iklan

NASIONÁL, HEADLINE, POLÍTIKA

Tinan 2020, SABEH Sei Hakbesik Saúde Ba Área Remota

Tinan 2020, SABEH Sei Hakbesik Saúde Ba Área Remota

Diretór Ezekutivu SABEH, doutór Andrezinho Belo hamutuk ho médiku voluntáriu sira hala'o konsulta no tratamentu ba veteranu inklui komunidade iha Suku Lisapat, Postu Administrativu Hatolia Zona B, Munisípiu Ermera. Imajen TATOLI /Cipriano Colo

DILI, 19 fevereiru 2020 (TATOLI)—Diretór Ezekutivu Organizasaun Naun Governamental (ONG) Saúde Ba Ema Hotu (SABEH), Andrezinho Belo, komprometidu atu lori Saúde hakbesik liután ba povu iha área remota.

“Komprimisiu SABEH ba tinan 2020, hakarak atu hadi’a liután serbisu iha área remota. La’ós ba dala ida de’it kada fulan maibé ba bebeik no kontinua ba hodi hala’o medical outreach ne’ebé tenke bazeia ba protokolu outreach ne’ebé kompostu husi buat haat hodi lori saúde besik liután ba povu iha área remota,” dehan Anderzinho Belo iha nia knaar fatin, ohin.

Nia esplika, buat haat hodi lori saúde besik liután ba povu iha área remota mak hanesan prezensa médiku iha komunidade, vizita domisiliária husi uma ba uma, promosaun saúde no desimina imformasaun kona-ba kualkér moras no kualkér situasaun ne’ebé hasoru durante hala’o tratamentu iha terrenu.

Kona-ba trajetu husi SABEH atu halo vizita iha tinan 2020, Andrezinho hatán, sei hala’o vizita ba fatin sira ne’ebé tama ona ajenda no planu atu vizita iha tinan kotuk maibé la konsege to’o iha nárea refere.

“Tanba ne’e iha tinan 2020, ami tenke ba vizita duni. Tanba, ho númeru pesoál voluntáriu ne’ebé aumenta barak tan de’it, ida ne’e hanesan rekursu boot ida ne’ebé ami bele fahe ba área sira ne’e, hodi kontinua hikas planu ne’ebé la konsege ezekuta iha tinan kotuk. Tinan ida ne’e, ami mós hakarak atu halo vizita fulan ida dala rua tanba tinan kotuk ami halo fulan ida dala ida de’it,” nia hateten.

Entretantu, nia informa, númeru voluntáriu ne’ebé aumenta iha tinan 2020 hamutuk ema na’in 56 hodi reforsa sira hirak ne’ebé anteriór hamutuk ema na’in 75 entaun daudaun ne’e sira hamutuk ema na’in 131 ona.

Nia dehan, SABEH mak grupu profisionál médiku ne’ebé maka la’o ba iha área remota sira iha Timor laran hodi fornese tratamentu médiku gratuita, promosaun saúde, no asisténsia jerál ba familia sira, inklui ai-han no ropa sira.

Fatin hirak ne’ebé SABEH vizita, tuir nia, baibain presiza la’o kuaze oras lima ka liu n dalaruma bele to’o oras sanulu.
Iha tinan kotuk, SABEH hala’o sira-nia serbisu iha Ermera no fó asisténsia médiku ba vítima sira ne’ebé maka hasoru ahi han rai, inklui fatin seluk tan ne’ebé serbisu hamutuk mós ho Prezidénte Repúblika.

Nia informa, SABEH realiza ona ninia Asembleia Jerál Ordináriu anuál dahuluk ne’ebé hala’o durante loron ida iha sábadu 15 fevereiru 2020 iha eidifisiu SABEH eskola Esternatu São José, Delta, Comoro.

Nia dehan, SABEH nia Asembleia Jerál Ordinária Anuál dahuluk partisipa husi membru, fundadór sira, Kolaboradór sénior sira, Kolaboradór juniór sira, doutór sira, enfermeiru sira, ofisiál saúde públika sira, no aliadu profisionál SABEH nian.

Membru sira ne’ebé partisipa Asembleia Jeral Ordinária Dahuluk mak habesan: Prezidente Asembleia Jerál no Prezidente Meza Asembleia Jerá, Emanuél Bráz, Vise-Prezidente Meza Asembleia Jerál, Jónio Fernandes, Prezidente Konsellu Administrasaun, Doutór Rui Maria de Araújo.

Diretor Ezekutivu Konsellu Administrasaun, Doutór Andrezinho Belo, Sekretária, Jorginha Martins, Prezidente Konsellu Fiskal, Lourdes Sangkop, Membru Konsellu Fiskál, Pedro Barreto, kollaboradór sira iha asuntu jurídiku Nuno Marrazes no Vera Querido, Asesór ba Jestaun, Carl Susuairara, Asesóra Finansas nian, Cate Keane.

Ajenda Asembleia Jerál Ordinária mak hanesan, verifikasaun husi lista membru sira SABEH nian, Aprovasaun ba órdem tarefa sira husi Asembleia Jerál, Aprovasaun Rejimentu SABEH nian, Substituisaun kargu sira husi órgaun Sosiál sira SABEH nian, Aprovasaun Regulamentu Internu SABEH nian, no Aprovasaun Relatóriu Atividade sira SABEH nian.

Jornalista : Cipriano Colo

Editór : Cancio Ximenes

iklan
iklan

Leave a Reply

iklan
error: Content is protected !!