Plenária Parlamentu Nasionál. Imajen Tatoli/António Gonçalves.

DILI, 30 novembru 2021 (TATOLI)—Tuir kalendáriu iha kuarta (01 desembru 2021) aban, VIII Governu Konstitusionál no Parlamentu Nasionál (PN) sei debate proposta lei Orsamentu Jerál Estadu (OJE) 2022 iha faze jeneralidade.

Notísia Relevante: Governu submete Proposta Lei OJE 2022 biliaun $1,675 ba PN

“Tuir ajenda, aban Parlamentu Nasionál sei hahú halo diskusaun proposta lei OJE 2022 iha jeneralidade no ha’u fiar meza halo daudaun distribuisaun relatóriu kópia ba deputadu sira,” Prezidente Parlamentu Nasionál, Aniceto Longuinhos Guterres Lopes, anunsiu liuhosi plenária extraordinária iha Parlamentu Nasionál, tersa ne’e.

Antes ne’e iha loron 04 novembru Komisaun Espesializada Parlamentu Nasionál hahú halo audénsia públika ba proposta lei OJE 2022 ho liña ministéiru no instituisaun autónoma sira hodi relata progressu ezekusaun OJE 2021 no sira-nia proposta lei OJE ba 2022, ne’ebé termina ona iha 17 novembru ne’e.

Prezidente Komisaun C ne’ebé trata asuntu Finansa Públika, Maria Angélica Rangel, hateten komisaun C finaliza ona relatóriu no pareser kona-ba audénsia públika ba OJE 2022 ho instituisaun sira.

“Horse’ik loron tomak ami konsege halo aprovasaun ba relatóriu pareser komisaun C nian no ohin submete ona meza Prezidente Parlamentu no aban sei halo diskusaun iha jeneralidade ba loron primeiru,” nia dehan.

Relatóriu no paresér hosi komisaun iha rekomendasaun lubuk tau iha ne’eba bazea ba ezekusaun orsamentu ne’ebé mak mínimu, no iha deklarasaun hosi parte Governu rasik orsamentu aloka fali ba tinan oin tenke baze mak ezekusaun.

“Ami rekomenda mós haree ba ezekusaun mínimu 60% de’it. Nune’e, rekomenda ba Governu iha futuru tenke ezekuta orsamentu ho di’ak tanba orsamentu introdús kada programa,” nia dehan.

Deputadu ne’e esplika, tuir rejimentu Parlamentu Nasionál nian diskusaun faze jeneralidade sei hala’o durante loron tolu (3) no espesialidade loron sanulu ho mós finál global.

Parlamentu Nasionál sei diskute proposta lei Orsamentu Jeral Estadu (OJE) 2022 hamutuk biliaun $1,675, hosi montante ne’e millaun $233 ba saláriu no vensimentu, millaun $449,98 ba bens servisu, millaun $565,9 ba transferénsia públika, millaun $24,4 koresponde ba kapitál menór no millaun $401,7 ba kapitál dezenvolvimentu.

Iha planu annual Governu nian 2022 reflete kontinuasaun servisu reformsa jestaun finansa públika, ne’ebé susesivu Governu nian liuhosi roteiru orsamentasaun kada programa.

Bazea ba livru 2 planu annual OJE 2022 integra programa hamutuk 45, sub-programa 477 no totál atividade 2,445.

Kuadru Planeamentu kona-ba orsamentasaun kada programa bazea ba Planu Estratéjiku Dezenvolvimentu (PED) 2011-2030 no Objetivu Dezenvolviemntu Sustentável (ODS) 2030, hanesan dokumentu estratéjiku no dokumentu polítiku.

notisia relevante:http://www.tatoli.tl/2021/10/27/pn-hahu-diskute-panorama-orsamental-2022/

notisia relevante:http://www.tatoli.tl/2021/11/04/ohin-pn-halo-audensia-publika-ho-governu-ba-proposta-oje-2022/

Notísia Relevante: PN hahú diskute Panorama Orsamentál 2022

Ohin, PN halo audiénsia públika ho Governu ba proposta OJE 2022

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here