Ministru Finansa, Rui Augusto Gomes, entrega Proposta Lei OJE 2022 ba Prezidente Parlamentu Nasionál, Aniceto Longuinhos Guterres Lopes, iha salaun konferénsia Komisaun C Parlamentu Nasionál, sesta (15/10). Imajen TATOLI/Francisco Sony

DILI, 15 outubru 2021 (TATOLI)Governu liuhosi Ministru Finansa, Rui Augusto Gomes, hamutuk ho Ministru Asuntu Parlamentár no Komunikasaun Sosiál, Francisco Martins da Costa Perreira Jerónimo, entrega ona Proposta Lei Orsamentu Jerál Estadu (OJE) 2022 ho montante biliaun $1,675 ba Parlamentu Nasionál (PN).

Proposta Lei ne’e Governu entrega iha sala Komisaun C ne’ebé trata asuntu Finansa Públika no simu hosi Prezidente Parlmentu Nasionál (PPN), Aniceto Guterres.

Prezidente Parlamentu Nasionál (PPN), Aniceto Longuinhos Guterres Lopes. Imajen TATOLI/Francisco Sony

“Tuir Konstituisaun Governu mak prepara Proposta OJE no Parlamentu aprova. Tanba ne’e, Governu kumpre tuir lei ne’ebé sei vigora hela iha loron 15 outubru no sira kumpre,” PPN informa liuhosi konferénsia imprensa iha salaun konferénsia komisaun C, PN, sesta ne’e.

Proposta OJE 2022 ne’e hetan redusaun 17,5% hosi OJE Ratifikadu 2021 ho montante biliaun $1,2.

Notísia relevante: Governu aprova Proposta Lei OJE 2022 biliaun $1,675

Hafoin submisaun hotu, sei la’o tuir Rejimentu Parlamentu, ne’ebé ohin kedas envia ba tékniku sira hodi haree legalidade no konstitusionalidade inisiativa OJE, prepara nota téknika no iha tersa (19/10) baixa ba komisaun, no komisaun C sei halo apresiasaun preleminária no prepara kalendáriu audiénsia ho entidade sira tomak, hafoin Parlamentu halo ajenda diskusaun no aprovasaun OJE.

Tuir kalendáriu ne’ebé hosi PN, loron 15 dezembru proposta OJE 2022 tenke aprova, nune’e bele fó biban mós ba Prezidente Repúblika halo analiza no estuda molok fin tinan ne’e no bele promulga.

Kontrasaun ekonómiku purvolta 8,6%

Iha fatin hanesan, Ministru Finansa, Rui Augusto Gomes, hateten, Governu mai kumpre saida mak hakerek ona tiha iha artigu númeru 30 hosi lei númeru 3/2009 kona-ba Orsamentu Jestaun Finanseira katak loron 15 outubru Governu entrega proposta Lei OJE inklui dokumentu sira ne’ebé akompaña proposta lei rasik.

Ministru Finansas, Rui Augusto Gomes. Imajen TATOLI/Francisco Sony

Proposta Lei akompaña ho livru sira no entrega eletronikamente, hafoin entrega sei publika dokumentu sira ne’e iha portal Governu hodi garante transparénsia, nune’e públiku bele komprende saida loloos maka iha orsamentu ne’e.

“Atu dehan de’it orsamentu ida-ne’e importante tanba nia hanesan instrumentu polítika fiskál ne’ebé tenta atu estimula kreximentu ekonómiku, hadi’a kondisaun sira ne’ebé durante tinan 2020 ita hetan tanba kontrasaun ekonómiku boot tebes, purvolta 8,6%,” Ministru Rui Gomes informa.

Aleinde ne’e, tanba kreximentu iha tinan 2021, ne’ebé  iha konfinamentu no ezekusaun orsamentál mós sei fraku oitoan.

“Tanba ne’e maka ita-nia esperansa ne’e purvolta 1,6%, ida-ne’e kreximentu ida pozitivu maski hosi baze ida ne’ebé menus no orsamentu ida ne’e ami espera katak kreximentu ekonómiku bele to’o 2%, depende ba ezekusaun orsamentál no kondisaun ne’ebé ita seidauk hatene hanesan COVID-19,” Governante ne’e esplika.

Programa ho orsamentu boot liu iha tinan 2022 mak Boa Governasaun no Jestaun Institusionál, ne’ebé ho objetivu atu sustenta mákina Estadu ho orsamentu totál kuaze  millaun $295, tuir kedan Igualdade Jéneru no Inkluzaun Sosiál millaun $203,78. Estrada no Ponte sira hanesan programa ne’ebé tuur iha pozisaun datoluk ho totál orsamentu alokadu kuaze millaun $202.

Programa saúde ho orsamentu alokadu millaun $106,78, Edukasaun no Formasaun millaun $105,87 no Eletrisidade millaun $101,73.

Alokasaun orsamentu tinan 2022 tuir prioridade nasionál neen a’as liu mak iha setór produtivu hanesan agrikultura no turizmu, ambiente no konektividade ho alokasaun 27%, abitasaun no inkluzaun sosiál 22%, boa governasaun 12%, dezenvolvimentu kapitál umanu 10%, dezenvolvimentu rurál 3% no dezenvolvimentu setór privadu 0,5%, funsionamentu mákina Estadu 18% no atividade seluk 8%.

Orsamentu aprovadu ba OJE 2022 tuir klasifikasaun ekonómiku a’as liu mak iha transferénsia públika ho montante millaun $565,9, tuir kedan ho bens no servisu millaun $449,8, kapitál dezenvolvimentu ne’ebé bele kria postu traballu no jere empregu rai-laran hetan alokasaun millaun $401,7, saláriu no vensimentu millaun $233 no kapitál menór millaun $24,4.

Medida foun sira ne’ebé sei inklui iha Proposta OJE 2022 mak hanesan, subsídiu ai-han ba funsionáriu públiku ho orsamentu alokadu millaun $25, Fundu Resposta Emerjénsia hasoru dezastre naturál ho orsamentu alokadu millaun $15, Fundu Investimentu hodi estabelese munisípiu foun Ataúro ho orsamentu alokadu millaun $13, Bolsa da mãe jerasaun foun ho orsamentu alokadu millaun $13 (montante ne’e la inklui millaun $6,4 hosi Governu Austrália liuhosi apoiu Orsamentu Diretu).

Enkuantu, Eleisaun Prezidensiál 2022 ho orsamentu alokadu millaun $12, Dezenvolvimentu empreza medida ki’ik ho orsamentu alokadu millaun $5. Akizasaun viékulu no ekipamentu ba Bombeiru hodi responde ba dezastre ho orsamentu alokadu millaun $3,9, Sensu Populasaun ho orsamentu alokadu millaun $3,1. Estabelesementu sistema ID Úniku ho orsamentu alokadu millaun $3 no Saláriu rekrutamentu foun FALINTIL-Forsa Defeza Timor-Leste (F-FDTL) hamutuk ema 1.200 ho orsamentu alokadu millaun $1,2.

Timor-Leste ninia Planu Estratéjiku Dezenvolvimentu Nasionál (PEDN) 2011-2030 organizadu liuhosi pilár importante haat, enkuadramentu institusionál, kapitál sosiál, dezenvolvimentu ekonómiku no dezenvolvimentu instraestrutura. Bazeia ba piliár importante haat ne’e, VIII Governu Konstitusionál define área prioridade neen ba tinan oin mak hanesan Dezenvolvimentu kapitál umanu, Abitasaun no inkluzaun sosiál, setór produtivu, ambiente no konetividade, dezenvolvimentu setór privadu no kooperativa, dezenvolvimentu rurál no Boa Governasaun.

Alokasaun orsamentu iha tinan tolu ikus

Proposta OJE 2019 hosi VIII Govenu ho montante biliaun $1,827, ne’ebé inklui ona ho empréstimu milliaun $87, no konsidera hanesan orsamentu boot liu kompara ho orsamentu anteriór, hafoin proposta boot tuir mai mak OJE 2016 ho montante biliaun $1,631.

Dotasaun orsamentál tinan 2019 ba saláriu no vensimentu milliaun $214,04, bens no servisu milliaun $478,26, transferénsia oúblika milliaun $705,11, kapitál menor milliaun $29,40, no kapitál dezenvolvimentu milliaun $400,17.

Iha loron 15 outubru, Governu submete proposta dahuluk ne’ebé Governu submete Proposta OJE 2020 ho montante biliaun $1,950 (inklui impréstimu $73), bainhira esklui impréstimu hamutuk biliaun $1,887, no bainhira fahe tuir kategoria saláriu no vensimentu millaun $241,271, bens no servisu millaun $738,428, transferénsia públika millaun $457,773, kapitál menór millaun $53,267 no kapitál dezenvolvimentu millaun $459,260.

Maski nune’e, iha loron 03 dezembru 2019, Primeiru-Ministru, Taur Matan Ruak, retira Proposta OJE 2020 hosi PN tanba rona opiniaun no preokupasaun husi deputadu sira ne’ebé konsidera montante boot liu no kontra Lei Jestaun Finanseira.

Nune’e, Governu lori hikas proposta ba daruak hodi diskute maibé iha 17 janeiru 2020, Proposta OJE 2020 la pasa iha diskusaun jeneralidade ho rezultadu votasaun a-favór 13, kontra 15 no abstensaun 25.

Proposta foun OJE 2020 ne’ebé la pasa ho montante biliaun $1,668, kompostu hosi sálariu no vensimentu millaun $235,6, bens no servisu millaun $561,8, transferénsia públika millaun $329,706, kapitál menór millaun $31,548 no kapitál dezenvolvimentu millaun $488,837.

Ho nune’e, proposta OJE 2020 ikus ne’ebé promulgadu ho montante biliaun $1,497, fahe ba kategoria saláriu no vensimentu millaun $206,8, bens no servisu milliaun $496,7, transferénsia públika millaun $571,1, kapitál menór millaun $8,9, kapitál dezenvolvimentu millaun $213,4. 

Proposta OJE 2021 inisiál ho montante biliaun $1,895 hodi prevee ba kombate surtu COVID-19 no problema cheias (dezastre naturál) no inundasaun.

Iha proposta Retifikativu, Governu propoin millaun $223,8 prevee ba fundu COVID-19 ne’ebé aumenta tán ba orsamentu orijinál, no integrasaun saldu jerénsia ne’ebé la inskritu iha OJE 2021 ho montante millaun $135,3.

Notísia relevante: PR Lú Olo promulga ona Orsamentu Retifikativu

Nune’e mós, alterasaun OJE 2021 foti hosi fundu infraestrutura millaun $54 no ministériu sira hamutuk millaun $65,152, nune’e rezerva kontinjénsia sa’e ona millaun $100-resin hodi fó resposta ba problema cheias no inundasaun ne’ebé akontese iha loron 04 abríl liubá.

Hosi ajustamentu hirak ne’e inklui saldu jerénsia millaun $135,3, montante finál OJE 2021 sa’e ba biliaun $2,1.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here