iklan

NASIONÁL, POLÍTIKA

Eleisaun ba Prezidente Repúblika sei akontese iha 19 marsu 2022

Eleisaun ba Prezidente Repúblika sei akontese iha 19 marsu 2022

Prezidente Repúblika, Francisco Guterres 'Lú Olo'. Imajen Tatoli/Egas Cristovão

DILI, 15 janeiru 2022 (TATOLI)—Prezidente Repúblika, Francisco Guterres Lú OLo, liuhosi Dekretu númeru 2/2022, ne’ebé publika sábadu (15/01) ohin iha Jornal Repúblika, marka ona data eleisaun prezidensiál nian hodi hili Prezidente Repúblika ba períodu 2022-2027, iha loron 19 fulan-marsu 2022.

“Konstituisaun, liuhusi artigu 86, alínea c), fó kbiit ba Prezidente Repúblika marka data eleisaun prezidensiál no lejislativa,” refere komunikadu imprensa ne’ebé Agência TATOLI asesu hosi Palásiu Prezidensiál Nicolau Lobato, Bairru Pite, Dili.

Bazea ba artigu 12, númeru 1, hosi Lei númeru 7/2006, 26 dezembru (Lei Eleitorál ba Prezidente Repúblika), ho alterasaun hirak ne’ebé mak halo ona ba Lei ne’e, molok Prezidente Repúblika dekreta data eleisaun prezidensiál, tenke rona uluk Governu no mós partidu polítiku sira ho asentu iha Parlamentu Nasionál.

Karik rezultadu eleisaun ne’e hatudu katak laiha kandidatu ida mak konsege hetan 50%+1 (metade ho votu ida tan) hosi númeru totál votu válidu, iha eleisaun ne’e, ita sei tuir fali eleisaun daruak. 

Tuir artigu 12, númeru 2, hosi Lei Eleitorál ba Prezidente Repúblika, eleisaun daruak sei halo iha loron tolu-nulu, sura hosi loron eleisaun dahuluk. Ba eleisaun daruak ne’e, sei la presiza ona iha tan dekretu prezidensiál ba markasaun data eleisaun daruak nian.

Ba eleisaun ida ne’e, Prezidente Repúblika rona ona Governu, partidu polítiku hotu-hotu ho asentu iha Parlamentu Nasionál, Komisaun Nasionál Eleisaun CNE, sigla portugés) no Sekretariadu Tékniku Administrasaun Eleitorál (STAE).

Jornalista : Tomé Amado

Editór      : Cancio Ximenes 

iklan
iklan

Leave a Reply

iklan
error: Content is protected !!