Ró Tranship II. Imajen Tatoli/Francisco Sony.

DILI, 05 novembru 2021 (TATOLI)—Prokuradór Jerál Repúblika (PJR), Alfonso Lopes, hateten kazu ró Tranship II sei iha hela faze investigasaun.

Notísia Relevante: Konklui verifikasaun faktu ró Tranship, CAC sei submete krime ba MP

“Kumpre konfidensialidade bainhira ramata akuradu tama Tribunál nakloke komunidade bele hatene, maibé iha faze investigasaun asegura konfidensialidade,” Prokuradór Jerál Repúblika hateten ba jornalista sira iha Palásiu Prezidensiál Nicolau Lobato, Bairru Pite, Dili, seeta ne’e.

Antes ne’e Komisaun Anti-Korrupsaun (CAC,siglá portugés) ezekuta mandadu buska no aprensaun hosi Tribunál Distritál Dili (TDD) ho númeru NUC 007/21.CAC TL, ba iha Autoridade Portuária Timor-Leste (APORTIL), liuhosi Dirasaun Cabotage, relasiona ho prosesu aluga ró Tranship II, ne’ebé deskonfia mosu iregularidade iha prosesu aprovizionamentu.

CAC mós konklui identifikasaun ba suspetiu Diretór Cabotade Nasionál, no dokumentu lubuk nu’udar baze evidénsia hodi submete ba MP loké prosesu tuir mai.

Akordu kontratu

Governu liu hosi MTK halo ona akordu kontratu ho kompañia Atralata Estrategi hosi Indonézia, hodi bele opera ró-ahi KMP Tranship II iha Timor-Leste, ne’ebé ró-ahi ne’e atraka iha Portu Dili iha 25 maiu.

Kontratu ho kompañia estranjeiru ne’e, ba kada fulan $220.000, ho ninia kapasidade tula pasajeiru hamuutuk na’in 300 inklui sasán ho kapasidade tonelada 1.000-resin.

Tuir planu, ró-ahi ne’e temporariamente sei opera entre Dili-Óe-cusse no Dili-Ataúro, hodi hein ró-ahi Belin Nakroma no Sukses ne’ebé iha prosesu manutensaun.

Antes ne’e, iha prosesu investigasaun, CAC rekomenda ba Ministru Transporte no Komunikasaun, José Agostinho da Silva, atu temporariamente suspende operasaun ro-ahí  Tranship II, tanba iha prosesu aprovizionamentu hamosu dúvida no ho hanoin kondisaun bele prezudika funsionáriu públiku MTK, bainhira Governu kontinua deside halo operasaun.

Notísia Relevante: MP analiza hela kazu ró Tranship II

CAC rasik halo prosesu inspesaun, bazeia ba mandatu ne’ebé hatur ona iha lei númeru 8/2009 kona-bá kriasaun CAC nu’udár instituisaun indepedente ho kna’ar atu prevene no kombate krime korrupsaun.

Iha artigu 9 dekretu lei númeru 23/2015 kona-bá estrutura orgánika CAC, define katak, unidade inspesaun no monitorizasaun responsável ba apoiu partisipasaun no sensibilizasaun sosiál no emprezariál nomós monitorizasaun situasaun indikadu korrupsaun iha administrasaun direita no indireta Estadu.

Aleinde ne’e, iha lei Medida Prevensaun no Kombate Korrupsaun (MPKK), artigu 7 kona-bá publisidade no transparénsia serbisu aprovizionamentu iha setór públiku no artigu 8 kona-bá aprovizionamentu ne’ebé justu no efisiente, fó espasu ne’ebé bo’ot ba serbisu prevensaun CAC atu intervene no asegura prosesu sira tuir prinsípiu-sira ne’ebé lei difini tiha ona.

Bazeia ba ida-ne’e, CAC halo ona inspesaun ba ró Tranship II no deskonfia mosu irregularidade iha prosesu aprovizionamentu.

Aliénde ne’e, rezultadu inspesaun MTK antes ne’e kontráriu ho CAC, ne’ebé CAC lori rekolla ona dadus hodi kruza verbalmente ho dirizente DNTM no rekomenda halo komparasaun no re-inspesaun tuir dadus hosi CAC.

CAC mós deteta katak, hafoin lori ro-ahí Tranship II mai Timor-Leste mak foin selebra kontratu no halo kontratu mak foin orienta halo prosesu aprovizionamentu.

Notísia Relevante: CAC iha faze analiza pedidu APORTIL ba pagamentu ró Tranship II

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here