Ró Haksolok. Imajen/Dok. ZEESM

DILI, 05 janeiru 2022 (TATOLI)—Parlamentu Nasionál (PN) liu hosi Komisaun E ne’ebé trata asuntu Infaestrutura, sei tau planu atividade hodi halo fiskalizasaun direta ba prosesu Ró Haksolok.

Notísia Relevante: PGR José Ximenes: Investigasaun ba Ró Haksolok kontinua la’o

Vise Prezidente Komisaun E, Fabião de Oliveira, hateten durante ne’e iha duni planu atu halo fiskalizasaun diretamente maibé ho situasaun COVID-19 labele dezloka ba rai-li’ur.

“Agora daudaun ami seidauk iha hanoin atu halo fiskalizasaun tanba ami foin tama iha tinan foun. Maibé ami sei halo programa no planu ba fiskalizasaun iha terrenu nune’e depende ba ami-nia deliberasaun komisaun nian mak bele deside,” Fabião de Oliveira hateten ba jornalista sira iha Parlamentu Nasionál, kuarta ne’e.

Parlamentu Nasionál nia kompeténsia mak hatene aprova orsamentu ba ró refere ba iha prosesu konstrusaun to’o finaliza no mai Timor-Leste.

Deputadu hosi bankada Fretilin ne’e, dehan tinan barak ona Ró Haksolok seidauk mai tanba iha prosesu la’os fasíl presiza lori tempu. No tanba entre Estadu ho kompañia ita labele dehan pesoál ida-ne’e RAEOA ne’ebé prosesu hotu la’o hela, fiar katak Governu sentrál ho RAEOA sei rezolve ida-ne’e.

“Ha’u fiar Ró Haksolok tempu ida, iha tinan ne’e ka tinan oin, sei bele mai ona iha Timor-Leste tanba Parlamentu nia kompeténsia hatene aprova osan no iha esperansa ró sei mai,” nia dehan.

Istória Ró Haksolok

Daudaun ne’e Ró Haksolok iha sidade Figueirra da Voz, Portugál, tanba iha problema kapasidade finanseira kompañia Atlantic Eagle Ship Building, ne’ebé hanesan responsável ba konstrusaun ró-ahi Haksolok.

Ró Haksolok ne’e ho kustu millaun €13,7, inaugura iha loron 26 maiu 2017 iha sidade Figuerra da Foz, Portugál no tuir informasaun sei to’o iha outubru 2017, maibé tanba problema internál kompañia ho sub-kontratór maka to’o agora ró seidauk mai.

Ró Haksolok iha kapasidade atu tula ema na’in-377 no karreta hamutuk 15.

Enkuantu, prosesu konstrusaun ba ró, ninia kontratu asina iha 2014 entre Governu no empreza portugés, no kontrusaun konsege paradu maibé bainhira estabelese ZEESM, prosesu konstrusaun ró-ahi ne’e entrega ba autoridade RAEOA maka responsabiliza.

Notísia Relevante: KAK: Seidauk iha Investigasaun Loloos ba Roo Haksolok

Desizaun atu hili ninia estaleiru (fatin atu harii ró) hahú ho foti husi V Governu Konstitusionál ne’ebé lidera hosi Kay Rala Xanana Gusmão nu’udar Primeiru-Ministru, tuir ninia reprezentante hosi Ministru Transporte no Komunikasaun, Pedro Lay da Silva, ne’ebé selebra kontratu ho estaleiru Atlantic Eagle ship Building, Lda iha loron 22 setembru 2014.

RAEOA-ZEESM simu prosesu konstrusaun ró liuhosi transferénsia projetu no alokasaun orsamentu husi Governu sentrál ba autoridade hodi transfere podér no alokasaun verba ne’ebé akontese entre Governu no Estaleiru Atlantic Eagle ship Building.

Atu garante implementasaun tuir espesifikasaun no padraun tékniku ba ferry ró Haksolok no asegura katak bele hetan rejistu internasionál tuir rekezitu Governu Timor-Leste, maka RAEOA-ZEESM selebra kontratu supervizaun ba konstrusaun ferry ho instituto soldadura e Qualidade (ISQ) ne’ebé hanesan instituisaun ho esperiénsia liu tinan 50 ho konstrusaun ne’ebé kredensiál atu fiskaliza konstrusaun.

Notísia Relevante: Prezidente RAEOA Afirma Ró Haksolok Sei Mai

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here