Prezidente LFTL, Nilton Gusmão. Imajen Tatoli/dok.

DILI, 29 janeiru 2020 (TATOLI)–Iha kuarta ne’e, estrutura másima Liga Futeból Amadora (LFA) hala’o soru-mutuk ho Sekretáriu Estadu Juventude no Desportu, Nélio Isaac Sarmento hodi relata serbisu liga nian durante époka 2019.

Aleinde relatóriu 2019, LFA mós relata planu no programa ba époka 2020 nian karik iha kongresu mai ne’e sira kontinua lidera LFA.

“Ohin reuniaun ne’e ami hosi ezekutivu LFA maka husu atu reuniaun ho Sekretáriu Estadu atu relata serbisu époka 2019 nian ne’ebé ami halo ona. Ami mós mai atu buka opiniaun hosi Sekretáriu Esadu nian atu haree époka sira tuirmai,” Prezidente LFA, Nilton Gusmão iha edifísiu Sekretaria Estadu Juventude no Desportu (SEJD), Lecidere, Dili, ohin.

Nia dehan, iha soru-mutuk ne’e hato’o mós preparasaun LFA nian ne’ebé sei realiza kongresu iha tempu besik.

Iha parte seluk, ko’alia kona-ba Governu nia kontribuisaun ne’ebé másima tebes ba LFA hodi hala’o atividade durante ne’e iha ne’ebé jogu hotu la’o iha ámbitu hakmatek.

“Iha enkontru ne’e ami mós diskute asuntu lubuk ida oinsá mak haree ba Estadu nia kontribuisaun ba Liga nia efetividade to’o iha ne’ebé,” nia dehan.

“Ita bele hetan apoiu hosi Governu maibé ha’u hanoin klube sira mós tenke iha responsabilidade ba utilizasaun ne’ebé maka Governu apoiu. Durante ne’e, problema boot liu ne’e maka problema relatóriu. Hanesan prezidente, ha’u husu klube sira atu disiplina liután hodi jere osan hirak ne’ebé Governu oferese,” Nilton tenik.

Jornalista: Hortençio Sanchez

Editór: Xisto Freitas

HAKEREK NO HATÁN

Please enter your comment!
Please enter your name here