Plenaria Parlamentu Nasional. Imajen Tatoli Antonio Goncalves.

DILI, 04 novembru 2021 (TATOLI)—Komisaun Espesializada Parlamentu Nasionál, kinta ne’e hahú halo audiénsia públika ho Governu kona-ba proposta Orsamentu Jerál Estadu (OJE) 2022.

Tuir distribuisaun kalendáriu hosi Parlamentu Nasionál ne’ebé Agéncia Tatoli asesu, katak Komisaun Espesializada Permanente sira, hahú hosi Komisaun A to’o G sei halo audiénsia públika ho Governu no entidade relevante sira kona-ba proposta OJE 2022.

Komisaun A iha dadeer no lorokraik sei halo audiénsia ho Gabinete Prezidensia Repúbika, Gabinete Primeiru-Ministru, Arkivu no Muzeu Rezisténsia Timorense, Sentru Nasionál Chega, no Gabinete Apoiu Sosiedade Sivil, Ministru Estadu ba Prezidensia Konsellu Ministru, Ministru Asuntu Parlamentár no Komunikasaun.

Komisaun B sei halo audiénsia públika ho Autoridade Protesaun Sivíl no Diresaun Jerál Protesaun Sivíl nian, Komisaun C no D sei halo audiénsia públika ho Ministru Petróleu no Minerál, Autoridade Nasionál ba Petróleuu no Minerál, Institutu Petróleu no Jeolojia, Timor Gap.

Komisaun E sei halo audiénsia públika ho Autoridade RAEOA no ZEEMS, Komisaun F sei halo audiénsia públika ho Laboratóriu Nasionál Saude, Ospitál Nasionál Guido Valadares (HNGV), Servisu Autonómu Medikamentu no Ekipamentu Saúde (SAMES), Servisu Nasionál Ambulánsia Emerjénsia Médika no Institutu Nasionál Saúde.

Komisaun G sei halo audiénsia públika ho Ministériu Edukasaun Juventude no Desportu (MEJD) no Sekretáriu Estadu Juventude Desportu.

Parlamentu Nasionál halo audiénsia públika hotu sei kontinua tama iha jeneralidade no espesialidade termina iha 15 dezembru, hafoin komisaun C trata asuntu Finansa Públika halo redasaun finál no iha 20 dezembru 2021 envia ba Prezidente Repúblika hodi halo promulgasaun.

Liu hosi audénsia públika ne’e atu husu Governu halo justifikasaun dokumentasaun orsamentál.
Proposta OJE 2022 hamutuk biliaun $1,675, hodi aloka ba miliaun $233 ba saláriu no vensimentu, miliaun $565,9 ba transferénsia públika, miliaun $24, 4 koresponde ba kapitál menór no miliaun $401, 7 ba kapitál dezenvolvimentu.

Jornalista : Nelson de Sousa

Editór       : Cancio Ximenes

 

PUBLISIDADEiklan

HAKEREK NO HATÁN

Please enter your comment!
Please enter your name here