Diretór Jerál Sekretariadu Tékniku Administrasaun Eleitoral (STAE), Acilino Manuel Branco. Imajen TATOLI/Egas Cristóvão.

DILI, 25 novembru 2021 (TATOLI)—Sekretáriadu Tékniku Administrasaun Eleitorál kontinua hala’o resensiamentu eleitorál iha territóriu nasionál nomós diáspora, ne’ebé to’o iha 08 novembru tinan ne’e, STAE rejista tan eleitór foun hamutuk 20.076.

Notísia Relevante: Dadus provizóriu: STAE rejista eleitór 855.630 hosi janeiru-outubru 2021

“Ho atividade resensiamentu eleitorál ne’ebé lansa to’o iha 08 novembru tinan ne’e rejista tan eleitór foun hamutuk 20.076 kompostu hosi nasionál 20.027 no rai-li’ur 49,” Diretór Jerál STAE, Acilino Branco, hateten ba Agência TATOLI iha nia knar fatin, Caicoli, Dili, kinta ne’e.

STAE daudaun ne’e kontinua halo atendimentu resensiamentu eleitorál iha territóriu nasionál no rai-li’ur ne’ebé tuir kalendáriu sei termina iha loron 14 janeiru 2022.

Mekanizmu atendimentu iha territóriu ba sidadaun sira hanesan idozu no ema defisiénsia ho kondisaun fizíku la permite la’o, ekipa hakbesik to’o kedas iha fatin hodi atende direta.

No halo atendimentu mobile iha diáspora ne’ebé la’os konsentra de’it iha Timor-Leste (TL) nia konsoladu no embaixada maibé hakbesik atendimentu to’o mós sidade sira-ne’ebé sidadaun timor-oan eziste hela barak, nune’e oinsá atu garante partisipasaun.

Ezemplu, nia dehan, iha Korea do Súl aleinde halo atendimentu iha TL nia embaixada iha Soul halo mós atendimentu mobile iha sidade Gwanju hanesan provinsia ida-ne’ebé timor-oan barak mak konsentrasaun iha ne’ebá hanesan traballadór.

Nune’e mós iha Portugal atendimentu halo iha embaixada maibé halo mós atendimentu mobile iha sidade Portu ne’ebé iha estudante no komunidade timor-oan barak hela iha ne’ebá.

Iha Inglatera atendimentu TL nia embaixada iha Londres no sei reforsa ekipamentu hodi halo mós atendimentu mobile iha fatin sira iha Irlandia Norte, Oxford no Peterborough.

Diretór Jerál STAE ne’e dehan, ba Austrália tanba situasaun COVID-19 aplika hela lockdown la admite ema atu tama iha nasaun refere, nune’e ekipa seida’uk bele dezloka maibé Governu liu hosi Ministéiru Negósiu Estranjeiru no Kooperasaun (MNEC, siglá portugés) halo hela komunikasaun ho embaixada no seida’uk iha informasaun.

Tuir dadus STAE to’o iha 08 novembru 2021 eleitór ne’ebé resensiadu no atualizadu foun no tuan iha baze dadus akumula hamutuk 855..597 eleitór, ne’ebé kompostu hosi diáspora 65.38 no rai-laran 849.059.

Iha eleisaun mai STAE identifika ona aumenta sentru votasaun hamutuk 1200 no estasaun votu iha 1.500 iha territóriu tomak.

Notísia Relevante: MAE-STAE halo preparasaun téknika Eleisaun Prezidensiál marsu 2022

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here