Prezidente Repúblika,Francisco Guterres Lú Olo. Imajen Tatoli/António Gonçalves.

DILI, 17 janeiru 2022 (TATOLI)—Prezidente Repúblika, Francisco Guterres ‘Lú-Olo’, hateten maske ofisialmente deklara re-kandidata an ba Prezidente Repúblika hodi kompete iha eleisaun prezidensiál períodu 2022-2027, maibé nia parte sei la rezigna an to’o hein mandatu ramata.

Notísia Relevante: Durante kampaña eleitorál, Lú Olo garante nafatin funsionamentu Prezidénsia Repúblika

“Ha’u labele rezigna an tanba mandatu Prezidente Repúblika nian ne’e to’o tinan lima. Nune’e, laiha motivu Prezidente Repúblika atu rezigna an,” Prezidente Repúblika hateten ba jornalista sira iha Palásiu Prezidensiál Nicolau Lobato, Bairru Pite, Dili, segunda ne’e.

Nia hateten, kona-ba apoiu hosi partidu ruma ba nia kandidatura ne’e husu ba partidu ne’ebé mak bele pronunsia.

“Hosi ha’u-nia parte, kandidatu la halo parte iha partidu nian no partidu orsida ba iha ne’ebá mak atu fó apoiu ka lae ne’e partidu nian. Ne’ebé, ha’u-nia kandidatu laiha buat ida ho partidu,” nia hateten.

Antes ne’e, iha domingu (16 janeiru 2022) ne’e, atual Xefe Estadu ne’e ofisialmente deklara ninia re-kandidata an ba Prezidente Repúblika preríodu 2022-2027 iha munisípiu Ermera no sei rejistu ofisialmente iha Tribunál Rekursu.

Iha serimónia re-kandidata an ne’e, Prezidente Repúblika Francisco Guterres Lú Olo hateten durante iha kampaña eleitorál ne’e ninia parte sei garante nafatin funsionamentu Prezidénsia Repúblika.

Prezidente Repúblika

Iha Konstituisaun RDTL, Artigu 74 (Definisaun), iha alinéa 1 hateten Prezidente Repúblika mak Xefe-Estadu, símbolu no garantia independénsia nasionál no unidade Estadu nian, no instituisaun demokrátika sira-nia funsionamentu regulár.

Iha alinéa haktuir, PrezidenteRepúblika maka Komandante A’asliu (supremu) Forsa Armada nian.

Iha Artigu 75 (Elejibilidade), iha alinea 1 haktuir; Bele tuir kandidatura ba Prezidente Repúblika sidadaun timor-oan sira-ne’ebé, iha ilas hotu tuirmai ne’e:

  1. a) Sidadaun nanis;
  2. b) Iha tinan mínimu 35;
  3. c) Ho kapasidade di’ak;
  4. d) Ne’ebé hetan proposta husi sidadaun hili-na’in mínimu nain rihun lima (5000).

Iha alinéa 2 hateten, Prezidente Repúblika kaer mandatu to’o tinan lima nia laran no ninia knaar remata bainhira Prezidente foun simu pose.

Alinéa 3 haktuir, Prezidente Repúblika nia mandatu bele hetan renovasaun dala-ida de’it.

Kona-ba eleisaun, iha Artigu 76 (Eleisaun), iha alinbéa 1 hateten; Atu sai Prezidente Repúblika, sei hili tuir sufrájiu universál, livre, diretu, sekretu no ida-idak.

Iha alinéa 2 dehan, Eleisaun Prezidente Repúblika nian banati tuir sistema manán ho votu barakliu hosi votu hotu-hotu ne’ebé válidu, la sura votu ne’ebé la válidu.

Alinea 3 haktuir, bainhira kandidatu sira hetan votu hanesan, sei hala’o fali eleisaun dala ida tán, liutiha loron tolunulu (30) hosi loron votasaun ida foin liubá kotuk.

Iha alinéa 4 hateten, iha eleisaun daruak, kandidatu na’in-rua ne’ebé hetan liu votu no la hasai sira-nia kandidatura mak bele tuir.

Notísia Relevante: Kontinua kompete iha eleisaun prezidensiál, Lú Olo sei luta hasoru injustisa no kontra KKN

Eleisaun ba Prezidente Repúblika sei akontese iha 19 marsu 2022

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here