Diretór Jerál Dezenvolvimentu Rurál Ministériu Administrasaun Estatál (MAE), Rosito Guterres. Imajen/Espesiál.

DILI, 05 janeiru 2022 (TATOLI)—Diretór Jerál Dezenvolvimentu Rurál Ministériu Administrasaun Estatál (MAE), Rosito Guterres, hateten progressu programa Saemoul Undong ka Programa Movimentu Hafoun Programa ne’ebé Governu Korea finansia tama ona faze konstrusaun fíziku ne’ebé atinje ona 50%.

Notísia Relevante: Kada tinan, Saemaul Undong aloka orsamentu $20 mill ba komunidade

“Programa Saemoul Undong nian ne’ebé Governu Korea finansia tama ona ba faze konstrusaun fíziku no to’o ona 50%. Agora ha’u hein de’it relatóriu hosi sira tanba osan iha ona sira-nia konta bankária, ne’ebé sira ezekuta de’it ona,” Rosito Guterres hateten ba Agência TATOLI, iha nia knar fatin Colmera, Dili, kuarta ne’e.

Diretór Jerál ne’e hatutan, aldeia haat mak sai trajetu ba programa Saemaul Undong mak aldeia Seloi-Kraik ho Lekituda iha munisípiu Aileu nian no aldeia Pala ho Dara iha Ataúro nian, maibé Ataúro propoin bainhira hadi’a sentru no kria tiha kondisaun mak sira tau prioridade ba pekuária no turizmu.

Nia informa, iha aldeia lima iha munisípiu Ermera, Baucau, Ainaro, no Bobonaro ne’ebé propoin Governu Timor-Leste mak finansia entaun tau naran ketak mak Programa Movimentu Hafoun Aldeia (PMOHA).

Notísia Relevante: KM analiza programa movimentu hafoun aldeia

“Tuir loloos ita iha orsamentu karik iha 2021 ita prevee $110.000 hodi transfere ba aldeia lima ne’e. Maibé Dekretu ba PMOHA ne’e rasik foin hetan aprovasaun iha Konsellu Ministru iha fulan novembru, maibé loloos ne’e la’o dala ida ho aldeia haat ne’ebé Korea finansia ne’e maibé laiha dekretu ida hodi sai baze legál.

Aprovasaun ne’ebé tarde difikulta no afeta ba prosesu transferénsia tanba labele halo tranferénsia ba kualker konta bankária grupu nian, tanba orsamentu ne’e presiza iha baze legál ida mak foin bele hala’o atividade sira.

PMOHA ne’e programa dezenvolvimentu komunitária nian ne’ebé hanesan ho Programa Nasionál Dezenvolvimentu Suku (PNDS), maibé PNDS nian halai liu ba infraestrutura bázika no daudaun ne’e konstrui Uma Kbiit Laek (UKL) iha suku laran de’it.

PMOHA ne’e nia tipu diferensa tanba atu forma ekipa iha aldeia la’ós iha Suku ho ninia menu indikativu mak atu halo produtivu sira inklui infraestrutura bázika.

Programa Seamaul Undong ba aldeia haat ne’ebé hetan finansia hosi Korea ho montante rihun $20 ba kada aldeia ida.

Antes ne’e, Programa Saemaul Undong implementa iha Timor-Leste hahú iha tinan 2016 bainhira Timor-Leste asina akordu bilaterál ho Governu Korea no hili Munisípiu Lautém mak sai hanesan pilotu ba projetu Saemaul Undong ninian.

Programa ne’ebé implementa iha atividade ba Saemaul Undong ne’e mak hanesan kuda ai-funan, kuda modo, haki’ak animál hanesan karau, fahi, manu no loke mós negósiu.

Notísia Relevante: Programa “Movimentu Hafoun Aldeia” hakbiit ekonomia iha baze

Jornalista : Osória Marques

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here