Ró Haksolok. Imajen ZEESM/Dok.

DILI, 16 novembru 2020 (TATOLI)-Prokuradór Jerál Repúblika (PGR), José Ximenes, hateten, maske  Autoridade Rejiaun Administrativu Espesiál Oe-Cusse Ambeno (RAEOA) kontinua propoin osan ho montante $14,000,000,00 iha proposta Orsamentu Jerál Estadu  (OJE) 2021 hodi finansia Ró Haksolok, maibé ninia  prosesu  investigasaun “krime” kontinua la’o ba oin.

Notísia Relevante : PTR promete fó ba públiku rezultadu auditoria Ró Haksolok

Prokuradór Jerál Repúblika, José Ximenes. Imajen Tatoli /Egas Cristovão

“Ha’u laiha pronunsia ba orsamentu.  Ha’u dehan prosesu “krime” ne’ebé investiga la’o no agora prosesu la’o kontinua,” PGR José Ximenes, afirma hodi responde jornalista sira, ohin, iha Palásiu Prezidensiál, Dili.

Nia parte la responde ba kestaun administrativu tanba kestaun husu tan orsamentu  ida ne’e matéria Governu nian.

Liuhosi audiénsia publika iha Parlamentu Nasionál (PN),  tersa liubá, prezidente autoridade RAEOA, Arsenio Paixão Bano, aprezenta proposta orsamentu ba RAEOA tinan fiskál 2021  inklui previstu millaun $14 hodi finaliza konstrusaun Ró Haksolok.

Iha audiénsia ida ho Primeiru-Ministru (PM), Taur Matan Ruak, iha Palaçio do Governo, iha loron 17 fevereiru 2020, eis prezidente autoridade RAEOA-ZEESM (Zona Ekonomia Espesiál Sosiál Merkadu), Mari Alkatiri, husu desizaun Governu Sentrál nian atu deside destinu negosiasaun Ró Haksolok atu mai Timor ka lae.

Notísia Relevante : Alkatiri: Ró Haksolok Tenke iha Desizaun

Ró ne’e rasik, daudaun ne’e iha sidade Figueiru da Voz, Portugal, tanba iha problema kapasidade finanseira hosi kompañia Atlantic Eagle Ship Building, ne’ebé hanesan responsavel ba konstrusaun Ró-ahi Haksolok.

Ró Haksolok ho kustu millaun €13,7, inaugura iha loron 26 maiu 2017 iha sidade Filguerra da Foz, Portugal no tuir informasaun sei to’o Timor-Leste iha outubru 2017, maibé tanba problema internal hosi kompañia Atlantic Eagle ship Building ho sub-kontraktor maka to’o agora ró ne’e seidauk mai.

Prosesu konstrusaun Ró Haksolok ninia kontratu asina iha 2014 entre Governu no empreza portugés. Konstrusaun ró ne’e konsege paradu, maibé bainhira estabelese ZEESM, prosesu konstrusaun ró-ahi ne’e entrega ba Autoridade maka responsabiliza.

Ró Haksolok, desizaun atu hili ninia estaleiru (fatin atu harii ró)  hahú ho foti hosi V Governu Konstitusionál ne’ebé lidera huosi Kay Rala Xanana Gusmão nu’udar Primeiru-Ministru, tuir ninia reprezentante hosi Ministru Transporte no Komunikasaun, Pedro Lay da Silva, ne’ebé selebra kontratu ho estaleiru Atlantic Eagle ship Building Lda.(Atlanticeagle) iha loron 22 setembru 2014.

RAEOA-ZEESM simu prosesu konstrusaun ró liuhosi transferénsia projetu no alokasaun orsamentu hosi Governu Timor-Leste ba Autoridade RAEOA-ZEESM hodi transfere podér no alokasaun verba ne’ebé akontese liu tiha akordu entre Governu no Estaleiru Atlantic Eagle ship Building no liu estaleiru hosi haú harii ró.

Atu garante implementasaun tuir espesifikasaun no padraun tékniku ba Ferry Ró Haksolok no asegura katak ró ne’e bele hetan rejistu internasionál (registo internacional de navios da Madeira em portugal) tuir rekizitu Governu Timor-Leste, RAEOA-ZEESM selebra kontratu supervizaun ba konstrusaun ferry ho instituto Soldadura e Qualidade (ISQ) ne’ebé hanesan instituisaun ho esperiénsia liu tinan 50 ho konstrusaun ne’ebé kredénsia atu fiskaliza konstrusaun.

“Ba ha’u dalan di’ak maka tenke kontinua koopera no tenke lori Ró Haksolok mai iha rai Timor-Leste,” Mari Alkatiri hateten ba jornalista hafoin hasoru Primeiru-Ministru Taur Matan Ruak.

Jornalista: Nelson de Sousa

Editór: Francisco Simões

PUBLISIDADEiklan

HAKEREK NO HATÁN

Please enter your comment!
Please enter your name here