Vise-Ministru Administrasaun Estatál, Lino de Jesus Torrezão. Imajen Tatoli/Antónia Maia Gusmão.

DILI, 10 dezembru 2021 (TATOLI)—Governu Korea liuhosi Embaixadór Korea ba Timor-Leste apoia ekipamentu ba Ministériu Administrasaun Estatál (MAE) hodi implementa programa Saemaul Undong iha Timor-Leste.

Vise-Ministru Administrasaun Estatál, Lino de Jesus Torrezão, hateten programa Saemaul Undong ka programa PMOHA (Programa Movimentu Hafoun Aldeia” ne’e pertenente ba Governu atu implementa tanba bele hakbiit komunidade nia ekonomia iha baze.

“Programa ida-ne’e ami sente programa ida-ne’ebé pertenente di’ak ba ita-nia komunidade, tanba komunidade sira mós sei bele sente katak halo oinsá mak sira bele hakbiit sira-nia ekonómia iha baze. Entaun, bainhira sira atu hakbiit sira-nia ekonómia iha baze ne’ebá, sira presiza apoia ruma no apoia ne’e mak liuhosi Embaixada Korea do Súl,” Lino de Jesus Torrezão, hateten ba jornalista sira iha Salaun Ministériu Administrasaun Estatál, Caicoli, Dili, sesta ne’e.

Governu Korea halo programa ida-ne’e atu habelar sira-nia programa mai to’o Timor-Leste, tanba iha fatin hotu-hotu, hanesan país nasionál sira-nia laran programa ne’e iha hotu, nune’e mós ba país sub-dezenvolvidu sira mós implementa programa ne’e.

“Programa nia aprezentasaun halo ona iha agostu tinan 2020 ne’e hatudu katak programa ne’e di’ak. Entaun, programa ne’e ita atu ko’alia loloos mosu ho gotong royong, hanesan sira iha aldeia ne’ebá oinsá sira hotu hamutuk atu dezenvolve sira-nia suku no aldeia. Nune’e, iha ita-nia ema inisiadór mak Idelta Rodrigues, nia mak aprezenta programa ne’e ba iha Primeiru-Ministru, hosi ne’e Primeiru-Ministru sente haksolok no interesante ba programa ida-ne’e. Entaun, programa ne’e atu intrega ba sé, tanba Ministériu Administrasaun Estatál ne’ebé kaer programa PNDS nia iha relasaun makaas hosi suku to’o aldeia. Nune’e, programa ne’e atu hatuur iha aldeia, entaun entrega mai iha Ministériu Administrasaun Estatál mak realiza programa ne’e,”  nia dehan.

Antes entrega programa ne’e, MAE mós tenke iha baze legál ida forte atu bele hala’o progaram ne’e, entaun MAE iha dekretu-lei ida-ne’ebé forte atu bele hala’o programa ne’e la’o ba oin.

“Ho COVID-19, ne’ebé mosu programa ne’e lala’o no agora ita tama ona fim do ano foin atu esforsa aan atu hala’o. Iha-fulan dezembru nia laran, ita la’o ba to’o janeiru. Maibé ne’e mós depende ba orsamentu ne’ebé iha, tanba ita tama ona fim do ano, hosi ne’e susar oituan atu hetan orsamentu ne’e. Tanba osan ne’e iha hela maibé atu aloka orsamentu ne’e mak araska uitoan, tanba ita tama ona ba fim do ano,” Governante ne’e esplika.

Kona-ba realiza programa, Governante ne’e esplika, bainhira atu hala’o programa ne’e di’ak no susesu dahuluk tenke forma benefisiáriu sira, tanba bainhira hakarak nia susesu tenke fó formasaun ba sira kona-ba programa PMOHA ne’e foka liu ba ekonómika.

Embaixadór Korea ba Timor-Leste, Kim Jeong-Ho, informa, ekipamentu ne’ebé entrega ba Ministériu Administrasaun Estatál (MAE) hanesan, ekipamentu ba halo formasaun ba programa Saemaul Undong ka PMOHA ba tinan ida.

“Ekipamentu sira-ne’ebé sei hala’o ba programa ne’e mak jaket, sapeo, laptop, skring projector, printer, livru, brosura no lapijeira. Hosi ekipamentu sira ne’e mak sei uza atu halo formasaun ba Saemaul Undong ka PMOHA ba tinan ida-ne’e,” nia dehan.

Hosi ekipamentu sira ne’e, balun sei iha dalan, hanesan Laptop no bainhira ekipamentu ne’e to’o mai sei entrega mós ba Ministériu Administrasaun Estatál.

“Apoia ba tinan ne’e, ami tarjetu ba aldeia haat no ba tinan oin ita koko atu aumenta liután formasaun no ekipamentu sira-ne’e mai iha ne’e atu bele fasilita formasaun ne’e hodi la’o di’ak,” nia informa.

Entretantu, programa Saemaul Undong ka PMOHA sei implementa iha munisípiu neen (6) hanesan, Dili, Aileu, Ermera, Baucau, Ainaro no Bobonaro.

Jornalista : Nelia Fernandes

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here