Prezidente Repúblika (PR), Francisco Guterres Lú Olo. Imajen Tatoli/Egas Cristóvão.

ERMERA, 16 janeiru 2022 (TATOLI) – Prezidente Repúblika Francisco Guterres ‘Lú Olo’, sei garante nafatin funsionamentu prezidénsia repúblika durante kampaña eleitorál.

“Biar ohin ha’u deklara re-kandidata ha’u-nia atu sai prezidente, dala ida tán ha’u sei Prezidente Repúblika nafatin, tanba ha’u-nia mandatu remata iha 20 maiu 2022. Lei hateten de’it katak dispensa atividade polítiku públiku Estadu ninian, la hateten tenke suspende. Tanba mandatu Prezidente Repúblika sura tuituir malu to’o 20 maiu maka foin remata. Purtantu Prezidente Repúblika mantein nafatin,” Xefe Estadu Francisco Guterres Lú Olo informa ba jornalista sira hafoin deklara ofisialmente ninia kandidatura ba eleisaun prezidensiál, iha Vila Antiga, munisípiu Ermera, domingu ne’e.

Nia dehan, Prezidente Repúblika nia mandatu sura hosi simu pose no termina to’o Prezidente Repúblika foun simu pose iha iha loron 20 maiu 2022 nune’e Prezidente Repúblika atuál sei garante funsionamentu prezidénsia repúblika nian.

“Prezidente Republika sei kontinua nafatin dekreta lei hosi Parlamentu Nasionál, kontinua promulga lei ka veta ka bele mós bele haruka ba iha tribunál atubele husu fiskalizasaun preventiva ba konstitusionalidade,” PR Lú Olo hateten.

Tuir nia, só iha buat ida maka dívia Prezidente Repúblika foun labele halo maka disolve parlamentu fulan neen bainhira Prezidente Repúblika atuál hela de’it mandatu fulan-neen.

“Maibé atu halo tratamentu ba kandidatu hotu-hotu maka Prezidente Repúblika bainhira halo kampañia sei la uza sasán estadu ninian hanesan karreta no meiu sira Estadu nian,” nia afirma.

Notisia relevante: Kontinua kompete iha eleisaun prezidensiál, Lú Olo sei luta hasoru injustisa no kontra KKN

Jornalista         : Natalino Costa

Editór               : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here