Komandante Ein-Xefe FALINTIL, Kay Rala Xanana Gusmão. Imajen/Eugénio Pereira

COVALIMA, 20 agostu 2019 (TATOLI)-Komandante ein-Xefe FALINTIL, Kay Rala Xanana Gusmão, hato’o agradesimentu boot ba povu tomak, husi rai ulun to’o rai ikun, tasi feto to’o tasi mane, Oe-Cusse to’o Jaco, ne’ebé ho kondisoens no sofrimentu oioin fó apoiu no tulun hodi salva FALINTIL para kontinua luta to’o hetan independénsia.

Notísia Relevante : Covalima Konsidera Padre Nain Tolu Eroi Boot

Hafoin partisipa misa agradesimentu, estudante lori ai-funan ba tau iha Monumentu Masakre Setembru Negro 1999, Tersa (20/08/2019). Imajen/Eugénio Pereira

Liuhusi komemorasaun loron konsulta populár ba dala-20 (30 agostu 1999-30 agostu 2019) no prezensa forsa INTERFET iha Timor-Leste, 20 setembru 1999, Kay Rala Xanana Gusmão iha nia mensajen ba povu Covalima, afirma katak, bainhira FALINTIL sira moris iha ai-laran no fatuk ko’ak sofre hamlaha, povu mak lolo liman no povu mak prepara hahán no ai-moruk hodi salva FALINTIL.

“Iha ona tinan 1978, husi Ponta-Leste ha’u hakat liu mai Ainaro, hodi sa’e foho Ramelau no tun fali ba Zumalai nia leten (Lour). Ha’u nia grupu la liu gerrilleiru FALINTIL na’in  10. Bainhira hamlaha ona, ami tama toos ida, hodi fokit ai-fariña ruma hodi te’in. Liu tiha loron ida, populasaun mane tolu mosu iha ami nia fatin, hodi siak ami tanba ami ba husik hela sinais iha sira nia toos laran, hodi hansip sira haree karik bele baku no dadur sira. Ami hakfodak ho moe uitoan. Katuas ida dehan nune’e, “Oan sira, ami hatene imi mai husi dook, agora ita kombina, imi presiza ba de’it uma toos lori batar fulin ne’ebé ami rai hela iha ne’ebá. Maibé kuidadu labele halo ain- fatin, no sama arbiru de’it. Ami hakuak malu no hametin duni konviksaun povu nian katak, ema hotu- hotu partisipa iha funu,” hateten Xanana, ohin, iha nia mensajen ne’e iha ámbitu komemorasaun loron Konsulta Populár ne’ebé komisaun organizadora lee sai ba povu tomak iha misa agradesimentu iha Igreja Nossa Señora do Rosario Covalima.

Notísia Relevante : Festa Konsulta Populár iha Covalima La’o Ho Hakmatek

Iha kalan ne’e duni, tuir Xanana sira hela iha uma too ne’e maka Xanana akompaña no rona Radio katak, militár Indonézia sira kaer tiha ona lider movimentu Irian-Jaya nian.

“Kalan ne’e  duni, ha’u rona husi radio katak, Militár Indonézia sira kaer tiha ona lider movimentu Irian-Jaya nian….Ha’u nunka bele mehi katak, iha tinan 1992, ha’u bele hamutuk ho nian iha komarka Cipinang-Jakarta- Indonézia,” Xanana konta.

Ba povu Covalima, Bobonaro no Ainaro ne’ebé pertense ba Rigaun IV Xanana husu atu povu kontinua luta dala ida hamutuk lori povu no nasaun sai husi mukit liu husi ema hotu- hotu ninia kontribuisaun.

“Ohin iha Covalima, ita halo selebrasaun ba Konsulta Populár, ne’ebé hahú kedas ona iha loron 31 jullu, husi Munisípiu Lautem, ho hanoin katak, povu bele haksolok halo reflesaun ba eventu boot ne’e. Ha’u hakru’uk ba rai Lulik no Matebian sira hotu, la haluha ita nia eroi sira hotu ne’ebé ha’u labele temi ida por ida husi kuadru militár no polítika no mós kombatente FALINTIL Asuwa’in nian no populasaun hotu- hotu ne’ebé mate iha funu laran, imi rasik, maluk sira, labele haluha,” Xanana tenik.

Veteranu Regiaun IV Munisípiu Covalima, Francisco Doutel Sarmento “Lamesak” no Veteranu Alvaro do Nascimento “Sesurai” liu husi reflesaun rekoñese Xanana nu’udar abut husi istória ba prosesu tomak ne’ebé organiza FALINTIL luta ho povu too termina iha votasaun konsulta populár loron 30 agostu 1999.

Jornalista             : Eugénio Pereira

Editór                  : Francisco Simões

HAKEREK NO HATÁN

Please enter your comment!
Please enter your name here