Illa Ataúro. Imajen/Espesiál

DILI, 17 novembru 2021 (TATOLI)—Governu liuhosi reuniaun Konsellu Ministru (KM), iha kuarta ne’e, aprova ona Projetu Dekretu-Lei ne’ebé aprezenta hosi Ministru Administrasaun Estatál, Miguel Pereira de Carvalho, ho objetivu atu kria servisu administrasaun munisipál Ataúro.

“Diploma ne’e atu kria no estabelese administrasaun munisipál Ataúro, ne’ebé sei simu kompeténsia adisionál iha área ambiente no turizmu, nune’e define mós rejime espesiál ba organizasaun servisu administrasaun munisipál Ataúro,” Ministru Prezidénsia Konsellu Ministru, Fidelis Manuel Leite Magalhães, hateten, iha Palásiu Governu, hafoin reuniaun ezekutivu.

Notísia relevante: Hahú janeiru 2022, Ataúro sai munisípiu foun

Aleinde ne’e, iha ámbitu hanesan hala’o alterasaun datoluk ba Dekretu-Lei númeru 3/2016, loron 16 marsu, ne’ebé altera hosi Dekretu-Lei númeru 9/2018, loron 09 abríl no númeru 54/2020, loron 28 outubru, ne’ebé korrije hosi deklarasaun retifikasaun Prezidénsia Konsellu Ministru númeru 4/2020, loron 16 dezembru.

“Diploma ne’e hatuur ho di’ak liután rejime espesiál ida ba organizasaun servisu administrasaun munisipál Ataúro nian,” Ministru akresenta.

Iha loron 31 maiu 2021, Parlamentu Nasionál (PN) aprova Proposta-Lei Divizaun Administrativa Territóriu ho unanimidade, nune’e, Loré no Hatulia B sai postu administrativu foun no Ataro sai munisípiu foun iha 01 janeiru 2022.

Iha tinan 2022, Governu prevee orsamentu ba Ataúro nu’udar munisípiu foun, ho montante $2.508.100, kompostu hosi saláriu no vensimentu $484.932, bens no servisu $990.797, kapitál menór $728.100, kapitál dezenvolvimentu laiha, no transferénsia públika $304.271.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here