Leovigildo Hornai ,Imajen/Antonio Goncalves

DILI, 29 fevereiru 2020 (TATOLI)-Eis Sekretáriu Estadu Juventude no Desportu (SEJD, Leovigildo Hornay hateten Liga Futeból Amadora (LFA) hanesan orgaun independente ho ninia estatutu rasik tanba ne’e maka  LFA labele submete ninia atividade sira  ba Governu  ho Federasaun Futeból Timor-Leste (FFTL) maka  organiza.

Eis-Governante fó ninia opiniaun ne’e relasiona ho pedidu hosi Sekretáriu Jerál FFTL, Nélio Izaak Sarmento foin lalais husu atu Liga Futeból Amadora 2020 fó ba FFTL maka hala’o.

Notísia Relevante :FFTL Maka Sei Organiza LFA

“Bainhira ita temi Liga nia naran amadora fazeadamente nia sei sae ba iha kualifika atu sai hanesan profesionál, agora tuir literatura no buat ne’ebé ha’u koñese liliu liga sira iha mundu badan liga ne’e órgaun independente nia iha estatutu rasik nia iha asembleia jerál no ezekutivu rasik no sei la hamrik iha Governu lá hamrik iha federasaun maibé nia só halo koordenasaun no kooperasaun ho orgaun sira temi ona ne’e,” dehan Leovigildo ba Agência TATOLI, via Messenger.

Nia dehan iha era reformasaun dadaun ne’e, Federation International Football Asosiation (FIFA) halo hodi moderniza no organiza didiak liga futeból sira hotu iha mundu atu nune’e labele iha konflitu  interese.

Notísia Relevante :FIFA ho FFTL Deskute Sistema Finanseiru

“Ezemplu iha Timor-Leste ita iha konfuzaun bo’ot tanba de’it FIFA hakarak halo subsídiu ba Federasaun Futeból Timor-Leste tanba durante ne’e sira laiha atividade, sira só halo de’it mak atividade eventuál sira entaun FIFA husu sira-nia responsabilidade hosi estrutura anteriór to’o estrutura atuál ne’e katak sira halo ona atividade saida ba osan ne’ebé FIFA oferese,”nia esplika tan.

Tanba ne’e maka LFA tenke hamrik mesak tuir regra FIFA, Asian Football Confederation (AFC) no FFTL nian.

Notísia Relevante :2020, FFTL Foku Kompetisaun Lokál

Leovigildo akresenta dadaun ne’e asesu ona estatutu liga futeból hosi Thailandia, Portugal, Japaun, Indonézia, Jerman, Inglaterra no Itália katak sira órgaun independente ho estatutu rasik.

Ho referénsia hosi nasaun seluk ne’e maka FFTL labele politiza atu organiza eventu ne’e maibé husik ba LFA atu implementa eventu desportu ne’e iha 2020.

Kogresu LFA iha fulan-marsu 2020 ne’e sei deskute kestaun ne’e, ajustamentu estatutu, hili estrutura foun no asuntu seluk tan.

Jornalista : Hortencio Sanchez

Editór       : Agapito dos Santos

HAKEREK NO HATÁN

Please enter your comment!
Please enter your name here