Diretór Ezekutivu SABEH, doutór Andrezinho Belo hamutuk ho médiku voluntáriu sira hala'o konsulta no tratamentu ba veteranu inklui komunidade iha Suku Lisapat, Postu Administrativu Hatolia Zona B, Munisípiu Ermera. Imajen TATOLI /Cipriano Colo

DILI, 16 dezembru 2019 (TATOLI)–Organizsaun Saúde Ba Ema Hotu (SABEH), komprometidu kontinua fó asisténsia saúde bázika ba komunidade iha territóriu tomak inklui veteranu sira. 

Diretór ezekutivu SABEH, doutór Andrezinho Belo hato’o asuntu ne’e iha nia serbisu fatin, Delta, Comoro  Dili, ohin.

Doutór Andrezinho esplika ezisténsia organizasaun ne’e katak organizasaun ne’e hahú primeiru ho ema na’in haat–doutór ida de’it mak Andrezinho Belo, ho na’in tolu seluk ne’ebé la’ós médiku, maka hanesan Edi Torezão, Rui Mendonça ho Gerson Bianco.

“Ami na’in haat la’o hamutuk hodi halo serbisu voluntáriu, tanba haree katak ita-nia komunidade barak maka labele asesu saúde bázika no hela dook tebes husi sentru saúde sira. Ami maski osan laiha, maibé halo sakrifísiu tau hamutuk osan uitoan sosa aimoruk no la’o tama sai iha komunidade nia leet hodi halo konsulta no tratamentu. Ho situasaun ne’e, ikus mai doutór sira mós iha interese hakarak envolve iha ekipa ne’e to’o ohin loron”, Andre esplika.

Nia konta tuir katak SABEH hahú nia misaun iha tinan 2011 ho naran HASUAR (Hadomi Saúde Área Rurál) no iha tempu ne’ebá, atividade hala’o de’it iha Munisípiu Liquiçá no Aileu.

Iha tinan 2017, muda fali naran ba Medical Outreach Team (MOT), maibé doutór Andre haree katak seidauk bele akumula buat hotu, nune’e iha 22 marsu 2019 nia deside muda naran ba Saúde Ba Ema Hotu (SABEH), ho objetivu atu bele akumula rekursu oioin ba atividade Saúde Holístika.

Oras ne’e daudaun, médiku ne’e esplika, SABEH hala’o misaun iha área remota balun maka hanesan iha Suku Fatukalo, Lesuata, Waimori, Meauain, Uatolessu, Abulir, Uatuwa, Liaside, Builo, Larigutu, Nahareka no fatin seluk tan ne’ebé sei tama mak hanesan Faturilau, Acubilitoho, Betulau, Makukurian, Tasifatin, Lebertas no Usekain.

“SABEH sai boot tanba iha ekipa kolaboradór ne’ebé ajuda halo planu programa serbisu, evalua serbisu no buka suporta atividade SABEH nian. Ekipa ida fali maka ekipa voluntáriu ne’ebé kompostu husi médiku, enfermeira, parteira, saúde públika, paramedic no ekipa administrasaun”, nia relata.

Oras ne’e, SABEH hetan suporta karreta ida husi Esilva Rental Car, ne’ebé hetan mós manutensaun gratuita husi Dragon no ETO fuel oferese kombustível.

Aleinde ne’e, nia dehan, iha mós ema balun ne’ebé dalaruma oferese ajudu pesoál, iha mós grupu timoroan nian ida iha Oxford, Inglaterra, ho naran “Haksolok ho Imi”, mak halo mós doasaun uitoan ba voluntáriu sira atu bele han-hemu bainhira hala’o tratamentu ba komunidade iha terrenu.

Kona-ba serbisu hamutuk entre Prezidénsia Repúblika, SABEH no Cruz Vermelha Timor Leste, nia esplika, kooperasaun ne’e hahú dezde vizita Prezidente Repúblika nian ba iha Lospalos iha fulan hirak liubá.

“Depois realiza tratamentu saúde hamutuk ho programa vizita Prezidente Repúblika nian iha Lospalos, ami halo avaliasaun no Xefe Kaza Sivíl hateten katak serbisu ne’e di’ak tebes atu bele tau-matan ba komunidade espesialmente ba veteranu sira. Tanba ne’e maka Prezidente Repúblika rasik deside katak serbisu ne’e presiza kontinua hodi akompaña Xefe Estadu ninia vizita ba munisípiu sira. Bainhira Xefe Estadu la bá mós atividade tenke kontinua la’o nafatin”, nia dehan tan.

Kona-ba mekanizmu serbisu hamutuk ne’e, Andrezinho esplika, SABEH nu’udár organizasaun ida-ne’ebé kompostu husi médiku voluntáriu sira, oferese liu tratamentu saúde bázika ba komunidade liuliu sira ne’ebé labele asesu ba tratamentu saúde iha sira-nia hela fatin.

“Ami nu’udár ekipa voluntáriu kompostu husi profisionál saúde, ami-nia serbisu foka liubá iha área tratamentu saúde bázika ho sakrifísiu ne’ebé boot. Voluntáriu sira interesadu atu envolve iha ekipa ne’e tanba hakarak atu serbisu voluntáriu ba ema ki’ak sira”, nia subliña.

Andrezinho relata tan, SABEH hahú iha 10 dezembru hala’o tratamentu saúde bázika ba komunidade iha Munisípiu Ermera hahú husi Railaco Leten, Railaco Vila, Atsabe Vila, Bulo, Letefoho Vila, Suku Dukurai, iha Hatolia B Suku Lisapat, Mau’Úbu, Urahou no Zona A Suku Asulau-Sare.

Totál pasiente ne’ebé iha, doutór Andrezinho relata, iha pasiente rihun ida resin. Husi númeru ne’e veteranu hamutuk atus-ida resin no restu nee komunidade baibain.

Relasiona ho moras ne’ebé pasiente sira sofre durante tratamentu iha Ermera, nia hateten, barak liu ba ema boot maka tensaun aas, tantu veteranu no komunidade. Tuir fali maka isin katar no diareia inklui infesaun respiratóriu.

“Tensaun aas ninia kauza loloos ne’e ita lahatene, maibé ita bele dehan mai husi ema ninia estilu vida, hanesan hahán no hemu inklui bele mai husi jerasaun”, Andrezinho esplika.

Durante serbisu hamutuk ho Prezidénsia Repúblika, nia dehan, SABEH hetan apoiu aimoruk oioin husi Serbisu Autónoma Medikamentu no Ekipamentu Saúde (SAMES).

SABEH iha ona planu atu halo akordu ho Ministériu Saúde hodi bele fasilita di’ak liután atividade, maibé to’o oras ne’e seidauk realiza.

Voluntáriu SABEH nian oras ne’e daudaun iha médiku na’in-58, infermeira na’in-6, saúde públiku na’in-20, no sira ne’ebé la’ós médiku maibé hakarak serbisu hamutuk na’in-10 resin.

Tanba ne’e, totál voluntáriu sira hamutuk na’in-90 resin ho rezidénsia provizóriu iha Delta-Comoro, Eskola Esternatu.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here