Militár Indonézia entrega hikas kilat no ekipamentu militár ne’ebé uluk Xanana uza durante funu tinan 24, hafoin Timor-Leste no Indonézia Dame malu. Imajen/Eugénio Pereira

AINARO, 16 agostu 2019 (TATOLI)- Komandante ein-Xefe FALINTIL, Kay Rala Xanana Gusmão, konta nia hahú organiza fila fali asuwa’in rezisténsia Ainaro oan sira hodi brani kontinua luta hasoru inimigu hahú iha tinan 1978.

Notísia Relevante : Lia Na’in Ainaro Hamulak Ba Dame

Povu ainaro kari ai-funan no sunu lilin iba Osáriu hodi komemora loron konsulta populár. Imajen/Eugénio Pereira

Xanana konta, depois fulan Abril 1974, Timoroan sira organiza aan tuir sira nia hanoin ba futuru Timor Lorosa’e nian, hodi nune’e polítika maka lao makas iha rai laran too mosu idea Kontradisaun  iha ideolojia halo partidu sira komesa soran malu, no UDT halo golpe iha Dili, hodi FRETILIN halo fali kontra- golpe.

Depois de konflitu armadu ne’e, Xanana hateten, inimigu komesa tama iha fronteira no okupa tiha Atabae, nune’e FRETILIN halo proklamasaun unilateral ba Independénsia, hodi hamosu RDTL iha loron 28 Novembru 1975.

Depois liu semana ida, iha dadersán loron 7 fulan Dezembru 1975, Dili hadeer ho hakfodak tanba aviaun Indonézia semo hale’u sidade hodi soe parakedista. Husi tempu ne’ebá, iha fatin hotu-hotu hala’o hela rezisténsia, maibé tuir de’it komandante sira idak-idak nia inisiativa.

Xanana lia tun, iha ona fulan Maiu tinan 1976, maka akontese reuniaun iha Soibada, hodi organiza Estrutura Rezisténsia no Luta Armada nian, tuir Setór militár no komisáriu polítika. Nune’e, Ainaro hola parte iha setór Fronteira Súl hamutuk ho Covalima no Bobonaro.

Liu husi nia mensajen ba loron konsulta populár ba dala-20 iha Munisípiu Ainaro, kinta (15/08/2019), Komandante Ein-Xefe FALINTIL, Kay Rala  Xanana Gusmão dehan,  iha fulan Maiu 1977, depois reuniaun Komité Sentrál, iha Laline, mosu problema iha nivel nasionál, ne’ebé hada’et ba rai laran tomak. Maibé, inimigu mós hahú kedas ona anikilamentu ba baze de apoiu, iha ne’ebá ezije ba populasaun no forsa hakiduk no halo movimentu makas hodi mate hamlaha, moras no deskontrolu boot, ema barak mate tanba inimigu oho. Inimigu hahú sobu husi setór fronteira Súl ho hakat ba Fronteira Norte.

Iha altura ne’ebá, Xanana hatuir, setór hotu- hotu naksobu tui-tuir malu, ho situasaun difisil ne’e hotu maka populasaun tomak, iha nivel nasionál rende ka ema kaptura hotu. Populasaun ema kaer hotu, forsa mós rende. Nune’e mós kuadru polítiku no militár balu mate, balu rende hodi inimigu bele hetan kontrolu totál ba vila tomak.

Mezmu nune’e, tuir Xanana, neineik atividade klandestina bele bokan daudauk hodi fornese informasaun ba ai-laran bele simu informasaun hodi haruka ba rai li’ur.

Husi funu ne’e, iha tinan 1980, husi ponta Leste maka Xanana hamutuk ho kampaña ida ne’ebé hanaran Destakamentu Ligasaun Nasionál. Sira esforsu aan lao ba too Sentru no Fronteira, hodi buka tuir kuadru no forsa ne’ebé namkari. Too duni iha Remexio, maibé la konsege hakat liubá Fronteira Norte, tanba inimigu buka tuir sira ne’ebé halo operasaun iha Dare no Marabia mak tahan tiha, hodi fila ba sentru no esforsa aan too duni Fronteira Súl.

Iha ne’ebá maka Xanana konsege hetan duni Komandante Venancio Ferras, ne’ebé uluk, iha  fulan Agostu 1975 sira hamutuk atu ba simu kilat iha Kampaña Enjeñaria iha Taibessi, hodi halo guerrilla urbana, maibé tropa Portugeza prende tiha sira, lori kilat ba kuartél jenerál.

Xanana mós koñese didi’ak, Komandante Ferras ho ninia komandante sira seluk no forsa lubuk ida, maka sei reziste hela iha Ainaro.

Nune’e, husi tempu ba tempu sira hala’o duni Konferénsia Nasionál iha Laline, iha fulan Marsu 1981, atu reorganiza fali Frente Armada no Rezisténsia tomak, hodi kria Conselho Nacional de Resistencia Maubere (CNRM).

Organiza Ainaro Oan Luta

Entretantu iha Ainaro Xanana konta fatin ne’ebé marka iha memória rezisténsia nia nunka haluha nian maka área Bunaria.

“Iha ona 1987 mak ha’u la’o too Ainaru liu ba foho Ramelau hodi hateke tun ba Atsabe no husi foho lolon de’it, lao liu ba Bobonaro no ikus mai fali Zumalai leten hodi koñese di’ak liután ita nia rai doben no kontaktu ita nia populasaun sira,” dehan Xanana liu husi mensajen.

Nia hatutan, depois hasoru povu no asuwa’in sira, nia atu fila ba Alas, inimigu halo hela operasaun, hodi hakiduk mai tiha iha Bunaria, iha ne’ebé hala’o servisu ho kuadru iha vila laran hodi hametin organizasaun klandestina. Nune’e mak liga too Dili hodi Constâncio Pinto ho kuadru sira seluk bele organiza Jornalista Robert Doom ba entrevista ha’u iha ai laran, iha ne’ebá ha’u denunsia kedas Austrália nian polítika immoral ne’ebé halo negosiasaun ho Indonézia atu asina Tratadu Timor Gap hodi fahe TL nia rikusoin.

Iha duni fatin ne’e mak Xanana hamutuk ho Armando ne’ebé moras hela sira dezeña bandeira FALINTIL ho nia lema no signifikadu sira.

“Tanba inimigu hatene  tiha ona katak, ha’u iha ne’ebá maka hahú daudauk ona operasaun serku ida ba ami, gerrilleiru na’in 10 ne’ebé fó seguransa ba ha’u. Nune’e, ami sai tiha husi ne’ebá atu hakat liu ba Ramelau, maibé too iha estrada, haree inimigu komesa avansa ona, no ami hakiduk, iha tuku neen dadeer, too iha kafé laran, tiru malu ho inimigu hodi gerrilleiru sira mate hotu iha ne’ebá, hodi fó fatin ba ha’u ho na’in rua mak sa’e rai lolon, maibé la liután inimigu okupa hotu foho leten. Ami na’in tolu ho katuas husi populasaun mak aguenta iha fatuk ida nia hun too kalan mak liu. Ami atu liu ba Bunaria, maibé inimigu okupa hotu foho lolon sira hodi tiru too mota,” Xanana konta.

Tri Sutrisno Husu Xanana Rende

Xanana no Tri Sutrisno hasoru mau iha Dili. Imajen/Eugénio Pereira

Iha duni subar fatin ne’e, maka Xanana haree Lider TNI, Tri Sutrisno ba ho elikópteru hodi aviza no bolu Xanana atu rende.

“Tri Sutrisno ba ho elikópteru hodi bolu ha’u atu rende. Depois kuaze semana ida, hemu de’it bee, mak katuas lori ami no ha’u ba subar iha Sorukraik. Kleur tiha iha ne’ebá, hodi hein inimigu para tiha ho operasaun maka ho kontaktu ne’ebé iha hela ho Dili, Gilman dos Santos ho polisia Augosto ba foti ha’u husi Ainaro mai too Dili pela primeira vez, dezde invazaun,” dehan Xanana.

Jornalista : Eugénio Pereira

Editór       : Francisco Simões

HAKEREK NO HATÁN

Please enter your comment!
Please enter your name here