tinan 1980, husi Ponte Leste, Xanana ho kampaña ida, ne’ebé hanaran Destakamentu Ligasaun Nasionál no sira halo esforsu aan ba too Sentru no Fronteira, hodi buka tuir kuadru no forsa ne’ebé namkari. Mai too duni Remexio, maibé la konsege hakat liu ba Fronteira Norte, tanba inimigu, ne’ebé buka tuir sira ne’ebé halo operasaun iha Dare no Marabia mak tahan tiha, hodi fila ba sentru no esforsu aan too duni Sentru Súl.

Iha ne’ebá mak konsege hetan Komandante Mer ho forsa lubuk ida maka sei reziste, no husi ne’ebá maka bele too ba Ainaro, hodi hasoru Komandante Venâncio Ferras

Nune’e, maka bele duni hala’o Konferénsia Nasionál iha Laline, iha fulan Marsu tinan 1981, atu reorganiza fila fali Frente Armada no Rezisténsia tomak, hodi kria Concelho Nacional de Resistênsia Maubere (CNRM).

Nicolau Hili Tiru Aan

“Iha ona 1987, ha’u komesa la’o atu hakat liu mai Rejiaun Haksolok. Ami hotu rona ona katak, Nocolau Lobato mate ona iha Mindelu. Atu hakat liu mai Same, ho mata dala rai na’in ne’ebé Komandante Briga de Choque, lori ami too mota-kuak laran ida, hodi hatudu katak, iha área ne’ebá mak Nicolau ho Forsa tama iha Serku inimigu-nia laran, hodi labele hakat hakiduk nem halai ba sorin-sorin. Nia mós dehan katak, iha ultimo momentu, Nicolau hili tiru-aan hodi inimigu labele kaer nia moris,” Xanana konta.

Hafoin haree Nicolau Lobato nia fatin mate, sira liu ba foho Kablake, buka koñese foho ne’e tomak no halo kontaktu liu ba Ainaro, depois de husi Ainaro ba tiha Dili ho hela iha Matebian Acácio iha Cacaulidun, iha mós ligasaun ho matebian Luis Cardoso.

“Iha momentu difisil, ho inimigu aperta makas iha Dili, Akui Leong maka lori ha’u sai husi Dili, iha kaixote laran ida, no iha dalan klaran, ‘tentara’ Indonézia lubuk ida sa’e tan, hodi tuur iha ha’u nia leten too Aileu. Husi Aileu, Akui Leong lori ha’u ba Luis Cardoso nia uma, hodi lori liu ba foho, iha ne’ebá ha’u bele kontinua ha’u nia servisu. Ho aten-brani no determinasaun kuadru sira ne’e hotu, mak ajuda tebes ha’u halo servisu hodi kontinua eroi sira nia funu,” tenik nia.

Komandante ein-Xefe FALINTIL  ne’e fó hanoin ba foin-sae sira presiza hatene katak, luta tinan naruk ne’e hahú hetan naroman bainhira mosu ‘Kontaktu Dame’ ka Sesar-Fogu iha tinan 1983. Husi Ponta-Leste maka Xanana hakat ba Sentru, hasoru membru Comite Central atu bele aprova kontaktu ho ofisial militár no konkorda kona-ba objetivu Rezisténsia nian.

Iha kontaktu ne’e, Xanana aprezenta ba Governu Indonézia, liu husi Koronél Porwanto  maka Negosiasaun ba Solusaun Pasifika hodi rezolve problema Timor-Leste nian.

Dalan ba Negosiasaun ne’ebé Komandu da Luta propoin ba Estadu Indonézia atu haree liu maka hanesan:

  • Envolve Nasoins Unidas nian, hodi buka halibur Portugál, nu’udar poténsia Administrate, ho Indonézia nu’udar poténsia okupante.
  • Envolvimentu forsa polítika hotu-hotu husi Timor-Leste, atu partisipa iha negosiasaun.
  • Referendu hodi fó ba povu oportunidade atu fó sai ba mundu kona-ba povu Timor-Leste nia direitu.
  • Husu mós envolvimentu internasionál iha prosesu ne’e.

Hafoin aprezenta proposta ne’e, CNRM hala’o nia knaar too 1998, hodi muda ba CNRT (Concelho Nacional da Resitêncai Timorense), iha Peniche, Portugál, halibur FRETILIN, UDT no partidu seluk.

Xanana rekoñese funu hahú tama husi loro monu ba lorosa’e, nune’e sira hamutuk ho gerrilleiru kontinua fali funu gerrilla hahú husi lorosa’e ba too loro monu too hodi hahú fila fali vitória independénsia.

Xanana dehan, iha ona tinan 1983 too mai 1999, povu Maubere hein kedas tinan 16 no ohin iha Manufahi no hahú kedas iha Munisípiu Lautem ho hanoin katak, povu tomak bele haksolok no halo reflesaun ba eventu boot ne’e.

Hakuak boot ba maluk sira tomak!. Kay Rala Xanana Gusmão

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here