Prezidente Komisaun B, Adérito Hugo da Costa. Imajen Tatoli/Egas Cristovão

DILI, 16 jullu 2019 (TATOLI)–Deputadu Bankada CNRT, Adérito Hugo da Costa hateten sé de’it mak reprezenta Governu Sentrál tenke liu mekanizmu ida ho liña  hosi koordenasaun direta hosi Xefe Governu sentrál, tanba Timor-Leste hanesan nasaun ho rejime unitáriu la’ós federál.

“Iha konteksu ida ne’e sé de’it mak reprezenta Governu sentrál atu sai Prezidente Rejiaun Administrativa Espesiál Oé-Cusse Ambeno (RAEOA), tenke deliberasaun úniku hosi Konsellu Ministru (KM) no pose hosi Primeiru Ministru (PM),” tenik Adérito ba Agência Tatoli iha resintu PN, tersa ne’e, relasiona ho artigu rua hosi Lei nú.3/2014 ne’ebé PN halo alterasaun mak artigu 19 ne’ebé koa’lia kona-ba mandatu Prezidente RAEOA no atigu 21 kona-ba ezenorasaun no renúnsia Prezidente Autoridade.

Tuir deputadu proponente ba alterasaun lei ne’e, Lei Kriasaun RAEOA-ZEESMS dezde eziste tinan 2014 to’o agora, Prezidente RAEOA propoin hosi Konsellu Ministru liuhosi deliberasaun Prezidente Repúblika (PR) mak fó pose, maibé hafoin implementa presiza altera tanba konsidera ba efetu organizasaun ne’ebé efetivu liu mak PM.

“Saida mak ami hanesan proponente observa durante implementasaun durante tinan lima, ami hanoin katak mekanizmu atu to’o Prezidente Repúblika (PR) ne’e hanesan mekanizmu ne’ebé la presiza, tanba Prezidente RAEOA  nível hanesan administradór,” Hugo esplika.

Nia dehan tan, iha Konstituisaun RDTL artigu 86, kompeténsia PR mak fó pose ba PM inklui membru governu sira, Prezidente Tribunál Rekursu (PTR), Prekuradór Jerál Repúblika  (PGR), Konsellu Superior Seguransa no membru sira.

“Konteksu ida ne’e, kuandu iha rejime liu-ba Lei Kriasaun RAEOA dezde 2014 aumenta kompeténsia ida ne’ebé iha konstituisan la prevé,” nia akresenta.

Nia rekoñese maske laiha ema ruma mak pronúnsia katak viola Konstituisaun, maibé deputadu proponente sira haree presiza altera para kompeténsia própriu PR mak entidade sira hanesan PM, PTR, PGR no seluk-tan, tanba ne’e Prezidente RAEOA tenke to’o de’it Governu liuhosi Xefe Governu.

Iha biban ne’e, nia fó razaun, alterasaun ne’e foin akontese tanba aproveita mandatu Prezidente Autoridade atu ramata iha loron 30 jullu no PM mós deklara ona katak sei la extende mandatu Prezidente RAEOA, Marí Alkatiri.

“Lejizladór sira iha Parlamentu Nasionál haree katak aleinde Prezidente RAEOA la extende, ita mós haree ba lejizlasaun ne’e oinsá no presiza altera buat ruma ka lae. Ida ne’e mak haree hodi altera”, nia katak.

Nia reforsa, ba alterasaun prinsipál Prezidente RAEOA, sé mak iha kompeténsia másimu hanesan superiór administrativa hosi Governu mak PM.

“Ami hanoin to’o de’it nível ida ne’e atu prosesu foti desizaun efetivu liu  no efisiensia, liliu efisiénsia iha liña koordenasaun entre Governu sentrál no  autoridade iha rejiaun sira,” Hugo esklarese.

Entretantu, alterasaun artigu rua ne’e aprovadu iha loron 8 jullu no manda ona ba Xefe Estadu atu halo análiza no promulga iha loron 30 nia laran.

Kontiúdu artigu 19 kona-ba mandatu Prezidente RAEOA, hosi Lei nú.3/2014 18 jullu ne’ebé sofre alterasaun mak Prezidente Autoridade, tenke sidadaun timoroan ho idade pelumenus tinan 35, nomeadu hosi Prezidente Repúblika, sob-proposta hosi Primeiru Ministru, ba mandatu tinan lima, ho renovável susesivamente.

Artigu hanesan maibé la sofre alterasaun (mantein) mak, Prezidente Autoridade tenke fiksa rezidénsia abituál iha territóriu nasionál no la impede durante ezerse mandatu, atividade privada ne’ebé kauza hosi konflitu interese bainhira ezersísiu iha ninia funsaun no toma pose, Prezidente Autoridade tenke aprezenta deklarasaun bens ne’ebé iha patrimóniu ba Tribunál Rekursu, atu bele sai hanesan sujeitu rejime jurídiku aplikável ba titulár órgaun soberania sira.

Enkuantu, kontiúdu artigu 21 ne’ebé sofre alterasaun mak Prezidente Autoridade ezoneradu, iha kazu admitidu, hosi Prezoidente Repúblika, sob-proposta hosi Primeiru Ministru.

No, ikus liu, iha artigu hanesan mak Prezidente Autoridade tenke renúnsia hosi kargu kuandu inkapasitadu atu dezempeña ninia funsaun, ho motivu moras grave ka razaun seluk hanesan auzénsia ho tempu naruk.

Jornalista: Evaristo Soares Martins

Editór: Xisto Freitas

 Notísia Relevante:

AMP Altera Lei RAEOA-ZEESM, Opozisaun La Partisipa Aprovasaun

Alterasaun Lei Númeru 3/2014, PM Mak Sei Pose Prezidente RAEOA

HAKEREK NO HATÁN

Please enter your comment!
Please enter your name here