Diretòr Prizaun Covalima, Julio dias Ximenes. Imajen Tatoli /Celestina Teles.

COVALIMA, 05 janeiru 2022 (TATOLI)—Diretòr Prizaun Covalima, Júlio Dias Ximenes, aprezenta ona dadus dadur ne’ebé laiha kartaun eleitorál ba Sekretáriu Tékniku Administrasaun Eleitorál (STAE) atu fasilita dadur sira hodi hasai kartaun eleitorál (KE). 

Notísia Relevante: Dadur 15 iha prizaun Covalima laiha kartaun eleitoràl

“Ha’u aprezenta ona dadus ba STAE kona-ba dadur sira-ne’ebè mak seidauk iha kartaun eleitorál hodi organiza dadur sira bele trata sira-nia kartaun eleitorál,” Júlio dias Ximenes informa ba Agência Tatoli, iha Prizaun Covalima, kuarta ne’e. 

Atu fasilita dadur sira hasai kartaun eleitorál, guarda prizonál sira mós hahú fó ona avizu no fasilita dadur sira telefone ba sira-nia família atu kompleta sira-nia dokumentu hodi bele hasai kartaun eleitorál.

Bazea ba dadus dadur sira iha Covalima hamutuk 108 no hosi númeru ne’e na’in-15 mak laiha kartaun eleitorál no presiza atualiza kartaun eleitorál. 

Hosi dadur ema 108 ne’e prizaun kondenadu na’in-70, prizaun preventiva na’in-38 ne’ebè fahe ba bloku A ne’e jamutuk dadur na’in-41, bloku B na’in-29, bloku C na’in-25 no kuzina na’in-13 

Hatán ba kestaun ne’e, Diretòr STAE Covalima ne’e esplika, STAE mós halo ona konfirmasaun maibé dadur sira presiza kompleta lai sira-nia dokumentu hodi prenxe kritéria STAE nian. 

“Dadur sira hosi munisípiu seluk ami labele halo atendementu tanba sistema  baze dadus ida-idak ni’an. Hanesan dadur sira hosi munisípiu Same, Ainaro no Bobonaro, STAE hosi sira-nia munisípiu mak bele halo atendementu,” nia klarifika. 

Atu halo atendementu ba dadur sira hosi munisípiu seluk bainhita simu vizita hosi STAE Nasionàl ruma bele, nune’e sira bele loke sistema hodi fasilita dadur sira hasai kartaun eleitorál 

STAE prontu atu halo atendementu maibé dadur sira mòs tenke prepara dokumentu sira hanesan Sertidaun RDTL, nune’e STAE bele halo atendementu.

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here