Vise Prezidente Komisaun A ne'ebé trata asuntu Konstituisaun no Justisa, Francisco de Vasconcelos.

DILI, 03 jullu 2019 (TATOLI) – Vise Prezidente Komisaun A ne’ebé trata asuntu Konstitusionál no Justisa, Francisco de Vasconselhos, hateten, Parlamentu Nasionál (PN) sei altera artigu rua husi lei númeru 3/2014 kona-ba  estabelesimentu Rejiaun Administrativu Espesiál Oe-Cusse Ambeno (RAEOA) no Zona Espesiál Ekonomia Sosiál Merkadu (ZEESM).

“Ita halo alterasaun ba artigu rua de’it maka artigu 19 ho 21,” informa  Francisco de Vasconselhos, ba Ajénsia TATOLI, ohin, hafoin reuniaun Komisaun A iha Parlamentu Nasionál.

Iha artigu 19, PN sei altera kona-ba nomeasaun Prezidente Autoridade RAEOA-ZEESM la presiza Prezidente Repúblika maka nomeia, maibé tenke Primeiru-Ministru liuhusi desizaun Konsellu Ministru.

Iha artigu 21, sei altera lei kona-ba ezonerasaun tanba lei anterior permite Prezidente Repúblika maka ezonera, maibé alterasaun ne’e lei la’e, tanba atu halo mudansa tenke liuhusi avaliasaun serbisu husi Konsellu Ministru.

Nia hatutan, lei uluk ne’e Primeiru-Ministru haruka naran ba Prezidente Repúblika hodi nomeia hafoin fó posse, maibé agora, la’e, governu maka tenke haree naran no governu maka fó posse tanba RAEOA-ZEESM ne’e tutela ba governu sentrál.

Tuir nia katak Prezidente Repúblika hanesan ema ida rigor ho lei, kuandu nia haree kontradís ho lei, nia sei la fó posse, nune’e mandatu Prezidente Autoridade RAEOA-ZEESM, Mari Alkatiri, atu hotu ona tenke altera lei atu sé maka bele asume fali tenke liuhusi desizaun governu.

“Mandatu Prezidente RAEOA iha fulan ne’e hotu ona, nune’e maka ita halo armonizasaun ba lei ne’e,” hateten Deputadu Francisco de Vasconselhos.

Tanba ne’e iha lejizlativa da-lima ho governu atuál hakarak halo armonizasaun ba lei liuhusi polítika reforma lejizlativa no lei sira balun ne’ebé pertinente ne’ebé durante ne’e tama ona iha Komisaun A.

Komisaun A aprova ona no baixa ona ba plenária atu Prezidente PN tau ajenda, nune’e bele diskute ona kona-ba relatóriu lei númeru 3/2014 kona-ba  estabelesimentu RAEOA-ZEESM.

Jornalista      : Zezito Silva

Editór             : Francisco Simões

HAKEREK NO HATÁN

Please enter your comment!
Please enter your name here