Enkontru entre Primeiru-Ministru, Taur Matan Ruak no Prezidente Repúblika, Francisco Guterres Lú Olo. Imajen Mídia PR

DILI, 18 jullu 2019 (TATOLI)—Primeiru-Ministru (PM), Taur Matan Ruak, simu ona karta hosi Prezidente Rejiaun Administrativa Espesiál Oé-Cusse Ambeno (RAEOA), Marí Alkatiri ne’ebé informa kona-bá mandatu iha RAEOA.

Primeiru-Ministru, Taur Matan Ruak informa asuntu ne’e, hafoin enkontru ho Prezidente Repúbika, Francisco Guterres Lú Olo iha Palásiu Prezidente Nicolau Lobato, Bairru Pité, Dili, ohin.

Xefe governu ne’e hateten, nia simu karta hosi Marí Alakatiri iha loron 15 fulan ne’e no iha konteúdu informa kona-ba mandatu sei ramata iha loron 30 fulan ne’e.

‘‘Marí Alkatiri hakerek ona karta ida ba ha’u iha loron 15 fulan ne’e, dehan, ninia mandatu ramata iha loron 31 fulan ne’e,’’ Taur informa.

Kona-ba kestaun ne’e, Primeiru-Ministru mós hakerek karta ida ba Prezidente Repúblika ho nia konteúdu katak laiha intensaun atu halo estensaun ba mandatu Marí Alkatiri iha RAEOA.

Nia hatutan, Prezidente Repúblika mós simu ona lei ne’ebé foin lalais ne’e Parlamentu Nasionál halo alterasaun, tanba ne’e Prezidente Repúblika sei estuda no kona-ba desizaun, Primeiru-Ministru hateten, hein de’it tanba kompeténsia tomak iha Prezidente Repúblika.

Revizaun ne’ebé Parlamentu Nasionál halo maka Lei númeru 3/2014 hodi hasai kna’ar Prezidente Repúblika ninian atu fó tomada pose ba Prezidente RAEOA-ZEESM.

Entertantu, enkontru prinsipál entre Primeiru-Ministru (PM), Taur Matan Ruak ho Prezidente Repúblika (PR), Francisco Guterres Lú Olo iha kuarta ne’e, informa kona-ba mandatu Prezidente Rejiaun Adminitrativa Espesiál Oé-Cusse Ambeno (RAEOA) no informa mós kona-ba tomada pose ba embaixadór foun sira ne’ebé atu ba hala’o misaun iha estranjeiru, inklui ko’alia Governu nia preparasaun ba orsamentu jerál Estadu (OJE) 2020.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here