Primeiru-Ministru, Taur Matan Ruak. Imajen Tatoli/Egas Cristóvão

DILI, 29 jullu 2019 (TATOLI)—Primeiru-Ministru (PM), Taur Matan Ruak, hateten lei fó dalan atu membru seluk hosi Autoridade Rejiaun Administrativu Espesiál Oé-Cusse Ambeno (RAEOA) bele simu kna’ar interinamente lidera RAEOA to’o prezidente foun RAEOA toma pose.

Iha asuntu ida ne’e, Sekretáriu Rejionál Asuntu Edukasaun no Solidariedade Sosiál, Arsenio Paixão Bano maka provizoriamente sei lidera RAEOA durante loron atus ida ruanulu (120) hodi hein Governu nomea Prezidente RAEOA foun.

“Lei ko’alia ona bainhira mandatu Prezidente RAEOA nian ramata mak seidauk iha ema ruma atu troka, sei iha loron atus ida ruanulu (120) ema segundu iha ne’ebá bele lidera hela,” tenik PM Taur ba jornalista hafoin ramata sorumutu ho Presidente Repúblika, Francisco Guterres Lú Olo, iha Palásiu Prezidente Nicolau Lobato, Bairru Pite, Dili, ohin.

Lee mós:

Kona-ba Mandatu iha RAEOA, Alkatiri Hakerek Ona Karta ba PM Taur

Prezidente RAEOA Foun Liu De’it Hosi Deliberasaun KM

PN Sei Altera Artigu Rua Husi Lei RAEOA-ZEESM

PM Taur Apresia Alkatiri Lidera RAEOA

Relasiona ho prosesu Prezidente foun atu troka Prezidente RAEOA, Marí Alkatiri, Governu kria ona despaisu ida hodi forma Komisaun Tranzisaun nune’e iha tempu badak ekipa tranzisaun ne’e sei halo kontaktu ho RAEOA hodi halo transferénsia nune’e bele hatene uluk saida mak iha ne’ebá.

Bainhira jornalista tenta husu karik, ema ruma iha ona hodi troka atuál Prezidente RAEOA, Marí Alkatiri, maibé ema númeru ida iha Governu ne’e la fó komentáriu.

Prezidente RAEOA toma pose lidera RAEOA no Zona Espesiál Ekonomia Sosiál Merkadu  (ZEESM) iha 14 jullu tinan 2014 no mandatu ne’e sei ramata iha 31 jullu tinan ne’e.

Tuir estatutu RAEOA artigu 20 alínea 1 hateten bainhira Prezidente Autoridade labele hala’o nia kna’ar durante tempu badak, membru seluk hosi autoridade bele simu kna’ar ne’e tuir presedénsia.

Artigu 20 alínea 2 hateten karik fatin Prezidente Autoridade mamuk, prezidente autoridade tenke hetan nomeasaun loron 120, tuir artigu 19 alínea 1.

Artigu 20 alínea 3 deskreve bainhira ema ezerse kna’ar Prezidente Autoridade laiha, funsaun hirak ne’e sei hala’o interinamente tuir alínea 1 haruka, no informasaun kona-ba ida ne’e tenke to’o Primeiru-Ministru hodi aprova.

Entretantu, artigu 19 alínea 1 dehan Prezidente Autoridade, tenke timoroan, tenke iha idade liu tinan 35, tenke hetan nomeasaun hosi Prezidente Repúblika, tuir proposta hosi Primeiru-Ministru, no hetan mandatu tinan lima, ne’ebé bele hetan renovasaun tutuir malu.

Jornalista: Hortençio Sanchez

Editór: Xisto Freitas

1 KOMENTÁRIU

HAKEREK NO HATÁN

Please enter your comment!
Please enter your name here