Prezidente Komisaun ba Elaborasaun Ekonómika, Rui Augusto Gomes. Imajen Tatoli/António Gonçalves

DILI, 19 novembru 2021 (TATOLI)—Governu Sentrál kria Fundu Espesiál Dezenvolvimentu ba Munisípiu Ataúro (FEDA) iha proposta lei Orsamentu Jerál Estadu (OJE) 2022.

“Proposta lei (PPL) OJE 2022 ita propoin kriasaun fundu espesiál dezenvolvimentu Ataúro  ne’ebé hahú iha 01 janeiru 2022, Ataúro sei sai munisípiu ida nune’e iha nessesidade atu autonomiza finansiamentu ba munisípiu ne’e inklui nia fundu rasik,” Ministru Finansa, Rui Augusto Gomes hateten ba jornalista sira hafoin hala’o audénsia públika ho komisaun C Parlamentu Nasionál iha sala plenária, sesta ne’e.

Govenande ne’e esplika, fundu ne’ebé atu introdús dotadu personalidade jurídika iha autonomia administrativa finanseira patrimonial, sei regulamenta bazea ba dekretu-lei ida ho finalidade atu finansia programa no projeitu sira anuál, no plurianual ho karatér sosíu ekonómiku, ambiental, sustentável destina ba dezenvolvimentu territóriu nomós populasaun sira iha munisípiu Ataúro.

Tuir proposta lei OJE 2022 previstu iha artigu 15 fundu espesiál dezenvolvimentu Ataúro.

Hosi artigu ne’e deskreve kria fundu espesiál dezenvolvimentu Ataúro (FEDA), abreviadamente dezigna ba FEDA, pesoa koletiva direitu públiku, dotadu personalidade jurídika, no autonomia administrativa, finanseira no patrimoniál.

FEDA iha finalidade finansia programa no projetu, anuál no plurianuál ho karatér sosiu-ekonómiku no ambiente sustentável, destina ba dezenvolvimentu territóriu no populasaun munisípiu Ataúro, ba área sira infraestrutura komunikasaun, hanesan rodaviáriu, portuáriu no aeronautika, infraestrutura telekomunikasaun, infraestrutura apoiu transporte koletivu passajeiru, rodaviáriu ka marítima no transporte máritima karga.

Infraestrutura bee no saneamentu, hanesan ba dezenvolviumentu sistema públiku abastesimentu bee moos, valeta, resíduos sólidos, no sistema kaptasaun armajenazen, transportasaun bee no irrigasaun ba fin agríkula.

Infraestrutura ba fin sosiál no kultura, hanesan ospitál, sentru ka postu saúde, estabelesimentu ensinu formasaun profisional, ekipamentu koletivu desportu, abitasaun sosiál, semitéiru públiku, instalasaun apoiu grupu populasaun vulnerável, jarin no parke.

Infraestrutura apoiu atividade protesaun sivíl no jestaun asidente grave no katástrofe.

No, infraestrutura enerjia, hanesan sentrál jerasaun enerjia, rede transporte no distribuisaun enérjia, armazenamentu no distribuisaun konbustivél, iluminasaun públika urbana ho rurál, infraestrutura apoiu ba dezenvolvimentu agrikultura, silvikultura, pekuária ho peska.

Edifísiu no instalasaun sira seluk ba servisu  públiku administrasaun munisipál Ataúro ho entidade públika seluk, infraestrutura apoiu dezenvolvimentu turístiku, apoiu ba dezenvolvimentu ekonómiku lokál, hanesan merkadu.

Formasaun rekursu umanu hanesan programa bolsa estudu no formasaun kualifikasaun profisionál iha setór estratéjiku dezenvolvimentu munisípiu ho infraestrutura seluk nesessáriu ba dezenvolvimentu munisípiu Ataúro.

Iha artigu ne’e deskreve konstitui reseita FEDA mak dotasaun atribui hosi OJE, transferénsia no doasaun entidade nasionál ho internasionál, bens seluk rendimentu ka reseita atribui.

Aleinde iha artigu ne’e haktuir tan katak, orgaun responsável ba jestaun FEDA mak konsellu administrasaun, kompostu hosi Prezidente Munisípiu Ataúro mak prezide, ho membru Governu responsável iha área planeamentu estratéjiku no ordenamentu territóriu, podér lokál ho desentralizasaun administrativa, finansa, obra públika, transporte no komunikasaun ho turizmu, komérsiu indústria.

Iha artigu hosi PPL ne’e hateten, tranzitoriamente to’o instalasaun órgaun reprezentativu podér lokál iha munisípiu Ataúro, Presidénsia Konsellu Administrasaun FEDA ezerse hosi membru Governu responsável iha área planeamentu estratéjiku no ordenamentu territóriu, integradu órgaun administradór munisipál Ataúro.

No, FEDA regulamenta hosi dekretu-lei no membru Governu responsável iha área finansa autoriza kria títulu orsamentál relativu ba FEDA no transfere títulu verba $13.000.000 dotasaun orsamentál inskrita iha kategoria transferénsia públika iha títilu dotasaun todo Governu, programa ho kódiku 028 envolvimentu rurál no urbanu.

Iha orsamento dotação todo Governo OJE 2022 prevee $260,841,120, hodi aloka ba saláriu vensimentu $500,000, bens servisu $89,570,720, kapitál menór $336,600, kapitál dezenvolvimentu laiha, transferénsia públika $170,433,800.

Hosi orsamentu ne’e hodi finansia programa ualu, sub-programa 17 no atividade 27.

Programa kontinjénsia sei gasta $29,500,000, programa jestaun finansa públika sei gasta $23,888,321, programa dezenvolvimentu rurál no urbanu sei gasta $13,130,000, programa polítika externa Timor-Leste sei gasta $500,000.

No, programa boa-governasaun no jestaun institusional sei gasta $41,689,256, programa agrikultura sei gasta $25,000,000, programa igualidade jéneru no inkluzaun sosiál sei gasta $73,000,000 ho programa investimentu no diversifikasaun ekonómika sei gasta $ 54,133,543.

Entretantuu, progama ho kódiku 028 dezenvolvimentu rurál no urbanu ho nia objetivu médiu prazu dezenvolve no promove funsionamentu organizasaun urbana, ijiene, atribuisaun naran ba fatin no orden públika ba mellora kondisaun urbana iha territóriu Timor-Leste.

Hosi programa ne’e mak ho nia sub-programa dezenvolvimentu urbanu no rurál nia atividade mak fundu investimentu ba munisípiu Ataúro ne’ebé prevee $13,000,000 iha verba transferénsia públika.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here