Diretór Jerál STAE, Acilino Manuel Branco. Imajen TATOLI/Egas Cristóvão

DILI, 06 janeiru 2022 (TATOLI)—Diretór Jerál Sekretariadu Tékniku Eleitorál (STAE), Acilino Manuel Branco, informa resensiamentu eleitorál sei konklui iha 14 janeiru 2022.

Notísia Relevante: Resensiamentu eleitorál: STAE rejista eleitór foun 20.076

“Tuir lei ita sei estabelese kalendáriu ida no kalendáriu ne’e ita halo ona nia dezeñu no tempu badak ami sei públika kalendáriu, nune’e hahú prosesu inskrisaun eleitór sira iha sentru votasaun paralelu. Maibé agora ita sei iha prosesa resensiamentu eleitorál no mós atualizasaun baze de dadus ne’ebé mak sei konkui iha loron 14 janeiru tinan ne’e,”  Diretór Jerál STAE ne’e hateten ba Agência TATOLI, iha nia knar fatin, Caicoli, Dili, kinta ne’e.

Tuir mai, STAE sei halo mudansa nune’e eleitór ida hodi ba verifika fali nia naran depois mak tama ba inskrisaun sentru votasaun paralelu no sentru votasaun paralelu ne’e sei realiza iha Postu Administrativu haat iha Munisípiu Dili nian ne’ebé mak sei lori responde situasaun haat.

Dahuluk, ba Funsionáriu públiku ho nia motivu servisu, ho nia mekanizmu katak ninia superiór másimu tenke fó deklarasaun no haruka naran ba iha Komisaun Funsaun Públika (KFP) depois KFP haruka fali ba STAE.

Daruak, ba estudante sira iha eskola refere nia superiór mak diretór eskola ka reitór mak halo deklarasaun ruma liuhosi Ministéiru Edukasaun Juventude no Desportu (MEJD) mak enkamiña ba iha STAE.

Datoluk, ba sidadaun ne’ebé mak halo tratamentu saúde iha Dili ne’e sei lori deklarasaun ka atestadu médiku hosi ospitál liuhosi Ministériu Saúde hafoin manda ba iha STAE.

Dahaat, ba komunidade ein jerál ne’ebé mak halo negósiu ka iha impedementu ruma ne’ebé mak la fila ba nia munisípiu orijen sei hetan deklarasaun hosi xefe suku sei lori ba sentru atendementu iha postu sira mak haruka ba iha STAE nasionál.

Bainhira hatama deklarasaun ne’e tarde liu mak loron sanulu (10) antes tama ba eleisaun liu-liu dadus sira-ne’e tama ona iha STAE no STAE sei sinkroniza ho baze dadus.

Ho regulamentu sira-ne’e, nia dehan, segunda semana oin STAE sei breafing ba brigada sira hotu kona-ba regulamentu hotu-hotu ba kandidatura Prezidente Repúblika nian inklui mós informa ba autoridade lokál sira atu halo sensibilizasaun ba eleitór sira kona-ba prosesu inskrisaun ba sentru votasaun paralelu nian, nune’e eleitór sira prepra bainhira kalendáriu STAE públika ona mak sira bele halo inskrisaun iha sentru votasaun paralelu nian.

Kalendáriu eleisaun STAE sei públika bainhira Prezidente Repúblika (PR) dekreta ona kalendáriu eleisaun no sei halo publikasaun ba dekretu PR nian iha jornál da repúblika tama entrada ein vigór depois mak STAE sei públika kalendáriu eleisaun nian.

Prazu ba aprezentasaun kandidatura iha loron 20 nia-laran hahú hosi publikasaun data eleisaun nian. Iha loron 20 nai-laran interesante sira bele mai iha Tribunál Rekursu no Ministériu Justisa, surpremu tribunál no justisa sei husu apoiu hosi STAE para haree iregularidade ruma karik akontese iha prosesu kandidatura nian.

“Data bainhira loos ne’e ita seidauk hatene maibé depende bainhira mak Prezidente Repúblika dekreta depois mak ita sei ajusta ba kalendáriu eleisaun nian,” nia dehan.

Dadus provizóriu resensiamentu eleitorál no atualizasaun baze de dadus to’o novembru 2021 eleitór hamutuk 857.487 kompostu hosi Munisípiu Aileu 33.727, Ainaro 44.571, Baucau 95.142, Bobonaro iha 69,822, Covalima 47.935, Dili 190.750, Ermera 82.931, Lautém 48.297, Liquiça 50.965, Manatuto 35.422, Manufahi 40.308, Rejiaun Administrativa Espesiál Oé-Cusse Ambeno (RAEOA) 51.005 no munisípiu Viqueque hamutuk 59.612.

Dadus resensiamentu eleitorál ba eleitór sira iha Australia hamutuk 1.489, Korea Súl 1.262, Irlandia 1.251, Portugál 762 no Reinu Unidu hamutuk 2.236.

Notísia Relevante: Ekipa resensiamentu eleitorál iha diáspora rejista votante 367  

Jornalista : Osória Marques

Editór        : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here