Deputada CNRT, Carmelita Caetano Moniz. Imajen/Dok. TATOLI

DILI, 02 dezembru 2021 (TATOLI)–Bankada Opozisaun liu-liu Partidu Kongressu Nasionál Rekonstrusaun Timorense (CNRT) iha Parlamentu Nasionál, kestiona Governu seidauk kria estrutura ba  munisípiu foun Ataúro maibé kria uluk ona fundu espesiál prevee iha proposta lei Orsamentu Jerál Estadu (OJE) 2022.

Notísia Relevante: Governu sei nomea administradór munisípiu Ataúro

“Iha artigu 15 kona-ba atu kria fundu espesiál dezenvolvimentu Ataúro ne’ebé sai pesoa koletiva direitu públiku iha personalidade jurídika no autónomia administrativa finanseira. Ita hotu hatene ita foun kria munisípiu Ataúro liuhsi alterasaun ba lei divizaun administrativa no territoriál, no iha fulan hirak liu-ba to’o mai daudaun seidauk estabelese estrutura hosi munisípiu ne’e rasik no seidauk define rejime administrativu ne’ebé atu aplika ba munisípiu Ataúro no ita hahú kria fundu iha proposta OJE 2022,” Deputada CNRT, Carmelita Caetano Moniz, kestiona iha debate proposta lei OJE 2022 iha jeneralidade, iha loron daruak iha plenária, kinta ne’e.

Governu seidauk haree nia implementasaun orsamentu ida-ne’e, ne’ebé munisípiu ne’e foin harii maibé hahú kria fundu ho osan boot millaun $13, mezmu ninia estrutura rasik seidauk iha.

Deputada ne’e dehan, sé mak sai prezidente konsellu administrasaun bainhira estabelese ona munisípiu tuir podér lokál ho nia membru sira mak Ministru Planeamentu Ordenamentu, Ministru Estatál, Ministru Finansa, Ministru Obras Públika, Ministru Transporte Telekomunikasaun, Minsitru Telekomunikasaun Komérsiu no Industria.

Se kuandu seidauk kria podér lokál no seidauk iha prezidente Munisípiu, entaun sé mak sei jere fundu ne’e mak Ministru Ordenamentu Territóriu maibé jere ona fundu infraestrutura. Tan ne’e se Governu laiha konfiansa ne’ebé Governu sei nomea ba autoridade munisipál, nusa mak fundu ne’e la tau iha fundu infraestrutura ne’ebé sei kria estrutura konsellu barak.

Tuir proposta lei OJE 2022 previstu iha artigu 15 fundu espesiál dezenvolvimentu Ataúro.

Hosi artigu ne’e deskreve kria Fundu Espesiál Dezenvolvimentu Ataúro (FEDA), abreviadamente dezigna ba FEDA, pesoa koletiva direitu públiku, dotadu personalidade jurídika, no autonomia administrativa, finanseira no patrimoniál.

FEDA iha finalidade finansia programa no projetu, anuál no pluri-anuál, ho karáter sosiu-ekonómiku no ambiente sustentável, destina ba dezenvolvimentu territóriu no populasaun munisípiu Ataúro, ba área sira infraestrutura komunikasaun, hanesan rodaviáriu, portuáriu no aeronautika, infraestrutura telekomunikasaun, infraestrutura apoiu transporte koletivu pasajeiru, rodaviáriu ka marítima no transporte máritima karga.

Infraestrutura bee no saneamentu, hanesan ba dezenvolviumentu sistema públiku abastesimentu bee-moos, baleta, resíduos sólidos, no sistema kaptasaun armajenazen, transportasaun bee no irrigasaun ba fin agríkula.

Infraestrutura ba fin sosiál no kultura, hanesan ospitál, sentru ka postu saúde, estabelesimentu ensinu formasaun profisional, ekipamentu koletivu desportu, abitasaun sosiál, semitéiru públiku, instalasaun apoiu grupu populasaun vulnerável, jarin no parke.

Infraestrutura apoiu atividade protesaun sivíl no jestaun asidente grave no katástrofe.

No infraestrutura enerjia, hanesan sentrál jerasaun enerjia, rede transporte no distribuisaun enérjia, armazenamentu no distribuisaun konbustivél, iluminasaun públika urbana ho rurál, infraestrutura apoiu ba dezenvolvimentu agrikultura, silvikultura, pekuária ho peska.

Edifísiu no instalasaun sira seluk ba servisu públiku administrasaun munisipál Ataúro ho entidade públika seluk, infraestrutura apoiu dezenvolvimentu turístiku, apoiu ba dezenvolvimentu ekonómiku lokál, hanesan merkadu.

Formasaun rekursu umanu hanesan programa bolsa estudu no formasaun kualifikasaun profisional iha setór estratéjiku dezenvolvimentu munisípiu ho infraestrutura seluk nesessáriu ba dezenvolvimentu munisípiu Ataúro.

Iha artigu ne’e deskreve konstitui reseita FEDA mak dotasaun atribui hosi OJE, transferénsia no doasaun entidade nasionál ho internasionál, bens seluk rendimentu ka reseita atribui.

Aliénde iha artigu ne’e haktuir tan katak, orgaun responsável ba jestaun FEDA mak konsellu administrasaun, kompostu hosi Prezidente munisípiu Ataúro mak prezide, ho membru Governu responsável iha área planeamentu estratéjiku no ordenamentu territóriu, podér lokál ho desentralizasaun administrativa, finansa, obra públika, transporte no komunikasaun ho turizmu, komérsiu indústria.

Iha artigu hosi PPL ne’e hateten, tranzitoriamente to’o instalasaun órgaun reprezentativu podér lokál iha munisípiu Ataúro, Prezidénsia Konsellu Administrasaun FEDA ezerse hosi membru Governu responsável iha área planeamentu estratéjiku no ordenamentu territóriu, integradu órgaun administradór munisipál Ataúro.

No FEDA regulamenta hosi dekretu-lei no membru Governu responsável iha área finansa autoriza kria títulu orsamental relativu ba FEDA no transfere títulu verba $13.000.000 dotasaun orsamentál inskrita iha kategoria transferénsia públika iha títilu dotasaun todo Governu, programa ho kódiku 028 envolvimentu rurál no urbanu.

Notísia Relevante: Governu Sentrál kria Fundu Espesiál Dezenvolvimentu ba Ataúro

Iha orsamento dotação todo Governo OJE 2022 prevee $260,841,120, hodi aloka ba saláriu vensimentu $500,000, bens servisu $89,570,720, kapitál menór $336,600, kapitál dezenvolvimentu laiha, transferénsia públika $170,433,800.

Hosi orsamentu ne’e hodi finansia programa ualu (8), sub-programa 17 no atividade 27.

Programa kontinjénsia sei gasta $29,500,000, programa jestaun finansa públika sei gasta $23,888,321, programa dezenvolvimentu rurál no urbanu sei gasta $13,130,000, programa polítika externa Timor-Leste sei gasta $500,000.

No programa boa-governasaun no jestaun institusionál sei gasta $41,689,256, programa agrikultura sei gasta $25,000,000, programa igualidade jéneru no inkluzaun sosiál sei gasta $73,000,000 ho programa investimentu no diversifikasaun ekonómika sei gasta $ 54,133,543.

Purtantu, progama ho kódiku 028 dezenvolvimentu rurál no urbanu ho nia objetivu médiu prazu dezenvolve no promove funsionamentu organizasaun urbana, ijiene, atribuisaun naran ba fatin no orden públika ba mellora kondisaun urbana iha territóriu Timor-Leste.

Hosi programa ne’e mak ho nia sub-programa dezenvolvimentu urbanu no rurál nia atividade mak fundu investimentu ba munisípiu Ataúro ne’ebé prevee $13,000,000 iha verba transferénsia públika.

Antes ne’e Ministru Administrasaun Estatál (MAE), Miguel Perreira de Carvalho, hateten MAE sei aprezenta figura ka ema ida ba Konsellu Ministru (KM) hodi bele nomea sai Administradór Munisípiu Ataúro ne’ebé sai munisípiu foun hahú iha 01 janeiru 2022.

Prezidente Autoridade no Administradór hatuur ona iha dekretu-lei númeru 3/2016 ne’ebé aprova estatutu autoridade ho administrasaun munisipál, grupu traballu tékniku interministeriál, no MAE aprezenta ona ba KM dekretu lei ida ne’ebé hetan ona aprovasaun hodi hein promulgasaun hosi Prezidente Repúlika, Francisco Guterres Lú Olo, hafoin sei aprezenta ema ida ba KM toma inisiativa atu bele nomea sai administradór Ataúro.

Dekretu-lei ne’e hodi estabelese administrasaun munisipál Ataúro ho nia kompeténsia sira hanesan munisípiu seluk maibé iha konpeténsia adisionál ne’ebé iha área ambientál, turizmu komunitáriu.

Ministru hateten, kompeténsia ne’e bele implementa bainhira diploma ministeriál konjuntu ne’ebé halo hosi MAE no ministériu relevante hodi definitivamente deskonsentra kompeténsia sira.

“Dekretu lei ne’ebé foin aprova mós prevee kriasaun servisu sira iha administrasaun munisipál Ataúro no regra oinsa atu hili administradór tanba Ataúro hanesan goza tratamentu administrativu espesiál no estrutura administrasaun sei diferente ho munisípiu sira seluk,” nia hateten.

Notísia Relevante: Governu prepara estabelese servisu administrasaun munisipál Ataúro

Jornalista : Nelson de Sousa

Editór       : Cancio Ximenes  

PUBLISIDADEiklan

HAKEREK NO HATÁN

Please enter your comment!
Please enter your name here