Diretór Jerál STAE, Acilino Manuel Branco. Imajen TATOLI/Egas Cristóvão

DILI, 10 janeiru 2022 (TATOLI)—Diretór Jerál Sekretariadu Tékniku Administrasaun Eleitorál (STAE), Acilino Manuel Branco, informa STAE sei fasilita halo kartaun eleitorál ba dadur sira iha prizaun Covalima ne’ebè seidauk iha kartaun eleitorál, nune’e bele ezerse sira-nia direitu votu iha eleisaun perzidensiál 2022.

Notísia Relevante:  Prizaun Covalima aprezenta dadur laiha kartaun eleitorál ba STAE

“Ha’u hanoin informasaun ida-ne’e foin rona, maibé ami sei komunika ba STAE Covalima depois bele haree lori fasilita sira halo sira-nia kartaun eleitorál, nune’e sira bele ezerse direitu votu ba aban-bain rua iha eleisaun mai,” Diretór Jerál STAE ne’e hateten ba Agência Tatoli iha nia kna’ar fatin, Caicoli, Dili, segunda ne’e. 

Maske dadur sira mai hosi unidade jeográfika keta-ketak maibé iha loron votasaun ne’e dadur ida-idak tenke hatudu sira-nia kartaun eleitorál iha sentru votasaun.

STAE sei haree tanba iha loron 14 janeiru resensiamentu eleitorál atu konkuli ona, entaun iha posibilidade saida mak STAE a bele halo atu fasilita sidadaun sira bele hetan kartaun eleitorál no sei orienta STAE Covalima atu haree asuntu ida-ne’e.

Bazea ba lei, nia dehan, la bandu sidadaun sira iha prizaun atu kumpre sira-nia obrigasaun no  kumpre desizaun tribunál, nune’e sei haree posibilidade oinsá bele fasilita sira hodi hetan kartaun eleitorál.  

Notísia Relevante: Resensiamentu eleitorál sei konklui iha 14 janeiru

Tanba molok atu realiza eleisaun, tribunál liuhosi ministériu justisa sei entrega lista dadur sira-nian antes loron 10 ba STAE, ne’ebè dadur sira mai hosi unidade jeográfika oioin la presiza halo atualizasaun. 

“Ha’u sei orienta STAE Covalima para sei haree posibilidade sa ida mak ita belé fasilita liu-liu ba sira-ne’ebè nia kartaun eleitorál lakon no laiha. Entaun tenke kumpre rekezitu laiha esepsaun ba sidadaun kualker situsaun, ida-ne’e sira iha situsaun ida iha prizaun maibé nia prosesu administrativu ita sei aplika hanesan ho sidadaun normal,” nia hateten.

Enkuantu, bazea ba dadus dadur sira-nian iha prizaun Covalima hamutuk 108 no hosi númeru ne’e, dadur na’in-15 mak laiha kartaun eleitór no presiza atualiza eleitorál. 

Dadus hosi dadur na’in-108 iha prizaun Covalima ne’e, prizaun kondenadu na’in-70, prizaun preventiva 38 ne’ebè fahe ba bloku A dadur na’in-41, bloku B na’in-29, bloku C na’in-25 no kuziña na’in 13.  

Tuir área jurisdisaun, prizaun Covalima kobre munisípiu sira hanesan Covalima, Manufahi, Ainaro no bobonaro.

Notísia Relevante: Resensiamentu eleitorál: STAE rejista eleitór foun 20.076

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here