Ró Tranship II. Imajen Tatoli/Francisco Sony.

DILI, 05 agostu 2021 (TATOLI)—Prokuradór Jerál Repúblika (PJR), Alfonso Lopes, hateten Ministériu Públiku (MP), halo hela analiza ba kazu ró Tranship II.

“Papél MP maka tenke asume bainhira prosesu hotu tama prosesu investigasaun, analiza hotu-hotu la’o hanesan mós ró Tranship,” Alfonso Lopes, hateten ba jornalista-sira iha edifísiu CAC, Farál, Dili, kinta ne’e.

Notísia relevante:CAC kontinua investiga kazu krimi ró Tranship II

Tanba ne’e, bainhira iha indísiu keixa partisipasaun tama iha Komisaun Anti-Korrupsaun (CAC sígla portugés), hodi remesa ona ba iha PJR liuhosi  Gabinete Kombate Korrupsaun no Krime Organizadu sekretária halo distribuisaun ba prokuradór atu haree no analiza.

“Iha ne’e ita sei halibur prova liuhosi  rona sasin no rekolla dokumentu, bainhira iha prova forte bele prodús akuzasaun loke prosesu tuir-mai no karik prova la  sustenta maka bele arkiva,” nia subliña.

Nia dehan, iha prosesu ne’e liga ba kazu natureza korrupsaun  sei kolabora ho CAC iha faze investigasaun ka bele halo delegasaun kompeténsia ba CAC, hodi halo invetigasaun.

Maski nune’e, nafatin respeita prezunsaun inosénsia tama iha faze investigasaun tenke kuidadu ho konfidensialidade.

Antes ne’e, Adjuntu Komisáriu CAC ba Prevensaun no Sensibilizasaun, Luis Oliveira Sampaio, hateten CAC hato’o ona autopartisipasaun rezultadu inspesaun kona-bá inspesaun ba ró Tranship II Gresik Indonézia, ba MP ne’ebé deskonfia mosu irregularidade iha prosesu aprovizionamentu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here