Ró Tranship II. Imajen Tatoli/Francisco Sony.

DILI, 18 agostu 2021 (TATOLI)—Komisaun Anti Korrupsaun (CAC, sígla portugés), kontinua verifika prova no dadus ne’ebé rekolla durante buska no apreensaun ba kazu krime ró Tranship II, ba Ministériu Públiku (MP).

“Ita halo hela verifikasaun ba dokumentu ne’ebé rekolla, besik remata ona. Iha lorokra’ik  sei submete ba MP atu kontinua lori ba Tribunál hodi hetan validasaun,” Diretór Informasaun no Seguransa CAC, Euclides Madeira, hateten ba jornalista Agência Tatoli, iha Faról, kuarta ne’e.

Notísia relevante:Kazu ró Tranship II, CAC ezekuta mandadu buska no apreensaun ba APORTIL

CAC mós konklui ona identifikasaun ba suspeitu Diretór Cabotage Nasionál, ne’ebé hetan informasaun lubuk-ida nu’udár baze evidénsia.

Iha prosesu identifikasaun, sei halo analiza didi’ak ho prova sira ne’ebé suporta no temi iha prosesu nia laran, hetan verasidade posibilidade sei identifika tán suspeitu seluk ba koñesimentu, relasiona ho kazu ne’e.

Bainhira hetan tiha validasaun hosi Tribunál mak foin loke prosesu investigasaun normál, hodi bolu testemuña ho suspeitu.

Iha 16 agostu, CAC ezekuta mandadu buska, domisíliu no preende sasán tuir mandadu Tribunál Distritál Dili (TDD) ho NUC  007/21.CAC TL, ba Autoridade Portuáriu Timor-Leste (APORTIL) liuhosi Diresaun Cabotage Nasionál.

Buska ne’e hala’o iha fatin tolu hanesan edifísiu Cabotage iha portu Dili, edifísiu sentrál APORTIL no rezidenéia Diretór Nasionál Cabotage iha Comoro,Dili.

Prosesu ne’e supeita Diretór Diresaun Cabotage ho inisiál FCC ho krime abuzu poder no partisipasaun ekonomia iha artigu 297,299 iha kódigu penál.

Durante buska konsege rekolla dokumentu importante sira mak hanesan pedidu operasaun, kontratu, prosesu aprovizionamentu oinsa ró ne’e mai, dokumentu pedidu pagamentu ho commitement payment voicer (CPV), inklui asegura komunikasaun ekipamentu serbisu ne’ebé maka Diretór Nasionál Cabotage Nasionál uza hanesan telefone, komputadór ida.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here