Primeiru-Ministru, Taur Matan Ruak. Imajen/Egas Cristovão

DILI, 1 jullu 2019 (TATOLI)—Primeiru-Ministru (PM), Taur Matan Ruak, deklara nunka halo polítika kontra eis Primeiru-Ministru, Marí Alkatiri, ninia serbisu nu’udar Prezidente Autoridade Rejiaun Administrativa Espesiál Oé-Cusse Ambeno (RAEOA) maibé nia orgullu tanba serbisu sira ne’e di’ak tebes.

Xefe Governu ne’e hateten progresu iha Oé-Cusse hatudu ezemplu di’ak ida ba dezenvolvimentu ne’ebé mak sei kontinua la’o iha munisípiu sira seluk.

“Ha’u orgullu loos. Jatamente ida ne’e duni mak maun Marí tenki presiza halo duni,” tenik Taur iha Parlamentu Nasionál, segunda ne’e.

Nia hatutan, problema ne’ebé mak akontese iha Oé-Cusse buat ida normál tanba halo ona buat ruma iha Enklave.

“Maibé ema sira ne’ebé nunka hasoru problema ne’e mak sira ne’ebé toba hela de’it. Agora, papél governu nian mak sei buka dalan atu solusiona problema ne’ebé akontese iha RAEOA inklui iha munisípiu sira seluk,” akresenta Taur.

Sekretáriu Jerál partidu FRETILIN lidera RAEOA tanba hetan apoiu hosi líder istóriku sira seluk hanesan Kay Rala Xanana Gusmão inklu Primeiru-Ministru momentu asume kargu nu’udar Prezidente Republika.

Jornalista: Tomé Amado

Editór: Xisto Freitas

HAKEREK NO HATÁN

Please enter your comment!
Please enter your name here