Prezidente LFTL, Nilton Gusmão. Imajen Tatoli/dok.

DILI, 11 marsu 2020 (TATOLI)–Sekretáriu Estadu Juventude no Desportu (SEJD), Federasaun Futeból Timor-Leste (FFTL), ho Dirijente Liga Futeból Amadora (LFA), iha tersa (10/03/2020), halo ona soru-mutu ida hodi buka rezolve polémika ne’ebé mosu kona-ba LFA époka 2020 tenke integra ba FFTL nia okos.

Maibé, parte tolu la konsege konkorda malu hodi foti desizaun ida rezolve dizentendimentu ne’ebé mosu.

Notísia Relevante :FFTL Maka Sei Organiza LFA

Prezidente LFA, Nilton Gusmão, informa enkontru ne’e seidauk iha desizaun finál ida, tanba ne’e maka hosi parte LFA nian sei diskute asuntu ne’e iha kongresu LFA ne’ebé tuir planu sei hala’o durante fulan marsu 2020.

“Reuniaun ne’e ami seidauk bele dehan buat ida, ha’u mós atu dehan reuniaun hanesan ne’e loloos akontese kle’ur ona ami mai dala rua FFTL sira la mai, maibé ohin ita haree sira mai, maibé seidauk iha solusaun ruma iha reuniaun ne’e. Ami sei fila ko’alia hamutuk ho klube sira mak bele haree rezultadu oinsá,” tenik Nilton Gusmão ba jornalista sira iha edifísiu SEJD, tersa (10/03/2020).

Notísia Relevante :LFA Orgaun Independente

Kona-ba LFA atu submete ba FFTL, nia hatán desizaun hotu-hotu, membru ho estrutura Liga Futeból Amadora maka sei deside iha kongresu la’ós desizaun hosi Prezidente LFA nian.

“Ami sei hala’o kongresu iha tempu badak depois mak desizaun sei haree iha ne’ebá, maibé kooperasaun entre LFA no FFTL la’o di’ak tebes, FFTL mós fó kontribuisaun boot ba atividade liga nian liuliu époka ida foin daudaun liubá, maibé ida agora ita atu haree ne’e mak ida ba dookliu nian hanesan LFA tenke sai nafatin hanesan órgaun independente ida atu organiza atividade Liga,” nia esplika.

Notísia Relevante :LFA Relata Serbisu Époka 2019 ba SEJD

Iha fatin hanesan, Prezidente Federasaun Futeból Timor-Leste, Francisco Gerónimo hateten enkontru ne’e atu buka fó ideia ba malu hodi buka solusaun ba dizentendimentu entre parte tolu.

“Ami FFTL nia pozisaun hanesan ha’u ko’alia beibeik ona nakloke no koopera hamutuk ho parte hotu katak futeból iha Timor la’ós na’in de’it mak ami maibé na’in mak povu Timor tomak,” katak Francisco.

Notísia Relevante :LFA Époka 2020 Sei Hahú Abríl

“Rezultadu di’ak maibé seidauk pozitivu tanba LFA sira sei iha kongresu nune’e kestaun hirak-ne’e sira tenke lori hotu ba kongresu mak foin bele foti desizaun,” nia tenik tan.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here