Mapa Ataúro. Imajen/ResearchGate

DILI, 22 novembru 2021 (TATOLI)—Ministru Administrasaun Estatál (MAE), Miguel Perreira de Carvalho, hateten MAE sei aprezenta figura ka ema ida ba Konsellu Ministru (KM) hodi bele nomea sai Administradór Munisípiu Ataúro.

Notísia Relevante: Governu prepara estabelese servisu administrasaun munisipál Ataúro

“Governu liuhosi Konsellu Ministru mak sei nomea ema ida hodi sai administradór Ataúro no Ataúro sei sai munisípiu foun hahú iha 01 janeiru 2022,” Miguel Perreira de Carvalho hateten ba Agência Tatoli iha Palasiu Governu, tersa ne’e.

Prezidente Autoridade no Administradór hatuur ona iha dekretu-lei númeru 3/2016 ne’ebé aprova estatutu autoridade ho administrasaun munisipál, grupu traballu tékniku interministeriál, no semana kotuk MAE aprezenta ona ba KM dekretu-lei ida-ne’ebé hetan ona aprovasaun hodi hein promulgasaun hosi Prezidente Repúlika, Francisco Guterres Lú Olo, hafoin sei aprezenta ema ida ba KM toma inisiativa atu bele nomea sai administradór foun Ataúro.

Dekretu-lei ne’e hodi estabelese administrasaun munisipál Ataúro ho nia kompeténsia sira hanesan munisípiu seluk maibé iha konpeténsia adisionál ne’ebé iha área ambientál no turizmu komunitáriu.

Kompeténsia ne’e bele implementa bainhira diploma ministeriál konjuntu ne’ebé halo hosi MAE no ministéiru relevante hodi definitivamente deskonsentra kompeténsia sira.

“Dekretu-lei ne’ebé foin aprova mós prevee kriasaun servisu sira iha administrasaun munisipál Ataúro no regra oinsá atu hili administradór tanba Ataúro hanesan goza tratamentu administrativu espesiál no estrutura administrasaun sei diferente ho munisípiu sira seluk,” nia hateten.

Notísia Relevante: Governu Sentrál kria Fundu Espesiál Dezenvolvimentu ba Ataúro

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here