DILI, 03 fevereiru 2021 (TATOLI)—Ezekutivu sira liuhosi sorumutuk Konsellu Ministru (KM) analiza projetu kona-ba Programa Movimentu Hafoun Aldeia, ne’ebé aprezenta husi Ministru Administrasaun Estatál, Miguel Pereira de Carvalho.
“Aprezentasaun ne’e kona-ba opsaun polítika-lejislativa ne’ebé sai hanesan baze ba projetu Programa Movimentu Hafoun Aldeia, ho objetivu atu fó kbiit ba komunidade atu hadi’ak sira-nia moris, hakbesik dezenvolvimentu ba komunidade, promove partisipasaun ativa no voluntária ba populasaun hodi hasa’e prestasaun serbisu no atu hadi’ak rendimentu ba interese komun,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu iha Palásiu Governu, kuarta ne’e.
Inisiativa programa ne’e atu inspira esperiénsia husi Koreia ne’ebé adapta tuir ita-nia kontestu.
“Konsellu Ministru rona aprezentasaun husi Ministru Administrasaun Estatál no sei submete dokumentu hanesan proposta dekretu Governu, no iha tempu oin-mai sei submete ba Prezidénsia Konsellu Ministru ne’ebé tuir tramitasaun normál sei lori fali deliberasaun ba Konsellu Ministru,” Portavós Governu akresenta.
Jornalista: Antónia Gusmão
Editora: Julia Chatarina
