Doutór Andrezinho Belo ho nia ekipa hosi SABEH hala’o tratamentu saúde ba komunidade kbiit laek no veteranu-sira iha Munisípiu Viqueque. Imajen/SABEH

DILI, 17 maiu 2022 (TATOLI)—Organizasaun Naun Govermentál (ONG) Saúde Ba Ema Hotu (SABEH), kontinua hatudu kompromisu ho voluntáriu fó tratamentu ka asisténsia saúde bázika ba komunidade sira iha territóriu tomak inklui veteranu na’in-577 hosi munisípiu 11.

Diretór Ezekutivu SABEH, Andrezinho Belo, informa iha tinan 2021 mai too horsehik, konsege fó asisténsia saúde ka konsulta ba veteran iha área remota liuliu iha munisípiu 11 na’in-577, hosi númeru ne’e maioria veterau la hetan asisténsia saúde hosi profisionál Saúde sira tanba dook hosi postu saúde.

Notísia relevante:  SABEH Kontinua Oferese Tratamentu Saúde Bázika ba  Komunidade ho Voluntária

Diretór Ezekutivu SABEH, doutór Andrezinho Belo konsulta hela veteranu Filipe de Jesus ‘Aslores’ ne’ebé sofre iha kotuk-laran no hirus-matan, tanba hetan baku husi forsa Indonézia sira iha tempu okupasaun. Imajen/TATOLI

SABEH hahú nia misaun iha tinan 2011 hodi oferese tratamentu saúde bázika ba komunidade liuliu sira ne’ebé la asesu tratamentu saúde iha sira-nia hela fatin ho gratuitu ka voluntáriu

Durante oferese tratamentu saúde bázika, SABEH mós identifika veteranu barak la hetan konsulta sira nia saúde tanba hela dook husi fasilidade saúde, nune’e SABEH hakbesik saúde hodi identifika sira-nia moras.

“Veteranu sira ne’ebé mak ita identifika sira-nia moras mak kilat musan barak sei iha sira-nia isin no barak mak moras ho termu médiku katak Sacrolumbalgia (moras iha kotuk laran) tanba uluk ema torturasaun ba sira ,” Diretór Ezekutivu ne’e  hateten ba Agência TATOLI iha nia knaar fatin kampaun Caicoli, segunda ne’e.

Doutór ne’e esplika banihira identifika sira-nia moras iha área remota mak ho kondisaun grave halo kedan koordenasaun ho Profisionál  Saúde iha Ospitál Referál hodi halo transferénsia mai iha Hospitál Nasionál  Guido Valadares (HNGV) hodi hetan tratamentu médiku espesiál.

Notísia relevante:  Veteranu Ermera Agradese SABEH-Prezidénsia Repúblika ba tratamentu saúde gratuita

Nune’e, iha tinan 2021 SABEH fó tratamemtu ba ema sira ne’ebé  iha área rurál husi munisípiu 11 hanesan Baucau, Bobonaro,  Dili, Viqueque, Lautem, Covalima, Ainaro, Aileu, Same,  Liquiça no Ermera no tuir planu sei ba fali Ataóro no Rejiaun Administrativa Espesiál Oé-Cusse no Ambeno (RAEOA) iha tempu badak.

“Tinan kotuk ne’e ita fó tratamentu saúde ba ema sira iha área remota ne’ebé mak dook husi fasilidade saúde entaun ami hakbesik saúde no konsulta sira hamutuk rihun-14-resin. No moras ne’ebé aas iha komunidade nia leet mak hanesan  moras Ispa, tensaun aas,  estomagu, moras kulit króniku, anemia,  lumbriga, má nutrisaun, no  tuberkoluze husi moras sira ne’e maioria labarik  idade 0- 17  inklui katuas ferik ne’ebé mak idade avansadu ona,”  nia esplika.

Doutór Andrezinho Belo ho ekipa bá vizita avó-feto ida ne’ebé mesak tau matan ba nia bei-oan na’in- tolu ne’ebé ho kondisaun defisiente durante tempu kleur ona. Imajen/SABEH

SABEH hanesan organizasaun ho profisionál saúde ne’ebé fó asisténsia saúde ho voluntáriu ba komunidade iha área remota. Profisionál saúde hamutuk 125, kompostu husi médiku, Enfermeiru, Parteira, Farmasista no Saúde Públika.

Hahú hosi janeiru too horisehik tinan ne’e, SABEH kontinua apoia vasina ba ema sira ne’ebé  seidauk vasina  doze dahuluk no  doze daruak  iha sentru saúde lima iha Dili laran hanesan Sentu saúde Becora, Formoza, Comoro, Vera-kruz no Metinaro.

Alende ne’e, hahú hosi fevereiru too agora SABEH fó tratramentu iha munisípiu tolu hanesan Viqueque Liquica no Covalima  hodi foka liu ba área remota ho populasaun hamutuk 3.375.

“Ita nia ekipamentu médiku sufisiente hodi fó tratamentu ba komunidade sira iha área rural,” nia afirma.

Notísia relevante:  Tinan 2020, SABEH Sei Hakbesik Saúde Ba Área Remota

Jornalista : Felicidade Ximenes

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here