Diretór Ezekutivu SABEH, doutór Andrezinho Belo konsulta hela veteranu Filipe de Jesus 'Aslores' ne'ebé sofre iha kotuk-laran no hirus-matan, tanba hetan baku husi forsa Indonézia sira iha tempu okupasaun. Imajen TATOLI/Cipriano Colo

ERMERA, 13 dezembru 2019 (TATOLI)–Veteranu husi Suku Lisapat, Postu Administrativu Hatolia Zona B, Munisípiu Ermera, agradese ba Prezidénsia Repúblika no Organizasaun Saúde Ba Ema Hotu (SABEH), ne’ebé serbisu hamutuk hodi oferese tratamentu saúde gratuita ba veteranu sira no komunidade en jerál. 

Veteranu Filipe de Jesus ‘Aslores’, espresa ninia sentimentu kontente tanba Prezidénsia Repúbika servisu hamutuk ho SABEH hodi oferese konsulta espesiál ba veteranu sira iha Ermera, liuliu iha Suku Lisapat, Mau’Ubu no Urahou.

“Ha’u sente kontente tanba Prezidénsia Repúblika nia programa espesiál ida mak konsulta no halo tratamentu ba veteranu sira ne’ebé sofre moras dezde tempu okupasaun. Ha’u rasik hetan pankada husi forsa Indonézia nian iha kotuk-laran no kontinua sofre to’o ohin loron. Tanba ne’e, pesoalmente agradese tanba ohin loron ha’u bele hetan tratamentu”, nia hateten ba jornalista iha fatin konsulta saúde, ohin.

Nia husu ba Prezidénsia Repúblika atu kontínua programa tratamentu ne’e, tanba konsidera programa ne’e di’ak tebes no besik liu komunidade liuliu veteranu sira.

Nune’e mós, komunidade Antoninho do Céo husi Aldeia Kaitorlo, Suku Urahou, agradese tanba iha oportunidade ida-ne’e bele konsulta no simu kedas aimoruk husi médiku sira atubele halo tratamentu ba moras kulit ne’ebé nia sofre.

Entretantu, Xefe Kaza Sivíl Prezidénsia Repúblika, Francisco Maria de Vasconcelos ne’ebé observa diretamente tratamentu saúde iha Eskola Ensinu Báziku Lisapat, agradese ba médiku sira husi Organizasaun SABEH ne’ebé koopera hamutuk ho Prezidénsia Repúblika hodi fó asisténsia saúde ba sidadaun sira.

Xefe Kaza Sivíl hateten Prezidente Repúblika, Francisco Guterres Lú Olo kontínua preokupa ho povu nia moris ne’ebé seidauk dignu, seidauk asesu ba saúde ne’ebé di’ak, vida ekonomia ne’ebé di’ak no edukasaun di’ak ba oan sira hotu.

Tanba ne’e, nia hatutan, Prezidente Repúblika Lú Olo, hola inisiativa atu fó asisténsia médika ba komunidade, ne’ebé antes ne’e realiza iha Lautém no oras ne’e iha Munisípiu Ermera.

“Xefe Estadu la foti knaar ezekutivu, maibé haree ba situasaun, Prezidente Repúblika halo asaun ruma bele kontribui situasaun saúde iha Timor-Leste”, nia afirma.

Ho nune’e, Prezidénsia Repúblika organiza joven profisionál médiku sira, husi organizasaun Saúde Ba Ema Hotu (SABEH), kompostu husi médiku na’in-18, infermeiru 4 no saúde públiku na’in 7 lideradu husi doutór Andrezinho Belo hodi fó asisténsia saúde ba komunidade, liuliu komunidade no veteranu sira ne’ebé hela dook husi ekipamentu saúde.

Vasconcelos orgullu tanba, maski joven timoroan ne’ebé ho profisionál barak mak hakarak hela de’it iha sidade, maibé iha joven lubuk ida ho voluntariamente ho laran, hakarak serbí komunidade liuhusi koñesimentu ne’ebé sira iha.

“Oras hanesan ne’e, ita buka ema voluntária kadavéz susar liu ona. Tanba ne’e, ha’u mós agradese ba doutór sira ne’ebé halo tratamentu ba ita-nia komunidade ,” nia dehan tan.

Antes ne’e, SABEH halo tratamentu saudé ba veteranu hamutuk 100 no komunidade 900 iha Postu Administrativu Railaco, Atsabe no Letefoho, hahú husi loron 10 to’o 12 novembru 2019.

Tuir planu, atividade tratamentu saúde ne’e sei kontinua realiza iha Postu Administrativu Atsabe, Letefoho, Hatolia, Gleno no Ermera.

Jornalista: Cipriano Colo

Editór: Xisto Freitas

HAKEREK NO HATÁN

Please enter your comment!
Please enter your name here